1-3. (a) Vati Vakua Kilistu ve ku muesa ngecize ve ku ivua mpuila ya ku kunguluka? (Talenu cikupulo ca ku vuputukilo.) (b) Vika tu ka lilongesa mu cilongesa cino?

CORINNA mua kele na miaka 17, va naye va va kuatele na ku va tuma ku kamenga ka vipanga via kayando. Ku lutue lua ntsimbu Corinna neni va mu kuatele na ku mu tuala naua ku cihela ca ku laako ku Siberia. Ua ka pangelele ku mehia, kaha va mu tengele ngue ndungo. Vintsimbu vimo va mu kakatelele ku pangela mu lisika lia ku tontola cikuma ca ku hona vuzalo vua lisika. Corinna na umo muanaye ua mpuevo va likuminyine nguavo tangua va tuhuka ku mehia aco, na ku ya ku viuano via cikungulukilo.

² Corinna ngueni: “Tua katukile cinguezi hembo kaha tuendele vikilometro 25 na ku vutulilo vua kumboyo. Kaha kumboyo ya katukile 2:00 ku vandemba, tuendele mu kumboyo viola via ku pua 6 tua suluka. Kaha tua kendele naua vikilometro 10 linga tu ka hete ku cihela ku tua kele na ku likunguluila.” Corinna ua vuile ndzolela ya kama omo lia vungendzi vua lingile. Ngeci ua handekele ngueni: “Tua ka lilongesele Vutala  vua Kaniungi na ku imba miaso ya Vuangana ku ciuano. Ca tu kaniamesele cikuma mu lutsilielo.” Ava vamuanetu va vampuevo vavali, va ka hilukilemo mu nima ya matangua atatu, vunoni ivenia mehia ka tantekeyele ngecize va tuhukile.

³ Vantu va Yehova fumeko va lema ku kala hamo. Ca ku muenako, Vakua Kilistu va ku sekulu ya ku livanga va kele na ntsintsa ya ku likungulula mu ku lemesa Yehova na ku lilongesa vieni. (Vilinga 2:42) Mua vusunga, nenu mua lema ku ya mu ku likungulula. Vunoni halumo ci hasa ku mi kaluuila ku kala hamo na vamuanoko na ku likungulula ku sua kumo. Halumo mue ku panga viola via vingi, ni halumo mue ku kala na vipanga via vingi ni mue ku ivua ku hona ntsimbu yose. Kaha, vika vi hasa ku tu kuasa ku linga cose mangana tu hase ku ya mu ku likungulula? ^[1] (Talenu mezi a kuintsi.) Vati tu hasa ku kaniamesa vaze ve ku lilongesa netu Mbimbiliya na vantu vakuavo veze mu ku likungulula ntsimbu yose? Cilongesa cino ci ka lombolola omo lia vika ku likungulula ca puila (1) ca cili kuli yetu, (2) ce ku kuasa vakuetu, na (3) ku sangaziala Yehova. ^[2]—Talenu mezi a kuintsi.

4 Vati ku likunguluila hamo ce ku tu kuasa ku lilongesa via Yehova?

⁴ Viuano vie ku tu longesa. Nkala ku likungulula ce ku tu kuasa ku lilongesa via vingi ku tuala hali Yehova. Ca ku muenako, cingi ca vikungulukilo va na lilongesele livulu (Draw Close to Jehovah) Achegue-se a Jeová mu Cilongesa ca Mbimbiliya mu Cikungulukilo. Vati mua vuile mu mua lilongesele vifua via Yehova, na ku ivua vati vamuanoko ve ku ivua ku tuala hali ikeye? Mua vusunga eci ca mi lingisile ku lema Yehova cikuma. Ku viuano, tue ku lilongesa naua via vingi mu ku halakana ku vimpande via Mbimbiliya, vimueso na ku tanda ca Mbimbiliya. (Nehemiya 8:8) Aci singaniekenu ha viuma vi tue ku lilongesa nkala simano mu tue ku liviukisila ku tanda ca Mbimbiliya na ku ivua vakuetu va handeka vi va na lilongesaho.

