Vimamuna via Mbimbiliya vi Hasa ku mi Kuasa nga Mua Zimbalesa Vipanga Vienu
Nga mua zimbalesa vipanga vienu, vi hasa ku mi kokela visoti kati lika ya ku honoua vimbongo, vunoni na muono uenu mu vusoko, mu visinganieka na mu yoyesi yenu. Vimamuna via mu Mbimbiliya vi na hatako via kala na seho kaha vi hasa ku mi kuasa kulua na citanga caco.
Lekenuko vakuenu vati muli na ku livua.
Mbimbiliya nguayo: “Kavusamba a lema ntsimbu yose.”—Visimo 17:17.
Nga mua zimbalesa vipanga, halumo mu nomu mua kama mutima, muli na matoto, mua ku lingila mua muahi ni ku livua ngecize ka mua kele na seho. Nga mu lekako vavusoko kaha na vavusamba venu va ha mutima visoti vi muli na ku pinda navio, va ka mi hana vukuasi vu tondeka. Cikuavo naua, va hasa ku mi hana vimamuna vi hasa ku ka mi kuasa ku uana vipanga vieka.
Vianenu ku uma mua kama mutima.
Mbimbiliya nguayo: “Kati mu umine mitima ku litangua lia mene: muomu litangua lia mene li komina mutima likelio livene.”—Mateo 6:34.
Mbimbiliya ya tu kaniamesa ku lihakela vizango via ku lutue. (Visimo 21:5) Cikuavo naua, ya tu mamuna ku viana ku lisosomua mua kama omo lia viuma vi hasa ku ka soloka ku lutue. Kaha vintsimbu vimo tue ku lisosomua na viuma vize halumo na limo litangua liahi vi ka tu solokela. Capua ca cili ku tuala mana ku viuma vi tu hasa ku puisamo mu litangua lia ngongo.
Mbimbiliya ya tu hana naua vimamuna via mana vi hasa ku tu kuasa ku lua na visoti vi hasa ku tu umisa mutima mu ntsimbu ino. Linga mu tantekeye vikuavo “Nga mua Sakalala Mutima, Vika mu Hasa ku Linga?”
Alululenu cifua ci mue ku pangeselamo vimbongo.
Mbimbiliya nguayo: “Nja tantekeya ku kala ku vundende, kaha nja tantekeya ku sampuoka.”—Filipu 4:12.
Alululenu vimo omo lia visoti vi mu li na ku pinda navio. Eci ca ambatesela kumo na ku alulula cifua ci mua kele na ku sanduolamo vimbongo na ku viukilila na vize vi muli navio. Zangamenu, linga kati mu pue na ku levala viuma vize ka mu tondeka.—Visimo 22:7.
Linga mu tantekeye vimamuna vikuavo mua vati mu hasa kulua na visoti via ku honoua vimbongo, talenu cimpande “Como viver com menos dinheiro?”
Pangesenu mua cili ntsimbu yenu.
Mbimbiliya nguayo: “Endenu na mana” . . . , “na ku lilandela ntsimbu.”—Kolose 4:5.
Ambe nga ka muesi naua na vipanga, puenu na ku pangesa vuino ntsimbu yenu. Ku lingamo, ci ka mi kuasa ku yoya vuino na ku vueza ku seho i mua kala nayo.
Puenu vakua ku litombuesa.
Mbimbiliya nguayo: “Mu vipanga viose mua kala nganio”.—Visimo 14:23.
Kalenu na cizango ca ku linga vipanga vize ambe nga via liseza na vize vi mua kele na ku linga kale. Kaha nga citava, tavenu ku linga vipanga vize visoloka ngue ka via kele na seho ni nguetu vipanga viaco ka ve ku fueta ngue mua laza.
Kati mu hilukile mu nima.
Mbimbiliya nguayo: “Ku cimene kuva mbuto yove, kaha ku cinguezi kati u vindike livoko liove; muomu ka ua tantekeyele mbuto ika i ka vezika.”—Ekelesiaste 11:6.
Tualelenuho ku tonda vipanga. Sanduolenu muzimbu ngecize muli na ku tonda vipanga. Lekenuko vavusoko venu, vavusamba, vantu va mua kele na ku panga navo kaha na vaze va mua lihata navo. Tondesesenu vipanga ku vi angecia ya vakua ku hana vipangi, vakua ku hana mitambi ya vipanga kaha mu vi jornal na mu vi saiti. Livuaheselenu vua lumo nga va ka mi sana va ka mi hule via vipangi kaha na ku livuahesela ku tuala ha vipanga viose ovio vi mu ka uana.