Mu ku hita ca muaka ua 2024, vantu va ku pua 5 bilhões va ka tala vueho vua Olimpiku, kaha vakua kuasa vueho vuaco va tunda ku vifuti via kupua 206. Ntuamena ua Civunga ca Tala via Vueho vua Olimpiku nguendi: “Ovu vueho vua pua imo njila ya ku kuasa vantu mu mavu ose ku likuata kumo.” Kaha ua vuezeleko naua nguendi: “Tu likuatenu kumo mu ku linga eci cilika, ci tu kuasa ku yoya mu ciyulo, na ku mona ovu vueho ku pua cilika ce ku tu pandakana hamo na ku likuata kumo, vutuhu tua liseza-seza.”

 Vuno Vueho vua ku Olimpiku vua hasa ku puisamo viuma via kama ni? Vuno tu hasa ku lavelela vueho vuaco vu tu nehele ciyulo na kulikata kumo ni?

 Vueho vua Olimpiku vua uno muaka, ka vua puile lika vusikameno. Muomu vu na tsindika naua ha viuma via kuata ku vantu, na pulitika ili na ku koka matepeso. Kaha kahangu aco, ka na kuata honi ku viuma vi va tondeka vantu, ku miyati, ku malombelo kaha na ku muono.

 Vueho vua mu mavu Ose ngeci mua vueho vua Olimpiku, vue ku kuasa vantu ku linona vuli. Vunoni navuo, vue ku sambeya vifua na vilinga vie ku koka kahangu na ku zima ciyulo ca kulikata kumo.

  Mbimbiliya ya polofetele vilinga vie ku kaluuisile ciyulo ha kati ka vantu. (2 Timoteo 3:1-5) Linga mu tantekeye vikuavo ku tuala ha vupolofeto vua mu Mbimbiliya, tandenu cilongesa “Será que a Bíblia já falava como as pessoas iriam pensar e agir hoje?”

 Mbimbiliya ya hana lulavelelo lua vusunga ku tuala ha ciyulo na ku likata ca vantu mu mavu ose. Ya tu kulahesa nguayo “Vuangana vua Njambi,” vukevuo lika vu ka pandakana vantu mu mavu ose. —Luka 4:43; Mateu 6:10.

 Muanga ma vua vuangana vuaco ua pua Yesu Kilistu, uze a ka neha ciyulo mu mavu ose. Mbimbiliya ya kulahesa nguayo:

•   “Mukua vuviuke a ka sokolokela, Na ku-lana ca ciyulo.”—Visamo 72:7.

•   “Muomu ikeye a kohiela mukua ku zela omo a tambeka, . . . A ka kula muono uavo ku mapakeso na luozi.”—Visamo 72:12, 14.

 Ambe lelo lino, vilongesa via Yesu vili na ku pandakana makulukazi a vantu va ku vifuti 239. Mu ku pua Vakua Kilistu, Vakaleho va Yehova mu mavu ose, va na lilongesa kupua vakua ciyulo. Linga mu tantekeye vati ve ku vi puisamo, talenu Vutala vua Kaniungi vuli na mutue, “Mua ku Manusuila Vizindo.”