Mu mavu ose, vantu vavengi vali na ku lizilika viose vie ku tunda ku tusitu ni nguetu ku pua va vegano.

•   Umo muzimbu nguauo: “Veganismo ya pua ku viana viuma viose vie ku pangesa tusitu ni ku va muesa vukenia, ngeci mua ku va tenga mbelela, cipue vuzalo ni ku va pangesa ku nkala vutumbe vueka.”—The Vegan Society

 Vamo ve ku hangula ku pua va vegano, omo lia ku lema tusitu, cihindu, ku niunga mavu, vulombelo na vikuavo.

•   Limo livulu ngualio: “Va vegano ve ku livindika ku-lia ntsitu, kati omo lia ku va zilikayo, vunoni omo lia vimo vilongesa vi va tsiliela, omo lia cihangula cavo ni omo lia ku singanieka nguavo inapu imo njila ya ku kuaselamo mavu kuya ku lutue.”—Britannica Academic.

 Vuno Veganismo i hasa ku tuala mavu ku lutue ni? Vika ya handekaho Mbimbiliya?

 Mbimbiliya ya muesa ngecize Sakatanga uetu, Yehova Njambi, a ue ku mona vantu ku pua va seho ku hiana tusitu, kaha ua va hana ndzili ha tusitu vose. (Njenisisi 1:27, 28) Mu nima ya ntsimbu, Njambi ua tavesele vantu va lie tusitu. (Njenisisi 9:3) Vunoni, ka va tavesele va muese vukenia ku tusitu.—Visimo 12:10.

 Kuliya na Mbimbiliya, cihangula ca ku-lia ntsitu ca pua ca muntu ku muntu. b Kaha nkala cihangula ci tu linga, ka ce ku vueza ku seho yetu ku meso a Njambi. (1 Kolintu 8:8) Na umo uahi na pande ku paya mukuavo ku tuala ha viuma via hangula kulia ni via likela.—Loma 14:3.

 Mbimbiliya ya muesa ngecize vihangula vietu ka vi hasa ku manusula visoti via mavu. Cingi ca visoti vieza omo lia pulitika, ku litepesa ca vantu na lizangamena ku tuala ha vupite. Kaha evi na umo muntu a hasa ku vi sungamesa uahi. Mbimbiliya nguayo:

•   “Cize ca henga ka ci tava ku ci sungamesa.”—Ekelesiaste 1:15.

 Sakatanga Uetu a ka manusula visoti vi tue ku pinda navio. Mbimbiliya ya pangesa vimueso mu ku lombolola via ka linga.

•   “Kaha nja muene lilu lia liha na mavu a aha: muomu lilu lia ku livanga na mavu a ku livanga vi na hiti; na mema a kalunga ahiko naua.”—Ku-So. 21:1.

 Njambi a ka tundisako “melu a laza” ni nguetu vinguvulu via vantu na ku neha “melu a aha” ni nguetu Vuangana vueni vua muilu. Vuangana vueni vu ka tundisako “mavu a laza” ni nguetu vakua vupi, kaha vu ka sika “mavu a aha” ni nguetu vaze ve ku tava ku ononoka vuangana vuaco.

 Mu ku sika ca Vuangana vua Njambi vantu va ka lilongesa ku yoya mu ciyulo ca ku tantuluka na tusitu, kaha va ka niunga vuino mavu.—Isaya 11:6-9.