•  Mezi a ku Sokolola 2

•  Vupite vua mu Lizi lia Njambi 3-5

  •  Cimpande 3

  •  Vupite vua mu Lutsilielo 4

  •  Ku Tanda Mbimbiliya 5

•  Tualenu ku Lutue Cipanga Cenu ca ku Ambulula 6-14

  •  Ku Putuka ku Simutuila 7

  •  Mangendzi a ku Hilukila 8

  •  Ku Puisa Vantu Vandongesi 9

  •  Ku Lombolola vi mua Tsiliela 10

  •  Cimpande 11

  •  Via ku Linga 12

  •  Ambuluisi 13

  •  Ku Pangesa Vivideo na Mikanda 14

•  Ku Yoya Cetu Vakua Kilistu 15-16

  •  Cilongesa ca Mbimbiliya mu Cikungulukilo 16

•  Mezi a ku Soka 17

•  Visangala na Vimamuna 18

•  Ntsimbu 19

•  Ku Meneka ca Kaniungi ua ku Zinguluka 20

•  Simano ya Ciuano ca Limbo ni ca Muhato 21

•  Simano ya Mulalelo 22

•  Mukuluntu ua Ciuano ca Muono Uetu na Vipanga 23

•  Tuamena ua Ciuano ca Muono Uetu na Vipanga 24

•  Mukua ku Mamuna 25

•  Visikola via ku Kuasa 26

•  Vivideo 27

1. Vitume vili ha mukanda uno, va vi sonekela ku kuasa vose ve ku kala na mitamba mu Ciuano ca Muono Uetu Vakua Kilistu na Vipanga. Vamuanetu na vandumbuetu vaco va pande ku hituluka vitume via mu Muono Uetu Vakua Kilistu na Vipanga Vietu – Mukanda ua Viuano na uno mukanda ntsimbu kanda va liviukisile mitamba yavo. Vakua ku ambulula vose va kala na kapandi ka ku linga mitamba ya vandongesi. Kaha vandongesi va Mbimbiliya navo citava va lisonekese mu sikola, nga va tava vilongesa via Mbimbiliya kaha ve ku yoya muaya vitume via Njambi. Mukuluntu ua Ciuano ca Muono Uetu Vakua Kilistu na pande ku likungulula na vose ka va puile vakua ku ambulula, vunoni va tonda ku lisonekesa mu sikola, mu ku va lomboluela via tondeka na ku va leka nga va na va tava mu sikola ni kuahi. Ndongesi na pande kuiza ku ciuano caco na mulongisi ueni ua Mbimbiliya (ni na cisemi cendi ua pua mukua ku ambulula). Vinanga via tondeka mu ku lisonekesa mu sikola, vikevio naua via tondeka mu ku pua mukua ku ambulula ua ku hona ku Mbatiza.—od kap. 8 cina. 8.

2. 1 minutu. Nkala simano, mu nima ya muaso ua katete na civundilo, ntuamena ua Ciuano ca Muono Uetu na Vipanga a pua na ku lombolola mbunga viuma vi va lilongesa mu ciuano mu ku sangumuna mpuila yavo ku ciuano. Ntuamena na pande ku tsindika cikuma ha vilongesa vi kuasa mua kama cikungulukilo.

 3. Cimpande: 10 minutu. Mutue ua cimpande na vimo vintsina vivali ni vitatu via mutamba ou vie ku iza mu Mukanda ua Viuano via Muono Uetu Vakua Kilistu na Vipanga Vietu. Eci cimpande va na pande ku ci hana kuli umo mukuluntu ni mukua ku kuasa vipanga ua vutongue. Nga mu putuka mukanda ua uha mu ku tanda Mbimbiliya, ku ka kala ku tala video ya vimpande via mu livulu liaco. Mukua ku linga uno mutamba citava a ka tumbuleko vimo mu video via litombola na cimpande ceni. Vunoni na pande ku handeka vintsina viose vili ha mukanda ua viuano. Cikuavo naua, kuliya na ntsimbu, na pande ku pangesa vikupulo, vi va pangela mu ku vueza ku vulumbunuiso vua cimpande. Citava a vuezeko vintsina vikuavo, ca kama lika nga vi kuasa ku vintsina vili ha mukanda ua viuano.

