TUALELENUHO KU VINGILA!
Ku Londa ca Vindando mu Mavu Ose—Vika Mbimbiliya ya Handekaho?
Mu muzimbu ua ngonde ya Junho ya 2022, Ntuamena ua Cisete ca Kama mu Mavu Ose a mamuna ngueni: “Mavu ose ali mu vusonde vua kama vua vuhutu, muomu vindando vili na ku tualelaho ku londa mua kama kaha vantu ka vesi na vimbongo.”
Civunga ce ku Tulika Vimbongo via Vimo Vifuti ni nguetu (FMI) nguavo: “Vindando via mazi na via kulia, via londo cikuma mu vuasi kaha evi vili na ku kokela vuhutu ku vantu cikuma-kuma vaze va kala mu vifuti via vuhutu.”
Mbimbiliya ya tu kuasa ku ivuisisa omo lia vika tuli na ku hita mu lamba ya cifua eci, vati tu hasa ku vula evi visoti na lulavelelo luka tuli naluo ku tuala ha kuhua ca vuhutu.
Ku londa ca vindando ku ‘matangua a ku kotokela’
Mbimbiliya ya tumbula matangua a tuli na ku yoyela nguayo, ‘matangua a ku kotokela’—2 Timoteo 3:1.
Yesu ua handekele ngueni ku matangua aco kue ku solokele viuma “via ku zuzuisa.” (Luka 21:11) Kaha, ku londa ca vindando ce ku kokela vantu liova. Muomu ve ku lisosomua vati muono uavo u kafua na vati va ka suka vusoko vuavo.
Vupolofeto vua ku livulu lia Ku-Solola, vua tumbuile laza via ku londa ca vindando ku matangua ano. Ku-Solola 6:6 nguayo: “Kaha nja vuile ngue lizi . . . ngualio, Njongo ya tiliku na lumbongo lua palata, na zinjongo zitatu zia sevanda na lumbongo lua palata.”
Linga mu tantekeye mizimbu ikuavo ku tuala ha ‘matangua a ku manusuila,’ na vupolofeto vua mu livulu lia Ku-Solola, talenu video Mavu a na Aluluka Tunde mu 1914 kaha tandenu cimpande ca mutue, “Vamala Vauana Vakua Tuvalu—Va pua Veya?”
Vuhutu tangua vuhua
“Kaha va ka tunga zindzivo, na ku kalamo; kaha va ka tombeka vitungu via viniu na ku lia vusuka vuavio. Ka va ka tunga, na mukuavo ku kalamo; ka va ka tombeka na mukuavo ku liako.”—Isaya 65:21, 22.
“Ku ka kala ku-lana ca mbuto ha mavu helu lia mincinda.”—Visamo 72:16.
“Muomu mapakeso a vahutu, muomu ku-vindzuoka ca vakua ku vindama, Vuovuno nji ka katuka, ngueni Yehova.”—Visamo 12:5. a
Vuovuno, Njambi a ka manusulako vuhutu vuose, kati lika mu cifuti cimo vunoni mu mavu ose. Linga mu tantekeye vikuavo, talenu cimpande, “Será que é possível acabar com a desigualdade econômica?”
Vunoni ambe mu ntsimbu ino, Mbimbiliya i hasa ku mi kuasa mua ku pindila na ku londa ca vindando. Mu njila ika? Mbimbiliya ya kala na vimamuna via cili ku tuala ha vati tu hasa ku pangesa vimbongo na mana. (Visimo 23:4, 5; Ekelesiaste 7:12) Linga mu tantekeye mizimbu ikuavo, talenu vimpande “Niungenu Vuino ha mue ku Liyoyesela” na “Como Viver com Menos Dinheiro.”
a Yehova lia pua lizina lia Njambi.—Visamo 83:18