TUALELENUHO KU VINGILA!
Ku Piluila Mata ha Sikola—Vika ya Handekaho Mbimbiliya?
Lia 24 ya Maio ya 2022, ku Estados Unidos, ku mbonge ya Uvalde kua solokele imo mponde ya zuzuisile cikuma vantu. “Umo mukuendze ua tsihile na vuta vanike va ku pua 19 na valongisi 2, ha imo sikola ya vanike i va luka nguavo Robb.’’—The New York Times
Ca vusiua, viuma via cifua eci ka vie ku tu komouesa naua. Mizimbu ya vakua USA Today, nguayo: Muaka uali, mu Estados Unidos lika, “ku piluila vantu ha visikola ca soloka lua ku pua 249, ku tuvakana ca solokele ku miaka ya ku nima na mu 1970.’’
Omo lia vika viuma via cifua eci vie ku soloka? Vati tu hasa ku pinda navio? Vuno citava tu lavelele nguetu tangua vukenia vu ka hua ni? Mbimbiliya ya kumbulula evi vihula.
Omo lia vika mavu a na sulu na vukenia?
Mbimbiliya ya tumbula ntsimbu i tuli na ku yoyela nguayo “matangua a ku kotokela.’’ Ku matangua aco, cingi ca vantu ka ve ku muesa “cilemo ca cisemua’’ kaha “vakua ku kaluua.’’ Kaha ve ku “tualelelaho ku linga vupi manene.” (2 Timoteo 3:1-5, 13; Mbimbiliya ya Shukulu Kalunga) Linga mu tantekeye vikuavo, talenu cimpande “Será que a Bíblia já falava como as pessoas iriam pensar e agir hoje?”
Vantu vavengi ve ku lihula nguavo, ‘Omo lia vika Njambi ue ku ecelela viuma via vipi ngeci mua ku piluila vantu ku visikola?’ Linga mu uane cikumbululo ci ya hana Mbimbiliya, talenu cimpande “Pessoas boas sofrem—Por quê?”
Vika vi hasa ku tu kuasa ku pinda novu vukenia?
“Muomu viose vi va sonekele laza, va vi sonekelele ku tu longesa, linga ku lukakatela na ku ku-lembezieka via ku visoneka tu kale na ku lavelela.”—Loma 15:4.
Vimamuna via mu Mbimbiliya vi hasa ku mi kuasa ku yoya mu mavu ano a vukenia. Linga mu tantekeye vikuavo, talenu Despertai ili na mutue “A violência vai acabar algum dia?”
Linga mu tantekeye mizimbu ikuavo ku tuala ha vati visemi va hasa ku kuasa vana vavo mua ku pindila na mizimbu ya ku tungumuna, talenu cimpande “O impacto das notícias em seus filhos.”
Vuno vukenia tangua vu ka huako ni?
“A ka kula muono uavo ku mapakeso na luozi.”—Visamo 72:14.
“Kaha va ka fula mikuale yavo ku i himpuisa matemo, na makunga avo mu ku himpuka zimpoko zia ku sonduesa miti; cifuti ka ci ka zunduila cifuti mukuale, cipue ka va ka lilongesa ndzita naua.”—Mika 4:3.
Na umo muntu uahi a hasa ku linga viuma via ka linga Njambi ku lutue. Ku hitila mu Vuangana vueni vua muilu, Njambi a ka nongesa mata ose na ku manusulako vukenia. Linga mu tantekeye viuma vikuavo vi vu ka linga Vuangana vua Njambi, tandenu cimpande “Omo vu ka Sika Vuangana vua Njambi ku ka Kala ‘ku Lana ca Ciyulo.”’