 4. Vupite vua mu Lutsilielo: 10 minutu. Ou mutamba ua vihula na vikumbululo, ka ua tondekele ku handeka mezi ku vuputukilo ni ku vumanusuilo. Ua pande ku u hana kuli umo mukuluntu ni mukua ku kuasa vipanga a tantekeya ku longesa. Kaha ikeye na pande ku linga vihula viose vivali ku mbunga. Cikuavo naua na pande ku tala nga ci tondeka ku tanda vinimbu viose vili ha vihula ni kuahi. Nkala muntu u va hangula linga a kumbulule, na pande ku lingamo mu 30 segundu ni muintsi.

 5. Ku Tanda Mbimbiliya: 4 minutu. Ou mutamba ua vandongesi va na pande ku u linga kuli umo ndongesi ua yala. Ndongesi uaco na pande lika ku tanda vinimbu vi va na mu hana, kati ku vuezako mezi a ku sokolola ni a ku soka. Ntuamena ua ciuano a ka lihakela kapandi ka ku kuasa vandongesi va tande vuino, mu cifua ci vevuisisa vakuavo, kati pateka patula, ku kanieka ha mezi a ntsindo, ku pangesa vuino lizi, ku imana haze ha tondeka, kaha mu cindambo. Mu ku linga imo mitamba ya ku tanda Mbimbiliya ya kala na vinimbu via vingi ku tuvakana ikuavo, Mukuluntu ua tala via Ciuano ca Muono Uetu na Vipanga na pande ku tala ku vuhasi vua nkala ndongesi ntsimbu kanda ha mu hane mutamba uaco.

6. 15 minutu. Ou mutamba va u viukisila ku hana ku vose vukovelelo ku liviukisila via mu ku ambulula na ku vueza ku vutongue vuavo vua ku simutuila na vantu na ku longesa. Kuliya na haze ha ci tondekela, vakuluntu navo va hasa ku tambula imo mitamba ya vandongesi. Nkala ndongesi na pande ku pangela ha cilongesa ca mu mukanda Ku Longesa ni Lemenu Vantu ci ve ku haka mu vifuiko ku ntsongo ya mutamba mu Mukanda ua Viuano. Vintsimbu vimo, ha pua na kuiza mutamba ua ku simutuila na mbunga. Mutamba uaco va na pande ku u linga kuli Mukuluntu ni mukua ku kuasa vipanga a tantekeya ku longesa.—Talenu  cinanga 15 ku tuala ha vati ve ku lingilamo mitamba ya ku simutuila na mbunga.

 7. Ku Putuka ku Simutuila: Ou mutamba citava ku u linga kuli umo ndongesi ua yala ni ua mpuevo. Mukuasi uendi ka pandele ku pua mukua vilio vieka, vunoni nga mukua vilio vieka, kaha na pande ku pua kavusoko kendi. Ndongesi na mukuasi uendi citava vemane ni va tumame.—Linga mu uane mizimbu ikuavo ku tuala ha via ku linga na cifua ca mutamba uno, taleni  vinanga 12 na  13.

 8. Mangendzi a ku Hilukila: Ou mutamba citava ku u linga kuli umo ndongesi ua yala ni ua mpuevo. Mukuasi uendi ka pandele ku pua mukua vilio vieka. (km 5/97 p. 2) Ndongesi na mukuasi uendi citava vemane ni va tumame. Ndongesi na pande ku muesa viuma vi tu hasa ku handeka nga tu linga vungendzi vuaku hilukila.—Linga mu uane mizimbu ikuavo ku tuala ha via ku linga na cifua ca mutamba uno, taleni  vinanga 12 na  13.