5. Vati viuano via mi kuasa ku pangesa vi mue ku lilongesa mu Mbimbiliya na ku vueza ku vutongue vuenu vua ku ambulula?

⁵ Viuano vietu, vie ku tu longesa ku pangesa viuma vi tue ku lilongesa mu Mbimbiliya mu muono. (1 Tesalonika 4:9, 10) Ca ku muenako, mua likungulula laza ku Cilongesa ca Vutala vua Kaniungi ca mi lingisile ku tonda ku vueza ku vipanga vienu kuli Yehova, na ku vueze ku vutongue vua vivundilo vienu, ni cipue ku ecela umo muanetu ua mi vulumuinine ni? Ku likungulula ci tue ku kala naco mu kati ka simano ce ku tu longesa vati tua pande ku ambulula muzimbu ua cili na vati tua pande ku kuasa vakuetu vevuisise vusunga vua mu Mbimbiliya.—Mateo 28:19, 20.

6. Vati vikungulukilo vietu vie ku tu kaniamesa na ku tu kolesa?

⁶ Ku likungulula ce ku tu kaniamesa. Mavu a Satana eku seteka ku zeyesa lutsilielo  luetu na ku tu lingisa ku hilukila ku nima. Vunoni ku likungulula ce ku tu kaniamesa na ku tu kolesa ku tualelelaho ku pangela Yehova. (Tandenu Vilinga 15:30-32.) Tue ku lilongesa vati vupolofeto vua mu Mbimbiliya vu li na ku lipuisamo. Eci ci hasa ku tu kuasa ku kala na vusunga mpundu ngecize, vikulaheso via Yehova vi ka lipuisamo ku lutue. Vamuanetu kave ku tu kaniamesa lika nga va hana vimpande, vunoni naua nga va kumbulula na ku sangaziala Yehova mu kuimba miaso na mutima uose. (1 Kolintu 14:26) Mu tue ku simutuila na vamuanetu ha ku kovela ni ha ku tuhuka mu cikungulukilo, tue ku viukilila muomu tua kala na vavusamba va tu haka seho mpundu.—1 Kolintu 16:17, 18.

7. Vika ca puila ca seho ku ya mu ku likungulula?

⁷ Ku viuano tue ku tambula vukuasi vua sipilitu santu ya Njambi. Yesu ue ku pangesa sipilitu santu mu ku tuamenena vikungulukilo. Mua vusunga, ua tu leka ngueni tua pande ku ivua vi ili na ku “handeka sipilitu na zimbunga” ni nguetu vikungulukilo. (Ku-Solola 2:7) Sipilitu santu ye ku tu kuasa ku viana vieseko na ku ambulula na ntuima yose. Ye ku tu kuasa naua ku linga vutumbe vua cili. Ngeci mukemuo, tu lingenu cose tu pue na ku likungulula na ku tambula sipilitu santu ya Njambi.

8. Vukuasi vuka ve ku uana vamuanetu nga va tu mona tu imba na ku kumbulula ku viuano vietu? (Talenu cikasa “Ntsimbu Yose ue ku Ivua mua Cili mu Nima ya ku Likungulula.”)

⁸ bKu viuano vietu, tue ku uana vukovelelo vua ku muesa ngecize tua lema vamuanetu. Cingi ca vamuanetu va na kolesa mu vitanga via kama. Kapostolo Paulu ua sonekele ngueni: “Tu liyongolienu ha kati ketu.” (VaHevelu 10:24, 25) Tu ka muesa ngecize tua haka seho vamuanetu mu ku likungulula na kuli kaniamesa umo na mukuavo. Omo tu ya mu ku likungulula tu ka muesa ngecize tu tonda ku kala hamo navo na ku simutuila navo, kaha tua va haka seho. Kaha naua tue ku va kaniamesa nga vevua vikumbululo vietu na ku kuimba miaso na mutima uose.—Kolose 3:16.

9, 10. (a) Lombololenu vati mezi a Yesu ku Yoano 10:16 a tu kuasa ku ivuisisa seho ya ku likungulula hamo na vamuanetu. (b) Vati tu hasa ku kuasa muntu u va viana va vusoko veni nga tu kunguluka ntsimbu yose?

