Vuno ce ku mi kaluuila ku tepesa makuli ku vusunga ni? Matangua ano, ci soloka ngue vantu ve ku tava viuma kuliya na cifua ci ve ku livuilamo ni mu ku kava visinganieka via vakuavo, kati omo lia vusunga. Mu mavu ose, vantu vavengi va tsiliela nguavo vusunga ka vua keleko.

 Kaha evi via laza. Imo miaka 2.000 ku nima nguvulu Pontiu Pilato ua ku Loma, ua futuluile Yesu ngueni: “Vusunga vukevuo vuka?” (Yoano 18:38) Vutuhu Pilato ka lavelele cikumbululo, vunoni ua lingile cihula ca seho. Mbimbiliya ya kumbulula cihula caco mu njila i hasa ku miya ku mutima na ku mi kuasa ku tantekeya vusunga, mu mavu ano a sula ndzimba.

Vuno vusunga ku vua kala vene?

 Eyo. Mbimbiliya ya pangesa lizi “vusunga” mu ku tumbula viuma via kala na vukaleho kaha via ku sungama. Ya longesa ngecize Yehova Njambi a ikeye Ndundzi ya vusunga vuose, mu ku mu tumbula nguayo: “Njambi ua vusunga.” (Visamo 31:5) Mu Mbimbiliya mua kala vusunga vua Njambi, kaha va vu setekesa na ceke, muomu vu hasa ku tu tuamenena mu mavu ano ali mu liuayanga.—Visamo 43:3; Yoano 17:17.

Vati mu hasa ku uana vusunga?

 Njambi ka tondele tu tsilielele vusunga vua mu Mbimbiliya ku ndzimba. Vunoni ua tonda tu pangese mana etu mu ku vu hilula, kati lika ku hitukila ha cifua ci tue ku livuilamo. (Loma 12:1) Ua tonda tu mu tantekeye na ku mu lema mu ku pangesa “mana” etu. Cikuavo naua, ua tu kaniamesa tu konke ha viuma vi tue ku lilongesa mu Mbimbiliya.— Mateo 22:37, 38; Vilinga 17:11.

Kuiko a tunda makuli?

 Mbimbiliya ya muesa ngecize makuli a tunda kuli Satana Ndiavu, uze ua pua citozi ca Njambi, mu ku mu tumbula nguayo “ise” ya makuli. (Yoano 8:44) Ua vangeyele Njambi ku meso a vantu va katete. (Njenisisi 3:1-6, 13, 17-19; 5:5) Kaha tunde tangua lize, Satana ue ku tualelelaho ku sanduola makuli ku tuala hali Njambi, na ku sueka vusunga.—Ku-Solola 12:9.

Omo lia vika makuli a lana cikuma?

 Kuno ku matangua a ya tumbula Mbimbiliya nguayo, ‘matangua a ku kotokela’ Satana ali na ku hasa kuonga na ku sevuisisa vantu vavengi. Vantu ve ku handeka makuli mu ku zangamena na ku sevuisisa vakuavo. (2 Timoteo 3:1, 13) Kaha mu malombelo a engi mua lana visaki. Mbimbiliya ya muesa ngecize ku matangua ano vantu ‘va ka kala na matuitui a kuzua va ka lilundikila valongisi va ku masungu avo’ kaha “va ka aluluka matuitui avo ku vusunga.”—2 Timoteo 4:3, 4.

Omo lia vika vusunga vua puila vua seho?

 Vusunga vua tondeka linga vantu va hase ku likulahela umo na mukuavo. Kaha ku likulahela ca pua ca seho, muomu nga cahi, masoko na vusamba navio vi uila mu liuayanga. Mbimbiliya ya muesa ngecize Njambi ua tonda ku mu lemesa cetu ci hitukile ha vusunga. Nguayo vaze va lemesa Njambi “va pande ku mu lemesa mu [sipilitu] na mu vusunga.” (Yoano 4:24) Tantekeyenu vati Mbimbiliya i hasa ku mi kuasa ku nongonona na ku patuka ku visaki via mu malombelo. Tandenu vimpande via ku likava via mutue “Mentiras que afastam as pessoas de Deus.”

Omo lia vika Njambi a tonda nji tantekeye vusunga?

 Njambi a tonda mu kovoke na ku yoya miaka yose, ngeci mukemuo a tonda mu lilongese vusunga ku tuala hali ikeye. (1 Timoteo 2:4) Nga mu lilongesa vitume via Njambi ku tuala ha via cili na via vipi, mu ka likuata vusamba neni. (Visamo 15:1, 2) Linga a kuase vantu ku lilongesa vusunga, Njambi ua tumine Yesu ha mavu. Kaha ua tonda tu halakane ku vilongesa via Yesu.—Mateo 17:5; Yoano 18:37.

Vuno Njambi tangua a ka tundisako makuli ni?

 Eyo. Njambi ua zinda vakua ku kuisa vakuavo. Ngeci ua kulahesa ku ka nongesa vose ve ku tualelelaho ku handeka makuli. (Visamo 5:6) Mua ka lingamo, a ka puisamo naua eci cikulaheso ceni: “Mulungu ua vusunga u ka kala miaka yose ya ya-ye.”—Visimo 12:19.