 9. Ku Puisa Vantu Vandongesi: Ou mutamba citava ku u linga kuli umo muanetu ni ndumbuetu. Mukuasi uendi ka pandele ku pua mukua vilio vieka. (km 5/97 p. 2) Ndongesi na mukuasi uendi citava vemane ni va tumame. Uno mutamba ua pande ku muesa cilongesa ca Mbimbiliya ci li laza na kuenda. Ngeci mukemuo, ka ua tondekele ku hakako mezi ku vuputukilo ni ku vumanusuilo. Ndongesi na pande lika ku lingamo, noho nga ali na ku pangela ha cimamuna caco. Ka citondeka ku tanda mezi ose haliho, vutuhu citava ku lingamo.

 10. Ku Lombolola vi mua Tsiliela: Nga uno mutamba u neza mu cifua ca cimpande, kaha va na pande ku u linga kuli umo muanetu. Nga co uneza mu cifua ca cimueso, kaha citava ku u hana kuli muanetu ni ndumbuetu. Mukuasi uendi ka pandele ku pua mukua vilio vieka, nga mukua vilio vieka kaha na pande ku pua kavusoko kendi. Ndongesi na pande ku kumbulula ha toma kaha na liano cihula ca mutue, mu ku pangesa mizimbu ili ha ntsina ya ku tondesesa. Ndongesi citava a tumbule ntsina ya mizimbu ya na pangesa ni kuahi, kuli ikeye vavenya lika.

 11. Cimpande: Ou mutamba ua vandongesi ua pande ku u hana kuli umo muanetu ua yala kaha na pande ku linga mu cifua ca cimpande. Nga cimpande caco va na ci tundisa ha vimpande vikuavo A mu mukanda Lemenu Vantu, kaha ndongesi na pande ku tsindika vati tu hasa ku pangesa cinimbu ni vinimbu mu lihia. Ca ku muenako, a hasa ku lombolola mua ku pangesela cinimbu caco, vi ca lombolola, na mua ku hiluilamo na muntu ku tuala ha cinimbu caco. Nga co cimpande caco ci na tundu ha cimo cilongesa ca mu mukanda Lemenu Vantu, ndongesi na pande ku tsindika mua ku pangesela cilongesa caco mu lihia. Citava a tsindike ha cimueso cili ha ntsina 1 ili ha cilongesa ni kala vinimbu vieka viliho.

   12. Via ku Linga: Mizimbu ili ha cinanga cino neci ci na hatako via likuata na mitamba “Ku Putuka ku Simutuila” na “Mangendzi a ku Hilukila”. Nga ka va tumbuilenu vimamuna vieka, ndongesi na pande ku muesa vumo vusunga vua vuasi vua mu Mbmbiliya vu litombola na muntu ya na uana, na ku seza vimbelo via casi via kua ku simutuila nendi ku lutue. Ndongesi na pande ku hangula cimpande ci li na ku hita muimbo kaha ce kuya mua kama vantu ku mitima. Kaha citava a lihanguile nga a tonda ku lekesa umo mukanda ni video ya mu Vikuata via ku Longesa Navio. Mu cihela ca ku patekela cimueso, vandongesi va na pande ku tuala mana ku vutongue vua ku simutuila ngeci mua, ku muesa seho ku muntu na ku handeka mu cindambo.

   13. Ambuluisi: Ndongesi na pande ku tombuesa ambuluisi i va na tandanga muintsi, ku cifua ca viuma muimbo lienu. Ca ku muenako:

1.  (1) Ku Ndzivo na Ndzivo: Eyi ambuluisi ya pua ya ku ndzivo na ndzivo, cipue mu ku hitangana mpundu muaya vindzivo, ku hitila mu telefone, ni ku hitila mu mikanda. Kaha na ku linga vungendzi vua ku hilukila ku muntu u tua simutuilile nendi mu ambuluisi yaco.

