TUALELENUHO KU VINGILA!
Ku Litsihanga na mata mu Mavu Ose—Vika Mbimbiliya ya Handekaho?
Mu ngonde ya Julho ya 2022, cingi ca vantu va va tsihile na mata ku vambanditu:
“Kutsa ca va Shinzo Abe, mukua pulitika ua ku Japão [ua puile ex-primeiro-ministro] ca vavalesele ku mitima ya vantu vavengi mu cifuti cose, cikumakuma omo lia masiko a va tumbikile ku Japão ku tuala ha mata, vumbanditu vua tepulukile.”—10 ya Julho ya 2022, The Japan Times.
“Ku cifuti ca Dinamarca, umo yala ua tsihile vantu vatatu mu imo venda ya ku Copenhague kaha eci ca tungumuine cifuti cose.”—3 ya Julho, 2022, Reuters.
“África do Sul: Umo yala ua tsihile vantu 15 na mata ku imo ndzivo ya ku lila, ku mbonge ya Soweto.”—10 ya Julho ya 2022, The Guardian.
“Ku kuhua ca simano lia 4 ya Julho, ku Estados Unidos vantu va tuvakana 220 va va tsihile na mata.—5 ya Julho ya 2022, CBS News.
Vuno evi tangua vi kahua ni? Vika Mbimbiliya ya handeka ku tuala ha cimpande caco?
Kuhua ca Vukenia
Mbimbiliya ya tumbula matangua a tuli na ku yoyela nguayo, ‘matangua a ku kotokela’ kaha ya vuezako naua nguayo, ku matangua aco vantu va ka pua “vakua ku kaluua” vakua vukenia kaha vakua luozi. (2 Timoteo 3:1, 3) Evi via lingisa vantu ku kala na liova. (Luka 21:11) Vunoni Mbimbiliya ya kulahesa nguayo ku lutue, vukenia tangua vu kahuako “kaha vantu va ka tumama mu vukalo vua ciyulo, na mu vikalo via vuovoke, na mu vihuimino via ku holoka kulu.” (Isaya 32:18) Vati honi evi vi ka lipuisamo?
Vose vakua vukenia va ka vanongesa kaha na mata ose va ka a nongesa.
“Vakua vupi va ka va vatula ku cifuti.”—Visimo 2:22.
“[Njambi a lingisa zindzita ku likela na haze ha lenga mavu; a pokola vuta vua lungusa, kaha a vatula ha kati likunga; a tsimika makalu a ndzita mu tuhia.”—Visamo 46:9.
Viose vie ku koka vukenia, Njambi a ka vimanusulako kaha a ka longesa vantu ku pua vakua ciyulo.
“Ka va ka vavalesa cipue ku pihisa ku muncinda uange uose ua ku lela; Muomu mavu a ka sula na mana a ku tantekeya Yehova, ngue mema a zalela Kalunga.”—Isaya 11:9.
Ambe mu ntsimbu ino, Njambi ali na ku kuasa vantu ku “fula mikuale yavo ku i himpuisa matemo, na makunga avo mu ku himpuka zimpoko” ni nguetu ku va kuasa ku pua vantu va ciyulo na ku likela ku pangesa mata.—Mika 4:3.
Linga mu tantekeye vikuavo ku tuala ha vikulaheso via mu Mbimbiliya via ku ka yoyela mu mavu a ku hona liova, talenu cimpande “É possível ficar livre do medo?”
Linga mu tantekeye vati vukenia vukahuako mu vutuntu, tandenu cimpande “Paz na Terra enfim!”