TUALELENUHO KU VINGILA
Vukenia mu Pulitika—Vika Mbimbiliya ya Handekaho?
Kulivuezelela ca vukenia mu pulitika, ci li na kulingisa vantu mu mavu ose kuuma mutima.
Ku Mexico, va tsihile vantu va kupua 39 vakua kusintsila ha vuangana na ku linga vukenia vua kuliseza-seza. Kaha vukenia vuaco vua nehela visoti kulihangulo ni cela ca lihitile mu 2023-2024, mu cifuti caco.
Vuovuno vene ku Europa, kuna solokele vukenia vua vuingi mu pulitika. Kaha lia 15 ya Maio ya 2024 ku Eslovakia, ntuamena ua kulivanga ua mu cifuti ha handende, vakua ku linga vukenia va tondele ku mu tsiha.
Kaha vantu ku Estados Unidos vali mu cova-ova, muomu lia 13 ya Julho Donald Trump, muangana ua laza va setekele ku mu tsiha.
Omo lia vika honi vukenia mu pulitika vuli na kulivuezelela? Vuno tangua vukahuako ni? Vika Mbimbiliya ya handekaho?
Kahangu mu pulitika va kapolofetele
Mbimbiliya ya polofetele nguayo ku matangua etu, aze ave kusana “matangua a kukotokela,” vantu vavengi vaka muesa vilinga vie kusambeyele vukenia na kuhona kulitavasiana.
‘Ku matangua aze a ku kotokela ku keza zintsimbu zia ku kaluua. Muomu vantu ka va ka muesa ku santsela . . . ka va ka muesa cilemo ca vusunga, . . . vakua ku liyaka, . . . vakua ku sahula, . . . vakua ku kaluua, vakua vungungu, vakua zimpata, vakua kulihalesa.’—2Timoteo 3:1-4.
Kaha Mbimbiliya ya polofetele naua nguayo, liuayanga na hoi-hoi mu pulitika, vieku puile vitantekeyeso via ku matangua a kukotokela. (Luka 21:9) Vunoni pulitika na kahangu tangua vikahua ku miaka yose.
Vukenia mu pulitika tangua vukahua
Mbimbiliya ya lombolola nguayo Njambi a ka nongesa mavuangana a vantu na ku hingisamo vuangana vuendi vua muilu.
“Njambi ua muilu a ka tumbika vuangana vumosi vuntsa ka va kenieka ku miaka yose ya ya-ye . . . vunoni vukevuo vu ka vatuola na ku lia mavuangana aa ose, kaha vu kemana ku miaka yose ya ya-ye.”—Ndaniele 2:44.
Vuangana vua Njambi vu kapandakana vantu na kuneha ciyulo mu mavu ose.
Muangana vua vuangana vuaco, Yesu Kilistu, ve ku mu sana nguavo “Muata Ua Ciyulo,” kaha aka linga cose mangana ‘ciyulo cikaleko ku miaka yose.’—Isaya 2:3, 4.
Ambe vene mu ntsimbu ino, vose ve kuononoka Nguvulu ya Muilu, veku yoya mu ciyulo. Kaha Mbimbiliya ya muesa viuma vie kuizamo: “Na vakevo va ka fula mikuale yavo mu ku puisa matemo, Na makunga avo mu ku puisa zimpoko; Cifuti ka ci ka katukila cifuti na mukuale, Cipue ka va ka lilongesa ndzita naua.”—Isaya 2:3, 4.
Linga mu tantekeye vikuavo, tandenu cilongesa“ Vika vu ka Puisamo Vuangana vua Njambi?” kaha talenu video Vika Vuangana vua Njambi?