2.  (2) Ku Ambulula ca ku Tulukua: Eyi ambuluisi ya pua ku pangesa vuino nkala vukovelelo vu tu solokela omo tu simutuila na vantu mu ku va ambuluila. Ngeci mua, ku va lekako umo muzimbu ua mu Mbimbiliya, ambe nga tua va uana mu vipanga vietu via tangua na tangua, ku sikola, vakuetu va tua lihata navo, mu mendelo a mbunga, ni kuose-okuo ku tu na liuana navo.

3.  (3) Ku Ambuluila ca ku Mbunga: Eyi ambuluisi ya pua mu ku pangesa tuntsandia tua ku sindumuna, vimesa via mikanda, kuendela vantu ku vihela via mingoso, ku ambuluila mu vitapalo, mu vitungu via vintemo, ku vututikilo vua mendelo ni kuose-okuo kue ku kala mbunga.

 14. Ku Pangesa Vivideo na Mikanda: Ndongesi a hasa ku tsindika imo video ni mukanda. Nga mutamba uendi u tondeka video ni ikeye vavenia a tonda ku pangesa video, kaha na pande ku i simutuila na muntu, vunoni ka pandele ku i lekesa.

15. Mu nima ya muaso, ou mutamba ua 15 minutu u ka kala na mutamba umo ni ivali ya ku kuasa mbunga va mone mua ku pangesela vimamuna via mu Lizi lia Njambi. Nga ka muesi vitume vieka, eyi mitamba citava ku i hana kuli vakuluntu ni vakua ku kuasa vipanga va tantekeya ku longesa, ku tundisako mutamba Vitondeka mu Cikungulukilo, muomu va na pande ku u linga lika ku mukuluntu. Kaha nga mutamba uaco uli mu cifua ca ku simutuila na mbunga, muanetu a linga mutamba uaco na pande ku linga vihula mu mutamba uose, ku vueza ku vihula vili ha mutamba. Ka pandele ku handeka via vingi ku vuputukilo, linga a kale na ntsimbu ya ku tsindika ha vintsina via seho na ku tavesa vantu va kumbulule. Nga ha tondeka kuihula umo muntu, ci li ku lutue muanetu uaco aye vene ku mutula, kati a kumbuluile ha cituamo.

  16. Cilongesa ca Mbimbiliya mu Cikungulukilo: 30 minutu. Ou mutamba ua pande ku u hana kuli mukuluntu ua vutongue. (Nga mu cikungulukilo muli vakuluntu va vandende, mutamba uaco citava ku u hana kuli vakua ku kuasa vipanga va kala na vutongue vua ku longesa.) Civunga ca vakuluntu ca pande ku hangula veya va na fuila ku endesa Cilongesa ca Mbimbiliya mu Cikungulukilo. Vose va va hangula, va na pande ku endesa cilongesa caco na vutongue linga kati va tuvakane ha ntsimbu, vunoni va tsindike ha mikanda ya mu Mbimbiliya ili na ntsindo mu cilongesa, na ku kuasa mbunga yose va mone seho ya vimpande vi va li na ku lilongesa. Kaha va hasa ku uana vukuasi vua cili vua ku endeselamo mitamba ya vihula na vikumbululo mu ku hituluka mu vimamuna via tuhula Mukuamanda ua Cili ku tuala ha mitamba yaco. (w23.04 p. 24, cikasa) Nga vinanga vi va na hangula ku lilongesa mu simano yaco vinahu, ka ci tondeka ku lahesa cilongesa. Nga citava puenu na ku pangesa vamuanetu va ku liseza-seza mu ku endesa na ku tanda vinanga nkala simano. Nga ntuamena ua Ciuano ca Muono Uetu na Vipanga Vietu a handeka ngueni cilongesa ci tondeka ku ci linga mu vuihi kaha mukua ku endesa cilongesa ikeye na pande ku hangula mu cifua cika a hihisa cilongesa caco. A hasa ku linga vihula via vimo vinanga ca ku hona ku vi tanda.

