TUALELENUHO KU VINGILA!
Ku Hianesamo ca Masika na ku Yukuma mu Mavu Ose—Vika Mbimbiliya ya Handekaho?
Mu Julho ya 2022, kua tuhukile mizimbu ya ku hianesamo ca masika na ku yukuma mu mavu ose.
Lia 25 ya Julho ya 2022, vakua CNN Wire Service va handekele nguavo: “Ku China vimbonge vi heta ku 70 va vilunguile ngecize vie ku hitile naua mu ku yukuma ca ku hianesamo mu ngonde yaco.”
Lia 17 ya Julho ya 2022, vakua The Guardian nguavo: “Omo lia ku hianesamo ca ku yukuma ku Europa, misenge ili na ku uema.”
Lia 24 ya Julho ya 2022, vakua The New York Times nguavo: “Ku cimo calumingu vimbonge via ku Vucelo na Vutokelo vua ku Estados Unidos via yukumine mu hianesamo.”
Vika via lombonoka evi viose? Vuno tu ka tualelelaho ku yoya ha mavu ni? Vika Mbimbiliya ya handekaho?
Vuno Mbimbiliya ya handeka laza via ku hianesamo ca ku yukuma na masika ni?
Eyo. Ku hianesamo ca ku yukuma cendela hamo na ku lipuisamo ca vupolofeto vua mu Mbimbiliya ku matangua etu. Ca ku muenako, Yesu ua handekele ngueni mu ka mona via “ku zuzuisa” ni “vitantekeyeso via kama via ku fuma muilu.” (Luka 21:11) Ku hianesamo ca ku yukuma na masika mu mavu ose, cili na ku zuzuisa vavengi nguavo, halumo vantu va hasa ku nongesa mavu.
Vuno mavu kasi a ka vuaha ku yoyelamo ni?
Njambi ua tangele mavu linga vantu va kalemo ku miaka yose (Visamo 115:16; Ekelesiaste 1:4) Yehova ka ka tavesa vantu ku nongesa mavu. Vunoni na likuminia ku “enieka vaze venieka mavu.”—Ku-Solola 11:18.
Talenu vupolofeto vuvali vua muesa via na kulahesa Njambi:
“Zindinda na mpambo vi ka zolela; Na makango a ka viukilila, Na ku tema ntsani ngue loza.” (Isaya 35:1) Njambi ka ka tavesa mavu a pue ngundu ca ku hona vantu ku yoyelamo. Vunoni a ka vuahesa viuma viose vi va na vihisa vantu.
“U hinduisa mavu na ku a tukumuina, U a fukisa cikuma.” (Visamo 65:9) Na civezikiso ca Njambi, tangua mavu a ka pua citungu.
Linga mu tantekeye vikuavo ku tuala ha vati ku yukuma na masika a ku hianesamo via kuata ku vupolofeto vua mu Mbimbiliya talenu cimpande, “Mudanças climáticas e o futuro da humanidade — O que a Bíblia diz?.”
Linga mu tantekeye vikuavo ku tuala ha vati mavu va ka a puisa citungu talenu cimpande, “Quem vai salvar a Terra?”