TUALELENUHO KU VINGILA!
Ku Livuezelela ca Vizindo—Vika Mbimbiliya ya Handekaho?
Vizindo, vukenia, luozi omo lia cisemua na vindzita, viekvio lika vi ve ku handeka ku mizimbu.
Lia 15 ya Novembro ya 2023, vakua The New York Times va handekele nguavo: “Ku livuezelela ca vizindo mu vi rede social vi na hianamo ku tuvakana na mua laza omo lia ku liluisa ca vaIsaleli na Gaza. Kaha eci cili na ku koka luozi na vizindo ha kati ka vantu.”
Lia 3 ya Novembro ya 2023, Dennis Francis ntuamena ua ku Assemblea Geral ya ku Estados Unidos, ua handekele nguendi: “Tunde lia 7 ya Outubro, vantu mu mavu ose va li na ku uma mua kama mutima omo lia ku livuezelela ca mizimbu ya vizindo, vimpande via vizindo na vukenia.”
Mizimbu ku tuala ha vizindo, vukenia kati via lelo, via tunda ku laza. Mbimbilya ya handeka via vantu vaze va “[hotuele] lilimi liavo ngue mukuale” na vaze ve ku sambeya zindzita na vukenia. (Visamo 64:3; 120:7; 140:1) Mbimbiliya ya muesa ngecize vizindo vi tue ku mona lelo lino, vili na ku livuezelela mua kama.
Vizindo—Via ku matangua etu
Mbimbiliya ya muesa vusunga vuvali vua omo lia vika vizindo via pua ciizilila lelo lino.
1. Ku ntsimbu ino “cilemo ca vavengi [cili na ku] tontola.” (Mateu 24:12) Mu cihela ca kuli muesa cilemo kuli umo na mukuavo, vali na ku lizinda.—2 Timoteo 3:1-5.
2. Vizindo mu mavu ose lelo lino, vili na ku muesa ha toma ngecize Satana Ndiavo, mukua vupi na cikenia ikeye ali na vikoka. Mbimbiliya nguayo: “Mavu ose a kundama kuli uze mukua vupi.”—1 Yoano 5:19; Ku-Solola 12:9, 12.
Vunoni Mbimbiliya ya muesa ngecize vuovuno Njambi a ka manusulako viuma viose vie ku koka vizindo. Cikuavo naua, Njambi a ka manusula na lamba liose lie ku koka vizindo. Mbimbiliya ya kulahesa nguayo:
Njambi “a ka hunda masozi ose ku meso avo; na ku-tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala: viuma via ku livanga vi na hiti.”—Ku-Solola 21:4.