TUALELENUHO KU VINGILA!
Vi Vali na ku Linga Vakua Malombelo ku Tuala ha Ndzita ku Ucrânia—Vika Mbimbiliya ya Handekaho?
Talenu vi vali na ku linga vamo vakuluntu va malombelo va lutsimo ku tuala ha ndzita ku Ucrânia:
Imo Jornale ya mu internete nguayo: “Ntuamena ua vulombelo vua Ortodoxa, ni nguetu Nkaka Cirilo, ka handekele na vimo viahi ku tuala ha ndzita i va na katula vakua Rússia. . . . Vunoni mizimbu i vue ku sanduola vulombelo vuaco, ye ku sambeya Putin prezidente ua ku Rússia mu ku mu hana vukaleho vua ku linga ndzita na Ucrânia.”—EUobserver, 7 ya Março ya 2022.
Imo Jornale ya mu internete nguayo: “Mukuluntu Cirilo . . . ua handekele ngueni, kali-kali masualale vetu vali na ku luisa Úcrania linga va manusuleko vupi.”—AP News, 8 ya Março ya 2022.
Imo Jornale ya mu internete nguayo: “Epifânio I, ua ku Kiev Mukuluntu ua vulombelo vua Ortodoxa, lia Segunda Feira, ua vezikisile li va luise vakua nkole yavo vaka Rússia . . . kaha [Ua] vuezeleko naua ngueni, ku tsiha masualale va Rússia kati vupi.”—The Jerusalem Post, 16 ya Março ya 2022.
Umo mukanda u va sonekele vakua Civunga ca Vitembele nguayo: Etu [vakua civunga ca vitembele na malombelo a mu Ucrânia] tue ku hakuila masualale va mu Ucrânia na vaze ve ku i yohiela ku masualale va Rússia. Tue ku va vezikisa na ku va kundika mu vivundilo, omo lia ku ohiela cifuti ca Ucrânia.”—UCCRO a 24 ya Fevereiro ya 2022.
Mu ku mona cenu, vuno vulombelo vue ku litumbula ku kava lungano lua Yesu Kilistu, citava va ku kaniamesa vantu vavo kuya ku ndzita ni? Vika ya handeka Mbimbiliya?
Vakua malombelo ku lihaka mu vindzita kati ca lelo
● Mizimbu ya ku laza, ya muesa ngecize malombelo e ku sambeya vindzita oku a hakuila ciyulo. Tundeko, Vakaleho va Yehova ve ku aneka ku mbunga eci civembulu ci ve ku muesa vakua malombelo. Talenu vimo vimueso mu mikanda yetu:
“Cimpande “As Cruzadas: uma ‘trágica ilusão” ca muesa vati vulombelo vua Katolika Romana, vua kala na mulonga ku tuala ha vantu va va tsihile na vukenia mu lizina lia Njambi na lia Kilistu.
“Cimpande “A Igreja Católica na África” ca muesa vati vulombelo vuaco ka vua hasele ku vindika ndzita ha kati ka miyati ni ku litsihanga ca vantu vakua visemua vieka.
Vimpande “A culpa é da religião?” na “O papel da religião nas guerras humanas” kaha na “A religião toma partido” via muesa vati vakuluntu va malombelo va Katolika, Ortodoxa na Protestante, va lingile vundzi-ndzi mutakela ku vali mu vindzita.
Vuno Vakua Kilistu va pande ku sambeya ndzita ni?
Via longesele Yesu: “U ka lema mukuenu ngue ove ivene.” (Mateo 22:39) “Lemenu vitozi vienu.”—Mateo 5:44-47.
Aci singaniekenu: Vuno citava vumo vulombelo vue ku ononoka citume ca Yesu ku tuala ha cilemo ku songangeya vantu vavo va ka tsihe vakuavo ku ndzita ni? Linga mu tantekeye cikumbululo talenu cimpande “Os cristãos verdadeiros e a guerra” na “É possível amar os inimigos?”
Yesu ua handekele ngueni: “Vuangana vuange kati vua hano ha mavu: nga vuangana vuange vua puile vua hano ha mavu, nga misipayi vange va na lu, linga kati va nji hane kuli vaYundeya.” (Yoano 18:36) “Vose va kuata mukuale va ka nonga na mukuale.”—Mateo 26:47-52.
Aci singaniekenu: Nga Vakua Kilistu ka va pande ku lua ni ku luila Yesu, vuno navo va pandele ku kuata ku mata ni? Talenu cimpande “A guerra é compatível com o cristianismo?” linga mu mone vati Vakua Kilistu va mu sekulu ya ku livanga va kavele mpundu lungano lua Yesu kaha na viuma via longesele.
Vika vi ka solokela malombelo e ku sambeya vindzita?
Mbimbiliya ya muesa ngecize Njambi ua viana malombelo aze e ku litumbula ku pua Vakua Kilistu, vunoni ka e ku ononoka masiko eni.—Mateo 7:21-23; Tito 1:16.
Livulu lia Ku-Solola, lia muesa ngecize ku meso a Njambi, aa malombelo aco, mavoko avo a sula na maninga “a vose vaze va va na tsihi ha mavu.” (Ku-Solola 18:21, 24) Linga mu tantekeye omo lia vika, talenu cimpande “O que é Babilônia, a Grande?”
Yesu ua muesele ngecize malombelo ose a viana Njambi, va ka a nongesa. Ngeci mua muti ua ku pola ue ku ima vusuka vua ku pola, va “ka u pakula na ku u mbila mu tuhia.” (Mateo 7:15-20) Tandenu muzimbu “O fim da religião falsa está próximo!” linga mu mone vati viuma viaco vi ka soloka.
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Civunga ca Vitembele na Malombelo a mu Ucrânia hamo lika na vitembele via ku pua 15, viemanena vantuamena va malombelo a Ortodoxa, Katolika Romana, Katolika Grega, Protestante, Evangélica, vulombelo vua vaYundeya kaha na vua vu muçulmanos.