Vika ya Handeka Mbimbiliya ku Tuala ha ku Keha ca Mema ha Mavu?
Tu vose tua tondeka mema a cili linga tu yoye. Vunoni António Guterres, mukuluntu ua ONU, nguendi: “Vuovuno mema a cili a hua ha mavu, muomu tuli na ku a manusula cikuma.” Makulukazi na makulukazi a vantu mu mavu ose va na putuka laza ku pinda na citanga ca ku honoua mema.
Strdel/AFP via Getty Images
Vuno tangua tu ka kala vene na mema a ku puamo ni? Ni cisoti caco ci tualelelaho muze vene? Vika Mbimbiliya ya handekaho?
Viya kulahesa Mbimbiliya ku tuala ha mema
Mbimbiliya ya muesa ngecize tangua tu ka kala na mema a ku puamo. Mema a cili, a ku lela.
“Ku zindinda ku ka vueluoka mema, na vandonga ku makango. Museke ua ku viazima u ka himpuka cisali, na livu lia ku uma zindundzi zia mema.”—Isaya 35:6, 7.
Vuno citava tu kulahele mu cikulaheso eci ni? Tu talenu viya handeka Mbimbiliya ku tuala ha vati va tangele mavu.
Viya handeka Mbimbiliya ku tuala ha mavu na ku lizenga ca mema
“[Njambi] ka tangele [mavu a pue a ngoco], ua a vumbile linga va kaleho.—Isaya 45:18.
Mu ku linga Njambi ua tangele mavu linga vantu va yoyelemo, ua viukisile cimo ku lizenga ca mema, linga mavu a tualeleleho ku kala na mema a cili. Vati vie kuenda?
“[Njambi ue ku] koka mambake a mema, akeo [eku] konda ku cuku ceni ngue mema a ku noka, [kaha] maselua [eku a muania], na ku nduekela muntu mu ku lana.”—Yombi 36:27, 28.
Ku handeka muvatu, eci cinimbu ca handeka via ku lizenga ca mema ca tumbika Njambi, linga ha mavu ha tualelele ku kala mema a cili kaha eku lilelesa avene. Mema eku kakumuka mu visali na mu kalunga ndonga, ku likondela mu maselua na ku lilelesa, mu nima yaco eku noka linga vantu na tusitu va tualeleleho ku kala na mema a cili a ku lela.—Ekelesiaste 1:7; Amose 5:8.
“Nji ka hana mema enu a kalunga ku ntsimbu yao, na mavu a kema, na miti ya ku cifuti i kema mihako yayo.”—Levitiku 26:4.
Njambi ua kulahesele ku vezikisa vaIsaleli, vaze va puile vandimi, ngecize a ka va hana niondzi ya ku puamo linga va ka kale na vimbuto via vingi. Ikeye a tantekeya ngecize ku kala na vimbuto via cili ha hitukila ha niondzi ya ku puamo.
Via lingilile Njambi vaIsaleli ku laza, vikevio via ka lingila vantu vose ha mavu. (Isaya 30:23) Vunoni ntsimbu ino, vitanga via mema vili na ku livuezelela kaha omo lia ku hona niondzi ci li na ku vuezelela visoti vikuavo. Vutuhu ngoco, vika ya handeka Mbimbiliya ku tuala ha vitanga viaco lelo lino?
Vati vitanga via mema vi kahua
Mbimbiliya ya muesa ngecize Njambi ku hitila mu Vuangana vueni, a ka manusulako viose vize vie ku koka vitanga ha mavu, hamo lika na citanga ca mema. (Mateu 6:9, 10) Vuangana vua Njambi, ikeyo nguvulu i ka sika mavu ose. (Ndaniele 2:44; Ku-Solola 11:15) Kaha i ka sungamesa viuma vize vi ve ku honoua ku linga vanguvulu va ha mavu—a ka manusulako viose vie ku koka vitanga via mema.
Citanga: “Ku aluluka ca ntsimbu, ci li na ku tanganesa ku lizenga ca mema. Kaha evi vili na ku koka ku yukuma ca kama na vimpuenza, ku zalela ca mema na ku livuezelela ca mema mu kalunga ndonga.
