TUALELENUHO KU VINGILA!
Omuo lia Vika Vantu ka ve ku Lisingimika?—Vika Mbimbiliya ya Handekaho
Kasingimiko ka na kaluua ku ka muesa. Vakua ku vavala ka ve ku singimika vakua ku saka, vakua ku landa ka ve ku singimika vakua ku landesa, vakua kuendela mu ndeke ve ku veta vakua ku pangela mu ndeke, vanike vakua lisino ve ku yengula valongisi vavo ku sikola kaha na ku va veta vene. Vamo vakua pulitika ve ku linga mbuanja kaha co, kuli vamo ve ku limuesa ngue va kala na kasingimiko.
Mbimbiliya ikeyo lika i tua pande ku tsiliela kaha ya muesa vika via lomboloka ku muesa kasingimiko. Kaha ya lombolola naua vika kasingimiko kali na ku tepulukila matangua ano.
Omuo lia vika vantu ka ve ku lisingimika?
Mu mavu ose, kasingimiko kali na ku tepuluka—kasingimiko ku viuma via cili, ku masiko a mu muono kaha cingi ca vantu va na nongonona ngecize kasingimiko ka cili ka na tepuluka.
Kuliya na cimo ku tondesesa ca ku Estados Unidos, vantu ve ku livua ngecize mu miaka 22 ya ku manusuila, masiko a mu muono kanda aci tepuluke kasingimiko ku hiana matangua ano.
Cikuavo naua, cimo ku tondesesa ci va lingile vantu va tuvakana 32 mil mu vifuti 28. Kaha 65% ya vakua ku tondesesa va handekele nguavo kanda va ci mone ku hona vilongesa na ku hona kasingimiko ngeci mua matangua ano.
Mbimbiliya ya polofetele ha viuma vi tuli na ku mona lelo lino.
‘Omuo a ka heta matangua a ku kotokela, ku ka kala vintsimbu via ku kaluua. Vantu va ka pua vakua ku lilema vavene, vakua ku lihalesa, vakua ku sahula, vakua lisino ku visemi vavo, vakua ku hona ku santsela, vakua ku tuaha, ka ve ku lipokuesa, vakua ku kaluua, vakua vungungu, vakua vuhuke kaha va ka zinda via cili.’—2 Timoteo 3:1-3 Tradução da Sociedade Bíblica Portuguesa.
Linga mu tantekeye vikuavo ku tuala ha vupolofeto ovu, tandenu cilongesa “Será que a Bíblia predisse o modo como as pessoas iriam pensar e agir nos nossos dias?”
Mua ku muesela Kasingimiko – vi ya Handeka Mbimbiliya
Mua vusunga, kasingimiko kali na ku tepuluka. Vunoni ambe ngoco, makulukazi na makulukazi a vantu va heta ha ku tava ngecize Mbimbiliya i hasa ku tu tuamenena. Mua kala vimamuna vi tu kuasa ku muesa kasingimiko. Cikuavo naua, mua kala vilongesa via cili. ‘Citava ku vi tsiliela ku miaka yose.’ (Visamo 111:8) Talenu vimo vimueso:
Vika Mbimbiliya ya handeka: “viuma viose mu hianga vantu va mi lingilevio, va lingilienuvio enu naua.”—Mateu 7:12.
Vi ca Lomboloka: Tua pande ku mona vakuetu mu cifua ci tu tonda navo va tu muenemo etu vavene–na kasingimiko na kulipokuesa.
Vika Mbimbiliya ya handeka: “Sezenu makuli, handekenu vusunga muntu na mukuavo.”—Efeso 4:25.
Vi ca Lomboloka: Tua pande ku pua vakua vusunga mu mezi na mu vilinga.
Linga mu tantekeye vikuavo ku tuala ha cimpande caco, tandenu:
Vutala vua kaniungi No. 1 2024 “Via Cili na Via Vipi—<u2060>Vimo Vimamuna vi mu Hasa ku Kulahela.”
Na cilongesa “Tolerância – Como a Bíblia pode ajudar.”