 ⁹ Mu ku ya mu ku kunguluka, tue ku kuasa cikungulukilo ku likata kumo. (Tandenu Yoano 10:16.) Yesu ua li setekesele ku kaniungi kaha vakua ku mu kava ku vutanga vua vampanga. Aci singaniekenu mu njila eyi: Nga vampanga vavali vali ku mukinia ni nguetu lilundu, vakuavo vavali vali mu cimbongo, kaha umo ali kua likalieni, vuno vose vatanu va ka pua vutanga vumo lika ni? Houe, muomu vutanga vue ku kala hamo lika na ku kava kaniungi. Na vuno vene, ka tua pandele ku sondoloka ku vamuanetu mu ku hona ku iza mu ku likungulula. Tua pande ku likungulula hamo tu pue mutamba ua “vutanga vumo” na ku kava “kaniungi umo” lika.

¹⁰ Viuano vietu vie ku tu kuasa ku pangela hamo mu ku pua vusoko vua cilemo. (Visamo 133:1) Vamo mu cikungulukilo va vusoko vavo va viana, cikumakuma visemi ni vamuanaye va ku ndzivo. Vunoni Yesu ua va kulahesa vusoko vu ka va lema na ku va tala vuino. (Mako 10:29, 30) Nga mu likungulula ku ntsimbu yose, mu ka pua cisemi ua yala, cisemi ua mpuevo, muanaye ua yala ni ua mpuevo ku umo mu cikungulukilo. Nga tu singaniekaho vuino, tu tonda ku linga cose linga tu pue na ku kala ku viuano viose.

11. Vati ku ya mu ku likungulula ce ku tu kuasa ku hana Yehova vize via mu pande?

¹¹ Ku viuano, tue ku hana Yehova vize via mu pande. Mu ku pua Sakatanga uetu, tua pande ku mu santsela, ku singimika na  ku mu sangaziala. (Tandenu Ku-Solola 7:12.) Tu hasa ku linga evi omo tu vundila kuli Yehova, nga tu mu imbila miaso na ku handeka vieni mu ku likungulula. Eci ca pua ku vezika ca kama ci tua kala naco simano ku simano mu ku lemesa Yehova!

12. Vati Yehova ue ku livua ngua tu ononoka lisiko lieni lia ku ya mu ku kunguluka ntsimbu yose?

¹² Yehova ikeye ua tu tanga, kaha tua pande ku mu ononoka. Ua tu sika ku likungulula hamo, cikumakuma omo ku ku kotoka cili ha hiehi. Yehova a kevua ndzolela, nga tu ononoka lisiko lieni. (1 Yoano 3:22) A tantekeya ngecize tu tonda mpundu ku ka likungulula, kaha ua haka seho ku kapandi ka tue ku lihakela ku ka solokako.—VaHevelu 6:10.

13, 14. Vati tue ku suena mu hiehi kuli Yehova na Yesu mu ku likungulula?

¹³ Nga tu ya mu ku likungulula, tue ku muesa Yehova ngecize tu tonda ku suena mu hiehi neni na Muaneni. Mu ku likungulula, tue ku lilongesa Mbimbiliya kaha Yehova ue ku tu longesa vi tua pande ku linga na vati tua pande ku yoya. (Isaya 30:20, 21) Ambe vaze ka ve pangela Yehova nga veza mu ku likungulula, ve ku mona ngecize Njambi ali na ku tu niunga. (1 Kolintu 14:23-25) Yehova ali na ku tuamenena ku likungulula cetu na sipilitu santu yeni, kaha vi tue ku lilongesako viose vie ku tunda kuli ikeye. Ngeci mukemuo nga tu ya mu kulikungulula, tue ku halakana vie ku handeka Yehova, tue ku mona ngecize ua tu lema cikuma, kaha tue ku suena mu hiehi neni.

¹⁴ Yesu mu ku pua Mutue ua cikungulukilo ua handekele ngueni: “Ku li vavali cipue vatatu va na kunguluka mu lizina liange, ange nji li ha kati kavo.” (Mateo 18:20) Mbimbiliya naua nguayo Yesu ali na ku “enda ha kati” ka vikungulukilo. (Ku-Solola 1:20–2:1) Mua vusunga, Yehova na Yesu vali netu, kaha vali na ku tu kaniamesa ku viuano vietu. Mu ku singanieka cenu, vati Yehova ue ku ivua mue ku mona kapandi ka mue ku lihakela ka ku suena mu hiehi neni na Muaneni?

