Mu mavu ose vantu vali na ku hita mu ntuima ya kama na visoti vikuavo vi ye ku koka. Talenu mizimbu i na hatako:

•   Lia 13 ya Julho, 2023, umo muzimbu ua handekele nguauo: “Mu vifuti via vingi, Junho ya muaka uno ikeyo ya ntuima cikuma mu ku hita ca miaka 174.”—National Oceanic and Atmospheric Administration, U.S. Department of Commerce.

•   Lia 13 ya Julho, 2023, umo muzimbu ua handekele nguauo: “Italia, Espanha, França, Alemanha na Polonia vi na lavelela ku hita mu ntuima ya kama. Mu vimbonge via Sicilia na Sardinia ntuima i ka heta vene ku 48°C. Mu Europa yose kanda mu ci kale ntuima ya ku pua aha.”—European Space Agency.

•   Lia 17 ya Julho, 2023, umo muzimbu ua handekele nguauo: “Omo mavu a tualelelaho ku yukuma, na niondzi i ka tualelelaho ku livuezelela na ku koka mavazi naua.”—Stefan Uhlenbrook, director of hydrology, water and cryosphere at the World Meteorological Organization.

 Vuno eyi mizimbu ya ku livuezelela ca ntuima, masika na niondzi ye ku mi umisa mutima? Talenu vika ya handeka Mbimbiliya ku tuala hali eci cimpande ca seho.

 Eyo. Ku livuezelela ca ntuima na vikuavo ca litombola na viuma vi ya polofetele Mbimbiliya ku tuala ha matangua ano. Ca ku muenako, Yesu ua polofetele ngueni tu ka mona viuma “via ku zuzuisa” ni “vitantekeyeso via kama.” (Luka 21:11) Cili vene, ku livuezelela ca ntuima, masika na vikuavo ce ku lingisa vavengi ku lisosomua nguavo vantu va kenieka mavu mu vutuntu.

 Houe. Njambi ua tangele mavu ku pua limbo lia vantu ku miaka yose. Ngeci ka kecelela vantu va a nongese mu vutuntu. (Visamo 115:16; Ekelesiaste 1:4) Kaha ua kulahesa “ku enieka vaze venieka mavu.”—Ku-Solola 11:18.

 Mbimbiliya ya muesa ngecize Njambi a ka niunga mavu linga kati a nonge ku viyovo.

•   “[Njambi] a lembamesa luhundzi lua ku huhua cikuma, Ngecize mancimpa ao a holoka kulu.” (Visamo 107:29) Njambi ua kala na ngolo ya ku lembamesa viyovo ni ku vi manusula linga kati vi tualeleho ku yandesa mavu.

•   “U hinduisa mavu na ku a tukumuina, U a fukisa cikuma.” (Visamo 65:9) Njambi a ka vezikisa mavu na ku a puisa citungu.

 Linga mu tantekeye vikuavo ku tuala ha cikulaheso ca Mbimbiliya ca ku sungamesa mavu, talenu cimpande “Quem vai salvar a Terra?”