Makulukazi a makulukazi a mandunduma e ku soloka mu nkala muaka. Cingi ca mandunduma aco apua a andende. Vunoni mandunduma a kama e ku nongesa viuma, ku koka lamba na ku tsa. Kaha vintsimbu vimo mandunduma aco e ku koka mankimba a kama mu ku nongesa vimo vihela ku vimbonge na ku nongesa miono ya vantu. Vunoni Mbimbiliya ya handeka ku tuala ha mandunduma aco ni?

Mu cimpande cino

•  Vuno Mbimbiliya ya handeka nguayo kue ku kele mandunduma ni?

•  Vuno mandunduma e ku soloka mu ntsimbu ino a pua ku lipuisamo ca vupolofeto ni?

•  Vika via lomboloka kuli yetu vupolofeto vua mu Mbimbiliya ku tuala ha mandunduma a kama?

•  Visinganieka via ku henga ku tuala ha vupolofeto vua mu Mbimbiliya na mandunduma.

 Mbimbiliya ya handeka via mandunduma ku vumo vupolofeto vua handekele Yesu. Vupolofeto vuaco tu hasa ku vu uana mu mikanda itatu ya mu Mbimbiliya:

 “Cifuti ci ka katukila cifuti, na vuangana ku vuangana; kaha ku ka kala ndzala, na misongo ya ku litambuisa, na mandunduma a mavu kueka na kueka.”—Mateo 24:7.

 “Cifuti ci ka katukila cifuti, na vuangana ku vuangana; ku ka kala mandunduma a mavu kueka na kueka ku ka kala ndzala.”—Mako 13:8.

 “Ku ka kala mandunduma a kama a mavu, na ndzala na misongo ya ku litambuisa.” —Luka 21:11.

 Yesu ua handekele via “mandunduma” e ku solokele ku vihela “kueka na kueka.” Kaha ha ntsimbu yaco naua, kue ku solokele vindzita, ndzala, na misongo ya ku litambuisa. Ku soloka ca viuma viose evi mu ntsimbu imo lika, vie ku muesele ha toma ngecize tuli na ku yoyela ku ‘matangua a ku kotokela.’ (Mateo 24:3; 2 Timoteo 3:1) Kuliya na vi ya handeka Mbimbiliya, matangua a ku kotokela a putukile mu 1914 kaha kanda a cihue.

 Eyo. Vupolofeto vua Yesu ku tuala ha mandunduma, via litombola mpundu na viuma vili na ku soloka lelo lino. Tunde mu 1914, kua solokaho kale mandunduma a ku pua 1.950 kaha vantu va ku pua 2 milhões va tsa ku mandunduma aco. a Talenu via solokelele mu miaka ino.

 2004—Oceano Índico. Limo lindunduma lia vulahe 9.1, lia katuile limo linkimba lia kama na ku enieka vifuti via ku pua 10 kaha vantu va ku pua 225.000 va tsa.

 2008—China. Limo lindunduma lia vulahe 7.9, lia nongesele vimo vimbonge na vi membo kaha vantu va ku pua 90.000 va tsa. Kaha 375.000 va vulumukile, vakuavo va zimbalesele vindzivo viavo.

 2010—Haiti. Limo lindunduma lia vulahe 7.0, lia katuile mankimba a kama na ku nongesa vantu va ku pua 300.000 kaha 1milhão ya vantu va zimbalesele vindzivo viavo.

 2011—Japão. Limo lindunduma lia vulahe 9.0 hamo lika na mankimba aco, a tsihile vantu va ku pua 18.500 kaha makulukazi a makulukazi a vantu va zimbalesele vindzivo viavo. Central elétrica ya Fukushima nayo ya nongele kaha na ku lingisa ku tuikila ca mbomba. Vunoni mu nima ya miaka 10, vantu va ku pua 40 va tungile ku hiehi na centro yaco, ka va pandele ku hiluka ku cihela caco omo lia vusonde vua keleko.

 Vupolofeto vua mu Mbimbiliya ku tuala ha mandunduma, e ku tu kuasa ku mona vika vi ka soloka ku lutue. Yesu ngueni: “Omo mu ka mona viuma evi vi li na ku soloka, tantekeyenu ngecize vuangana vua Njambi vu li mu hiehi.”—Luka 21:31.

 Mbimbiliya ya lombonona nguayo, Vuangana vua Njambi vua pua imo nguvulu muilu kaha muangana uaco Yesu Kilistu. Yesu ua longesele vandongesi veni ku vundila vuangana vuaco.—Mateo 6:10.

 Omo Vuangana vua Njambi vu putuka ku sika mavu ose, Njambi a ka manusula na viyovo via mavu, ndzala, hamo lika na mandunduma a kama. (Isaya 32:18) Cikuavo naua, a ka manusulako visoti viose via ku muvila na via mu visinganieka vie ku koka mandunduma aco lelo lino. (Isaya 65:17; Ku-Solola 21:3, 4) Linga mu tantekeye vikuavo, talenu cimpande “O que o Reino de Deus realizará?”