15. Vati ku ya mu ku likungulula ce ku muesa Njambi ngecize tua tonda ku mu ononoka?

¹⁵ Nga tu ya mu ku kunguluka, tu muesa Yehova ngecize tua tonda ku mu ononoka. Yehova ke ku tu kakateya ku linga vie ku tu leka. (Isaya 43:23) Ngeci mukemuo, mu tue ku hangula ku mu ononoka, mu ku ya mu ku kunguluka tue ku muesa ngecize tua mu lema na ku tsiliela ngecize ali na mpoko ya ku tu leka vi tua pande ku linga. (Loma 6:17) Ca ku muenako, vati tu ka linga nga muntu u tue ku pangela a tonda tu pange ntsimbu ya kama ize ika tu lingisa ku honoua ku likungulula ntsimbu yose? Halumo nguvulu i hasa ku handeka nguayo, uose a ya mu ku likungulula na ku lemesa Yehova, na pande ku fueta muluta, ni ku ya mu kamenga ni a tambula kasitiku ka kama. Ni halumo vintsimbu vimo tu hasa ku hangula ku linga viuma vieka ca ku hona ku ya mu ku likungulula. Mu nkala visoti via cifua eci,  tua pande ku hangula vi tu ka linga. (Vilinga 5:29) Vunoni nkala ntsimbu i tue ku hangula ku ononoka Yehova, ye ku mu vuisa ndzolela.—Visimo 27:11.

16, 17. (a) Vati tua tantekeya nguetu Vakua Kilistu va ku livanga va hakele seho ya kama ku ku lingulula? (b) Vati muanetu George Gangas ua livuile ku tuala ha ku likungulula ca Vakua Kilistu?

¹⁶ Mu nima ya ku likungulula ha Pentecosta ya muaka ua 33, Vakua Kilistu va kele na ku likungulula ntsimbu yose mu ku lemesa Yehova. Va “kakatelele na ntsintsa ku luhande lua vapostolo na ku likata navo.” (Vilinga 2:42) Vutuhu va hitile mu visoti via vingi ngeci mua ku va yandesa ku nguvulu ya Loma na ku vakuluntu va malombelo a va Yundeu, kasi ka va likelele ku likungulula. Vutuhu ka ca puile ca casi, va lingile cose mu ku tualelelaho ku likungulula.

¹⁷ Na lelo lino vangamba va Yehova ve ku viukilila na ku ivua ndzolela ya ku likungulula. Muanetu George Gangas, umo ua puile mukua Civunga ca Vantuamena miaka i tuvakana 22, ua handekele ngueni: “Kuli ange, ku likungulula na vamuanetu cikeco ca hiana seho cikuma mu muono, kaha ca pua ndundzi ya kuli kaniamesa. Nja lema ku kala ku Ndzivo ya Vuangana ha kati ka vaze ve ku livanga, kaha na ha kati ka vaze ve ku sulumuina ku tundako. Nje ku ivua ndzolela ya mu ntima nga nji handeka na vantu va Njambi. Mu nje ku kala ha kati kavo, nje ku ivua ngue nji li kuimbo na vavusoko vange mu ciyulo ce ku hana Njambi vantu veni.” Ua vuezeleko ngueni: “Visinganieka na vizango viange via pua ku ya mu ku likungulula.”

18. Vati mue ku livua ku tuala ha ku likungulula cetu, kaha kapandi kaka mu na lihakela?

¹⁸ Nenu mue ku ivua ngoco mu ku lemesa Yehova ni? Nga mukemuo, tualelelenuho ku linga cose mu ka kale hamo na vamuanoko mu ku likungulula, ambe nga ca cikalu. Muesenu Yehova ngecize mue ku ivua ngeci mua Muangana Ndaviti ua handekele ngueni: “Yehova, nji lema vukalo vua ndzivo yove.”—Visamo 26:8.