KU AMBULULA cetu ca kala na seho ya kama. Vunoni kati uose u tue ku ambuluila vie ku mu lomboloka. Vutuhu nga vantu va haka seho ku viuma vi ya handeka Mbimbiliya, vintsimbu viose ve ku livua ngecize ka ci tondeka va lilongese netu Lizi lia Njambi.

Aci singaniekenu ha lungano lua Gavin. Ua kele na ku ya mu ku kunguluka ku Ndzivo ya Vuangana, vunoni ka tondele ku lilongesa Mbimbiliya. Gavin ua lomboluele ngecize, ua tantekeyele viuma via vindende lika ku tuala ha Mbimbiliya, kaha ka tondele vakuavo va vi tantekeye. Ua kele na vuoma vua ku mu lania ku kovela mu vulombelo, kaha ka tondele va mu tenge ciheve. Aci singaniekenuho? Ca puile ca casi ku kuasa Gavin? Singaniekenu ha ku vezika ca hasa ku uana muntu mu ku lilongesa Mbimbiliya. Yehova ua lekele vaIsaleli ngueni: “Cihandeka cange ci ka sontsa ngue mume, ngue mema a mbakela ha muila ua uvotsi.” (Ndeutelonomi 31:19, 30; 32:2) Tu ci lilongesenu vimo ku tuala ha mume, kaha na ku u setekesa na ku ambulula cetu linga tu hase ku kuasa “vantu vose.”—1 Timoteo 2:3, 4.

Mume ue ku kuasa. Mume ua pua mema eku likunguiya hamo mu mpundzi mu ku pua mandose a mema. Vati mezi a Yehova a sontsele “ngue mume”? Muomu ua handekele na vantu veni na ngozi, ku konkama na ku va tuamenena. Tu ka tambuluisa lungano lua Njambi nga tu singimika vantu na vize vi va tava laza. Tu ka va kaniamesa ku lihilula vavene na ku linga vutumbe vuavo. Nga tu muesa cifua eci ku vantu ve ku tava ku cizango vi tue ku handeka, kaha ku ambulula cetu ci ka va kuasa.

Mume ue ku tontuesa. Ngeci mua mume ku ambulula cetu ci hasa ku kuasa vakuetu nga tu singanieka ha vinjila via ku liseza-seza via ku va kuaselamo ku lilongesa vusunga. Muanetu Chris, mua lilongesele Mbimbiliya na Gavin, ka mu kakateyele ku tava vusunga. Vunoni ua tondele vinjila via ku kuaselamo Gavin ku pua ua ku zituka mu ku lilongesa Mbimbiliya. Chris ua handekele na Gavin ngueni mu Mbimbiliya yose mua kala muzimbu ua seho ya kama, kaha ku lilongesa muzimbu uaco ci ka mu kuasa ku ivuisisa vuino ku likungulula. Chris ua lomboluele vupolofeto vua mu lingisile ku tava ngueni Mbimbiliya ya pua ya vusunga. Va simutuilile via vingi ku tuala ha vati vupolofeto vua vuingi vua lipuisilemo. Ku simutuila caco ca kuasele Gavin, kaha ua tavele ku lilongesa Mbimbiliya.

Mume ua kala na seho ku muono. Ku Isaleli mu ntsimbu ya tondue, vingonde vimo niondzi ka ya kele na ku noka. Ca ku hona mume visoka viomine na ku tsa. Yehova ua tu leka ngueni matangua etu, a ka fua ngue kua hita cilanga, ngecize vantu va kevua mpuila ya ku “ivua mezi a Yehova.” (Amose 8:11) Ua kulahesele ngecize va ku vuavesa va ka pua “ngue mume ua ku fuma kuli Yehova” omo va na ambulula muzimbu ua cili ua Vuangana hamo lika na “vampanga veka.” (Mika 5:7; Yoano 10:16) Muzimbu u tue ku ambulula ua pua vuana vua ku tunda kuli Yehova mu ku hana muono ku vose vali na mpuila ya vusunga. Vuno muzimbu uaco tua u haka seho ni?

Mume ua pua civezikiso ca ku tunda kuli Yehova. (Ndeutelonomi 33:13) Ku ambulula cetu ci hasa ku pua civezikiso ni vuana kuli vaze ve ku tava. Cilongesa ca Mbimbiliya ca puile civezikiso kuli Gavin muomu ca mu kuasele ku uana vikumbululo via vihula vose via kele navio. Ua kolele vuasi mu lutsilielo na ku mu mbatiza, kaha vuovuno ali na ndzolela ya ku ambulula muzimbu ua cili ua Vuangana hamo lika na mpueyeni, Joyce.

Mu ku setekesa ku ambulula cetu na mume ci ka tu kuasa ku tantekeya ngecize kapandi ka tue ku li hakela ka ku ambulula ka pua ka seho ya kama. Mu njila ika? Ngeci mua lindose lia mema nga ha likalialio lie ku kuasa kavundende lika, vunoni nga makulukazi a makulukazi a mandose a mume eku zulisa livu. Mu njila eyi vene, vi tu hasa ku linga mu ku ambulula tu hasa ku vi mona ku pua via vindende ku lietu. Vunoni ku pandakana kapandi ka makulukazi na makulukazi a vangamba va Yehova, ce ku hana vukaleho ku vakua “vifuti viose.” (Mateo 24:14) Vuno ku ambulula cetu cika pua civezikiso ca kuli Yehova ku vakuetu ni? Eyo, muomu muzimbu uetu u ka pua ngue mume, ue ku kuasa, ue ku tontuesa, kaha ua pua ua seho ku muono!