Vulika Vuli na ku Lisanduoka ngue Musongo—Vati mu Hasa ku Pinda Navuo?
“Ku Estados Unidos, cingi ca vakuluntu va handekele nguavo va hitile mu musongo ua ku livua vulika kaha ambe vene lelo lino, vakuendze na vahumbe navo ve ku pinda na citanga caco.”Talenu—Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.
“Ndzango ya Tala via Cihindu mu Mavu Ose, [Organização Mundial da Saúde] va hanenene umo mutambi nguavo, va na tungu imo seketa ya iha i va sana nguavo, Comissão de Conexão Social. Vutumbe vua katete vua seketa yaco, ku likungulula linga va uane vinjila via ku tepulula vulika, muomu eci cisoti ci hasa ku pua vusonde vua kama ku cihindu. Vua mu civali, ku simutuila mua vati va hasa ku kuasa vantu ku likuata kumo na ku tuala muzimbu uaco mu vifuti viose, ambe vene ku vifuti vize via ku hutua cikuma.”—Organização Mundial da Saúde, Novembro 15, 2023.
Mbimbiliya ya tu hana vimamuna via cili vi tu kuasa mpundu mua vati tu hasa ku kala na vavusamba va cili, vaze va hasa ku tu kuasa linga kati tu ivue vulika.
Vitume via mu Mbimbiliya vi hasa ku kuasa
Tepululenu ku viuma vi hasa ku mi lingisa ku sondoloka ku vakuenu. Viuma viaco via ambatesela kumo, ngeci mua ku tepulula mua kama ku ntsimbu mu ku pangesa internete. Cikuavo naua lihakelenu kapandi ka ku tonda vantu, ku simutuila navo citona meso na ku linga vavusamba va cili.
Citume ca mu Mbimbiliya: “Kavusamba a lema ntsimbu yose; na muanetu na semuuila mu ku kuasa ku lamba.”—Visimo 17:17.
Tondenu vukovelelo vua ku kuasa vakuenu. Ku muesa ngozi ku vakuetu ka ce tu kuasa lika ku kaniamesa vusamba, vunoni ce ku tu vuisa naua ndzolela ya vusunga.
Citume ca mu Mbimbiliya: “Ku-hana ca hiana ku-tambula mu ku vezika.”—Vilinga 20:35.
Kovelemu naua mu saite yetu linga mu uane mizimbu ikuavo ya mu Mbimbiliya, ku tuala ha vati mu hasa ku uana vavusamba va cili.