17. 3 minutu. Ntuamena ua Ciuano ca Muono Uetu na Vipanga Vietu a ka hituluka mu vimpande via seho vi na hiti mu ciuano. Kaha na pande naua ku tumbula vimpande via simano izaho. Nga kuli ntsimbu, ntuamena a hasa ku tumbula mazina a vandongesi va simano izaho. Noho nga kuli vimamuna vieka, vunoni nga viahi, ntuamena na pande ku linga nkala mitambi ni ku tanda nkala mikanda i tondeka mu mezi a ku soka. Mizimbu ikuavo ya cikungulukilo, ngeci mua programa ya ku ambulula ni ku komba, ka ya pandele ku i lingila ha mutula, ya pande ku i haka ha cikasa ca mizimbu. Nga ntuamena a mona ngecize ka ka puisamo ku linga mitambi ni ku tanda mikanda mu Mezi a ku Soka, kaha na pande ku vundila vamuanetu vali na mitamba mu Ku Yoya Cetu Vakua Kilistu linga va tepulule ku ntsimbu ya mitamba yavo. (Talenu  vinanga 16 na  19.) Ciuano ci ka hua na muaso na civundilo.

18. Mu nima ya nkala mutamba ua vandongesi, ntuamena ua Ciuano ca Muono Uetu na Vipanga Vietu, ua kala na minutu imo ya ku va sangala na ku va mamuna kuliya na ntsina i va na va hanene ku pangela. Omo ntuamena a tumbula mutamba ua ndongesi, ka pandele ku tumbuila vua lumo cimamuna ci ali na ku pangela ndongesi. Vunoni, nga ndongesi na mane ku linga mutamba ueni, ntuamena na pande ku mu sangala amba vuose a tumbule cimamuna ci ali na ku pangela ndongesi na ku mu lekesa mu njila ya cili omo lia vika na pande ku pangela ha cimamuna caco. Citava naua a tsindike ha viuma via cimueso via mona ngueni vi kuasa ndongesi ni mbunga. Kaha mu nima ya ciuano, ni ha ntsimbu yeka, ntuamena a hasa ku hana vimamuna vieka kuli ndongesi, via mukanda Lemenu Vantu, mukanda Ku Longesa ni livulu Escola do Ministério, ambe ku tuala ha ntsina ya na kala na ku pangela ni imo yeka. Linga mu tantekeye via na pande ku linga ntuamena ua Ciuano ca Muono Uetu na Vipanga kaha na kapandi ka mukua ku mamuna, talenu  vinanga 19,  24, na  25.

19. Na umo mutamba ua pande ku lia ntsimbu uahi, ambe vene vihandeka via ntuamena ua Ciuano ca Muono Uetu na Vipanga Vietu. Vutuhu Mukanda ua Viuano ua muesa ntsimbu ya nkala mutamba, nga vintsina via seho na vi lingi laza vuino, ka ci tondeka ku lahesa mutamba mu ku puisamo lika ntsimbu. Kaha nga imo mitamba ya ciuano i tuvakana ha ntsimbu, ntuamena ua Ciuano ca Muono Uetu Vakua Kilistu na Vipanga ni mukua ku mamuna, va na pande ku kuasa vamuanetu vaco kua lika liavo. (Taleni  vinanga 24 na  25.) Ciuano cose ca pande ku ambata 1 ola na 45 minutu, tunde ha muaso ua katete ku tuala ha civundilo ca ku soka.

