Vulika Vuli na ku Livuezelela ku Vantu—Vika Mbimbiliya ya Handekaho?
Ku tuala ha muzimbu ou, a vakua ku tondesesa va na handeka nguavo, mu mavu ose ha kati ka vantu vuana, umo ue ku livua vulika.
“Vulika vu hasa ku kuata ku vantu va vitso viose kaha ku cihela cose-oco.”—Chido Mpemba, mukuasi ua ku Ndzango ya Tala via ku Likata ca Vantu na Cihindu mu Mavu Ose.
Vamo ve ku singanieka nguavo vulika vue ku kuata lika ku vakuluntu, kuli vakua ku livua vulika na vaze vali lika liavo. Vunoni houe, muomu ambe vakuendze na vahumbe, vakua cihindu ca cilli, vakua ndzolela, va tsimana, valiambata navo va hasa ku ivua vulika. Vulika na ku lisosomua ci hasa ku vihisa cihindu ca mu visinganieka.
Vivek Murthy, Ndotolo mukua tavula na mukua ku saka via cihindu ku Estados Unidos, ua handekele ngueni: “Vulika ka vua puile lika ku livua mua ku vihia.” Kaha ua vuezeleko naua ngueni: “Vusonde vua kala ha ku lisondoloka ku vantu, vua lifua na muntu ue ku sipa makaya a ku pua 15 mu litangua.”
Vika Mbimbiliya ya Handekaho?
Sakatanga uetu ka tondo tu lisondoloke ku vantu. Tunde ku vuputukilo, vutumbe vua Njambi vua pua, vantu va yoye mu ndzolela na ku likata vuino umo na mukuavo.
Citume ca mu Mbimbiliya: “Njambi ua handekele ngueni: “Ka ca viukile yala ku kala lieni.” —Njenisisi 2:18.
Njambi ua tonda tu likuate vusamba nendi. Ua tu kulahesa ku suena kuli etu, nga tu lihakela kapandi ka ku mu tantekeya.—Tiango 4:8.
Citume ca mu Mbimbiliya: ‘Va vezikisa vaze va tantekeya ngecize va tondeka Njambi, muomu Vuangana vua muilu vunapu vuavo.’—Mateu 5:3.
Njambi ua tonda tu mu lemese hamo lika na vakuetu. Ku lingamo ce ku tu kuasa ku kala na cihindu ca mu visinganieka.
Citume ca mu Mbimbiliya: ‘Kaha tu likungululenu ha kati ketu linga tu sangumuke cilemo na vipanga via ku viuka, kati tu likele ku likunguluila hamo, . . . vunoni ku limamuna vene.’—VaHevelu 10:24, 25.
Linga tu tantekeye vikuavo ku tuala ha seho ya kala ha ku seteka ku viana vulika, talenu cimpande“ Solidão num mundo interligado.”
a O Estado Global das Conexões Sociais, por Meta e Gallup, 2023.