Lumo lika mu muaka, Vakaleho va Yehova hamo lika na vantu va ve ku lania ve ku kunguluka ku Mulalelo ua ku tsa ca Yesu ngue mua sikile. (Luka 22:19; Yoa. 3:16) Ciuano caco ce ku tu kuasa ku ivuisisa seho ya viuma via lingile Yesu mua hele muono ueni mu ku tsila vantu. Ce ku muesa naua vati nkombelo ya Yesu ye ku kuata ku miono yetu lelo, kaha na vati i ka kuata ku miono yetu ku lutue.—Yoano 3:16.

 Ambe nga mu ka kunguluka ku Mulalelo uno muaka ni kuahi, vivezikiso vika mu hasa ku tambula omo lia nkombelo ya Yesu? Yesu ua tu longesele ngueni tua pande ku linga viuma vivali via seho:

1.  1. Lilongesenu via Njambi na Yesu. Mua vundilile kuli Ise ua muilu, Yesu ua handekele ngueni: “Muono ka ue ku hua ukeuo ou, ku ku tantekeya ove Njambi umo lika ua vusunga, na uze i ua tumine, ikeye Yesu Kilistu vene.”—Yoano 17:3.

2.  2. Pangesenu vi mue ku lilongesa. Yesu ngueni tua pande ku pangesa vilongesa vieni mu muono uetu. Ca ku muenako, ua manusuile cimpande ca ha muncinda mu ku sangala vose ve ku “ku ivua mezi [eni], kaha [na] ku a linga.” (Luka 6:46-48) Cikuavo naua, ha ntsimbu ikuavo ua handekele ngueni: “Nga mu tantekeya viuma evi, mu vezika nga mu vi linga.”—Yoano 13:17.

 Mu tonda ku tantekeya via vingi ku tuala hali Njambi na Yesu ni? Mu tonda ku tantekeya vati mu hasa ku pangesa vi mue ku lilongesa ni? Viuma vi hasa ku mi kuasa evi.

 Cilongesa ca Mbimbiliya ca vuana ci tue ku hana ku vantu ce ku kuasa vavengi ku hilula Mbimbiliya na ku pangesa vi ya handeka mu muono uavo.

•   Yenu ha lifo lia handeka via Cilongesa ca Mbimbiliya linga mu tantekeye vati cafua.

•   Linga mu tantekeye vati cafua cilongesa ca Mbimbiliya na Vakaleho va Yehova, talenu video Tua mi Tambula ku Cilongesa Cenu ca Mbimbiliya.

 Vakaleho va Yehova ve ku likungulula luvali mu simano ku cihela ca ku lemesela ci va sana nguavo Ndzivo ya Vuangana. Ku viuano viaco, tue ku simutuila via Mbimbiliya na vati tu hasa ku pangesa vilongesa viayo mu miono yetu.

 Viuano viaco via pua via mbunga yose, citava mu ka kunguluke ambe nga ka mua puile Mukaleho ua Yehova. Nga ci mi tavesa, mu hasa ku kunguluka cito na meso ni ku hitila mu videoconferencia.

•   Linga mu tantekeye vika vie ku hita ku viuano viaco, talenu video Vika vie ku Hita mu Ndzivo ya Vuangana?

•   Linga mu uane Ndzivo ya Vuangana ya kala mu hiehi nenu Niatenu ha mutamba Tantekeyenu Cihela ca ku Likunguluila.

 Vimpande na vivideo via mu saiti yetu vi hasa ku mi kuasa ku tantekeya vilongesa via Yesu na seho ya nkombelo yeni.

 Ca ku muenako, linga mu tantekeye vati ku tsa ca yala umo lika ce ku kuasa makulukazi na makulukazi a vantu, tandenu vimpande “Mu Njila Ika Yesu ua tu Ovola?” na “Vika Yesu ua Yandelele na ku Tsa?” ni talenu video Omo lia Vika Yesu ua Tsile?