20. Nga kaniungi ua ku zinguluka ali na ku meneka cikungulukilo, ciuano ca pande ku enda ngue mu va muesa vene mu Mukanda ua Viuano via Muono Uetu na Vipanga Vietu, ku tundisako lika: Cilongesa ca Mbimbiliya mu Cikungulukilo, ca mu mutamba Ku Yoya Cetu Vakua Kilistu. Mu 30 minutu yaco mukemuo mua ka hanena kaniungi ua ku zinguluka cimpande ceni. Ntsimbu kanda kaniungi ua ku zinguluka a hane cimpande, ntuamena ua ciuano ca Muono Uetu na Vipanga Vietu na pande ku hituluka mu ciuano na ku tumbula vimo vimpande via simano izaho, na ku linga nkala mitambi ni ku tanda mikanda i tondeka amba vuose a lania kaniungi ua ku zinguluka. Mu nima ya cimpande ceni, kaniungi ua ku zinguluka, a ka soka ciuano na muaso ua na lihanguila ivene. Citava a lanie umo muanetu ueka a ku linge civundilo ca ku soka. Mu simano ya kaniungi ua ku zinguluka, Ka kua pandele ku kala visikola via ku kuasa. Nga cikungulukilo ca kala na civunga ca lilimi lieka, civunga caco ca pande ku tualelelaho ku likungulula ambe nga kaniungi ua ku zinguluka a li na ku meneka cikungulukilo ca tala civunga caco. Vunoni civunga caco ca pande ku likungulula hamo na cikungulukilo mu ku ivua cimpande ca vipanga ca kaniungi ua ku zinguluka.

21. Mu simano ya ciuano ca limbo ni ca muhato, ka kue ku kala viuano via cikungulukilo. Mua pande ku vuluisa cikungulukilo ngecize, vimpande via mu simano yaco via pande ku lilongesavio mu vulika ni mu vusoko.

22. Mulalelo u kalako mu kati ka simano, kaha ka ku ka kala ciuano ca Muono Uetu na Vipanga.

23. Mukuluntu u va hangula ku civunga ca vakuluntu, ikeye a ka pua ntuamena ua Ciuano ca Muono Uetu na Vipanga. Cipanga ceni ci ka pua ku linga cose linga ciuano ca Muono Uetu ci pue na kuenda mua cili kaha muaya vino vitume. Nga Mukanda ua Viuano u neza, mukuluntu ua Ciuano ca Muono Uetu na Vipanga Vietu na pande ku tepela mitamba ya vingonde viose vivali vilimo ku vandongesi. Eci ca ambatesela kumo na mitamba ya vandongesi na ize kati ya vandongesi, kaha na vantuamena va ciuano ca mukati ka simano va va tavesa ku civunga ca vakuluntu. (Talenu  vinanga 3-16 na  24.) Mu ku hana mitamba yaco na pande ku singanieka ha citso, vutongue, na ku tala nga muntu uaco a ka livua vene ku zituka mu ku handeka ha cimpande caco. Kaha na pande ku lingamo, mu ku tepela mitamba yeka, kati ya vandongesi lika. Mitamba yose ya vandongesi ya pande ku i tepela ku vandongesi nga kua lisupu vimo visimano vitatu ku litangua lia ka linga muntu mutamba uendi. Mitamba yaco ya pande ku i tepela ku hitila mu lipapelo Mutamba ua mu Ciuano Cetu Vakua Kilistu na Vipanga Vietu (S-89). Mukuluntu ua Ciuano ca Muono Uetu na Vipanga na pande ku linga cose linga programa ya vandongesi i kale ha cikasa ca mizimbu. Civunga ca vakuluntu ci hasa ku hangula umo mukuluntu ueka ni mukua ku kuasa vipanga linga a pue mukuasi ueni. Vunoni cipanga ca ku hangula veya va ka linga mitamba ka ya puile ya vandongesi, va na pande ku ci linga lika ku mukuluntu.

