CIMPANDE CA HELU | VIKA TUA PANDE KU PUILA VAKUA VUSUNGA?
Ku pua Mukua Vusunga ca Hita ni?
Hitoshi ua kele na ku pangela ku seketa ya empreza imo ku Japão. Mu va kele na ku hituluka mu vikonda via vimbongo hamo na mukuluntu ua vipanga, ou mukuluntu uaco ua lekele Hitoshi a soneke muzimbu ua makuli. Vunoni Hitoshi ka tavele, ua mu lekele ngueni mutima ueni ka u mu tavesa ku linga cipanga ca makuli. Ngeci mukuluntu ua mu lunguile ngueni nga ka tava va mu fumisa ha vipanga, kaha mu nima yaco va mu tundisile ha cipanga.
Mu vingonde via hateleko, Hitoshi uomine mutima nga naua tangua a ka uana cipanga. Kaha mua kele na ku lingila ku kovela ha cipanga ceka, Hitoshi ua handekele ngueni ke ku tava ku onga ha vipanga. Ou ua kele na ku mu ihula ua komokele ngueni, “Yove visinganieka viove via lifuila!” Vavusoko na va vusamba va Hitoshi va mu kaniamesele a tualeleleho ku pua mukua vusunga, vunoni kasi ua kele na vimo vimpata. Ngeci ua handekele ngueni, “Ka nja tsilielele nguange ku pua mukua vusunga tangua ci ka nji kuasa.”
Via lihitile navio Hitoshi vi tu vuluisa ngecize lelo lino kati vose va tonda ku pua vakua vusunga. Cikumakuma ku vakua mingoso ve ku mona ngue ku onga ce ku kuasa. Umo mpuevo ua pangela ku Africa do sul ngueni, “Nja kala ha kati ka vantu va ku hona vusunga, ntsimbu imo nje ku ivua ntsindiye ya kama ya ku tonda ku va tambuluisa.”
Ku hona vusunga ca lana cikuma matangua ano, ku onga. Mu miaka ya ku nima, Feldman umo yala ua ku Universidade, mu ku tondesesa ceni ua uanene ngecize, cingi ca vantu ka va hasa ku handeka 10 minutu ca ku hona ku onga. Ou yala uaco ngueni, “muzimbu uaco u komouesa, ka tua tantekeyele nguetu nkuma ku onga ca pua cuma ca tangua na tangua mu muono ua vantu.” Vutuhu vantu va vengi va zinda ku vonga, vunoni kasi ku onga ce ku tualelelaho.
Omo lia vika ku onga, ku punda, na vifua vikuavo via vuhenge via tsimana cikuma? Vati ku hona vusunga ce ku pihisa vantu? Kaha vati tu hasa ku viana evi vilinga via ku hona vusunga?