Mu va ka ci manusula: Vuangana vua Njambi vu ka sungamesa viuma viose vie ku koka vitanga viaco ha mavu. Njambi ua kulahesele nguendi: “Talenu, nji panga viose via viha.” (Ku-Solola 21:5) Ha mavu ha ka kala mema a engi a ka lingisa miti na vintemo ku soka vuino, ambe ku vihela vize lelo lino na umo uahi ua kalako. (Isaya 41:17-20) Yesu Kilistu mu ku pua Muangana ua Vuangana vua Njambi, a ka lembamesa viyovo via mavu.
Mua kele hano ha mavu, Yesu ua holuesele luhundzi. Mu ku lingamo, ua muesele ngolo ya mu hele Njambi. (Mako 4:39, 41) Mua vusunga, mu ku sika ca Vuangana vua Njambi, a ka manusulako viyovo via mavu. Kaha vantu va ka yoya mu ciyulo na mu ku lembama, ka va ka lisosomua naua na viyovo viose-ovio.
Citanga: Vantu ka ve ku singanieka ha viuma vie kuiza mu vilinga viavo na vakua mingoso va tupuka ku vimbongo ve ku vihisa mema a mu vindonga, visali, vindundzi via mema. Evi vie ku tepulula mema a cili ha mavu.
Mu va ka ci manusula: Njambi a ka lelesa mavu na ku vuahesa vindonga, masima na kalunga-ndonga. Mavu a ka pua citungu. Mbimbiliya nguayo: “Zindinda na mpambo vi ka zolela; na makango a ka viukilila, na ku tema ntsani ngue loza.”—Isaya 35:1
Vika vi ka solokela vaze ve ku vihisa mavu? Njambi ua kulahesa nguendi a ka “enieka vaze venieka mavu.”—Ku-Solola 11:18; Visimo 2:21, 22.
Citanga: Mema vali na ku a pangesa mu njila ize kati ikeyo. Mema ali na ku-hua vuasi ku pulakana na ntsimbu i eku lipanga.
Mu va ka ci manusula: Ku hitila mu Vuangana vua Njambi, cizango ca Njambi cikeco ci ka lingika “ha mavu”, kati ca vantu. (Mateu 6:9, 10) Vuangana vua Njambi vu ka longesa vuino vantu. Isaya 11:9 a nguayo: “Mavu a ka sula na mana a ku tantekeya Yehova.” Mu ku linga vantu va ka kala na mana a ku tunda kuli Yehova, kaha va ka mu lema mua kama, va ka niunga mu vutantuluke mavu na viose via kalamo.
Linga mu tantekeye vikuavo ku tuala vi vu ka linga Vuangana vua Njambi, talenu cimpande “Vika vu ka Puisamo Vuangana vua Njambi?”
Fukulenu livulu lia Isaya kapitulu 35, mu limuene enu vavene vati mavu a ka himpuka citungu
Talenu video Omo lia Vika Njambi ua Tangele Mavu? Mu tantekeye vutumbe vua Njambi ku tuala ha mavu na vantu.
a Yehova lia pua lizina lia Njambi. (Visamo 83:18) Talenu cimpande “Iya ua pua Yehova?”
Halumo mu Hasa ku Lema Naua Evi
TUALELENUHO KU VINGILA!
Vika Mbimbiliya ya Handeka ku Tuala ha Cilanga?
Vuno visoti via ha mavu tangua vi ka hua ni? Vati a ka fua ano mavu ku lutue?
ESSENTIAL BIBLE TEACHINGS
Vika Vuangana vua Njambi?
Yesu mu ku ambulula ceni cose ua longesele via Vuangana vua Njambi ku hiana nkala cimpande. Mu vihita via miaka vandongesi veni va ambulula via ku iza ca vuangana vuaco.
YETU VEYA
Vundilenu Cilongesa
Simutuilenu ku tuala ha vihula via mu Mbimbiliya ni lilongesenu via vingi ku tuala ha Vakaleho va Yehova.