24. Nkala simano umo mukuluntu na pande ku pua ntuamena ua ciuano ca Muono Uetu na Vipanga Vietu. (Nga mu cikungulukilo muli vakuluntu va vandende, mutamba uaco citava ku u hana kuli mukua ku kuasa vipanga ua kala na vutongue vua ku longesa.) Cipanga ceni ku liviukisila mezi a ku sokolola na a ku soka. Ikeye naua ue ku lania vakua ku linga mitamba, kaha nga cikungulukilo ci li na vakuluntu va vandende, citava neni a linge imo mitamba, cikuma-kuma ize ye ku tondeka lika ku muesa video ku mbunga ca ku hona ku simutuilaho. Ka pandele ku handeka via vingi cikuma ku tunda mu mutamba umo kuya ku ukuavo. Civunga ca vakuluntu ci ka hangula vakuluntu vaze va hasa ku puisamo eci cipanga. Kaha vakuluntu vaco, vakevo va pua na kuendesa ciuano caco mu ku lisintsa-sintsa. Kaha kuliya na cifua ci vie ku endelamo viuma mu cikungulukilo cenu, citava Mukuluntu ua Ciuano ca Muono Uetu na Vipanga a pue na ku linga vuntuamena vintsimbu via vingi ku hiana vakuavo vakuluntu. Nga mukuluntu a hasa kuendesa vuino Cilongesa ca Mbimbiliya mu Cikungulukilo, kaha citava a hasa ku pua ntuamena ua ciuano. Vunoni vulukenu ngecize, vakuluntu vose va va ka hangula ku pua vantuamena, va na pande ku ka sangala na ku mamuna na cilemo vandongesi va li na mitamba. Kaha va pande naua ku linga cose linga ciuano ci hue ha ntsimbu yaco. (Talenu  vinanga 17 na  19.) Nga ntuamena a tonda kaha kuli cihela, citava a kale na mikrofone ya ku imika ku mukulo ua mutula linga a pue na ku lanienaho vakua ku linga mitamba ntsimbu vakevo veza ha mutula. Kaha ntuamena citava a tumame ku imo mesa ha mutula mu mutamba ua ku Tanda Mbimbiliya ni mu mitamba ya mu Tualenu ku Lutue Cipanga Cenu ca ku Ambulula. Ku lingamo ci hasa ku niunga ntsimbu.

25. Nga citava, ca cili ku hangula mukuluntu ua kala na vutongue mu ku hana vimpande linga a linge eci cipanga. Cipanga ca mukua ku mamuna ca pua ku mamuna vakuluntu na vakua ku kuasa vipanga ku tuala ha vimpande viavo, ngeci mua mitamba ya mu Ciuano ca Muono Uetu na Vipanga Vietu, vimpande via mbunga, na ku endesa ni ku tanda Vutala vua Kaniungi ni Cilongesa ca Mbimbiliya mu Cikungulukilo. (Talenu  cinanga 19.) Nga mu cikungulukilo muli vakuluntu va kala na vutongue vua ku handeka na ku longesa, kaha muaka ku muaka citava ku hangula mukua ku mamuna ueka. Ka ci tondeka ku mamuna vamuanetu mu mitamba yose i va linga.

26. Kuliya na numelu ya vandongesi, cikungulukilo ci hasa ku kala na hondo yeka ya ku hitisilamo mitamba ya vandongesi. Nkala sikola i hitila mu hondo yeka ya pande ku kala na mukua ku mamuna ua vutongue, ca cili nga mukuluntu. Nga ci tondeka, mukua ku kuasa vipanga ua vutongue a hasa ku linga cipanga caco. Civunga ca vakuluntu ca pande ku hangula iya na pande ku linga eci cipanga nga ci tondeka ku pua na ku hana cipanga caco ku muntu ueka ni kuahi. Mukua ku mamuna na pande ku kava vi li ha  cinanga 18. Nga kuli sikola ya ku kuasa, mua pande ku leka vandongesi vaye mu hondo yaco, mu nima ya mutamba Vupite vua mu Lutsilielo. Kaha va na pande ku hiluka mu mbunga mu nima ya mutamba ua ku manusuila ua vandongesi.

27. Kuli vimo vivideo vi ve ku hangula ku vi tala mu cino ciuano. Vivideo via ciuano ca mu kati ka simano vie ku soloka mu aplikativu JW Library® kaha citava ku vi uana na vitelefone, vikomputador, vitablet ni makina akuavo.

© 2023 Watch Tower Bible and Tract Society of Pennsylvania

S-38-NGL 11/23