1, 2. (a) ‘Vuana ka vu tava ku vu lombolola’ vua ambatela kumo na vika? (b) Vihula vika tu ka lilongesa?

YEHOVA ua tu muesa cilemo ceni mu ku tu hana vuana vua seho ya kama cikuma. Ua tumine muaneni Yesu ha mavu! (Yoano 3:16; 1 Yoano 4:9, 10) Kapostolo Paulu ua tumbuile ngueni ovu vua pua ‘vuana ka vu tava ku vu lombolola.’ (2 Kolintu 9:15) Omo lia vika ua handekele aa mezi?

² Paulu ua tantekeyele ngecize cikombelo ca Yesu ca pua vusunga vu muesa ngecize viose via likuminia Njambi vi ka lipuisamo. (Tandenu 2 Kolintu 1:20.) Eci ca lomboloka ngecize ovu ‘vuana ka vu tava ku vu lombolola,’ vua ambatela kumo na cikombelo ca Yesu hamo na vucili vuose na cilemo ce ku tu muesa Yehova. Ovu vuana vuaco ca cikalu ku vu ivuisisa vuino. Vuana vua seho ya cifua eci vua pande ku tu vuisa vati? Ovu vuana vuaco vua pande ku tu sindiya ku  linga vika, omo tu liviukisila Mulalelo ua kutsa ca Kilistu lia mu Citatu 23 ya Março 2016?

3, 4. (a) Vati mue ku ivua nga va mi hana vuana? (b) Vati vuana vua seho ya kama vu hasa ku alulula muono uenu?

³ Tue ku ivua ndzolela ya kama nga va tu hana vuana. Vunoni hamo tue ku tambula vuana vua seho ya kama cikuma, vuze vu hasa ku alulula muono uetu. Aci Singaniekenu nga mua vulumuna mulonga ua kama. Kaha mua pande kutsa omo lia mulonga uaco. Kaha mu tungumuke ni mu hevuluke, kua mi solokela muntu umo a litavela ku lituika mulonga uenu. A tava ku mu tsiha omo lienu! Vati mu ka livua?

⁴ Mua vusunga, cilemo ca na mi muesa muntu uaco ci ka mi lingisa ku alulula mu muono uenu. Eci ci ka mi sindiya naua ku pua vakua vuhuanga na ku muesa cilemo na ku ecela nkala muntu na mi vulumuina. Mua vusunga, mu muono uenu uose mu ka muesa ngecize mua haka seho ku cilemo ci va mi muesele.

5. Omo lia vika vuana vua Njambi vua ku tu kula vua kala na seho ku hiana nkala vuana?

⁵ Vuana vua Njambi vua ku tu kula vuli na seho ya kama ku hiana vuze vu li mu cimueso. (1 Petulu 3:18) Aci singaniekenu: Tu vose tua suana vupi kuli Andama, ngeci tua pande kutsa omo lia vupi vueni. (Loma 5:12) Vunoni Yehova ku cilemo ceni ua tumine Yesu a ku tsile vantu vose, linga “a makele ku-tsa omo vose.” (VaHevelu 2:9) Eci cikombelo ca Yesu ci ka neha naua vivezikiso via vingi! Na kutsa ka ci ka kalako naua. (Isaya 25:7, 8; 1 Kolintu 15:22, 26) Vose ve ku muesa lutsilielo muli Yesu va ka yoya mu ndzolela miaka yose, ku li vamo va ka sika hamo na Kilistu muilu na vaze va ka suana ha mavu mu ku sika ca Vuangana vua Njambi. (Loma 6:23; Ku-Solola 5:9, 10) Vivezikiso vika vikuavo tu ka tambula omo lia vuana vua Yehova?

6. (a) Vivezikiso vika via kulahesa Yehova mua lavelela? (b) Tumbulenu viuma vitatu vi tua pande ku linga omo lia vuana vua Njambi.

⁶ Omo lia vuana vua Njambi mavu ose a ka pua palandaizi, vakua ku vavala va ka kanguka, kaha vatsi va ka sanguka. (Isaya 33:24; 35:5, 6; Yoano 5:28, 29) Tua lema Yehova na muaneni mu ku tu hana ‘vuana ka tu hasa ku vu lombolola.’ Ovu vuana vuaco vua pande ku tu sindiya ku linga vika? Vua pande ku tu sindiya (1) ku tambuluisa Yesu Kilistu, (2) ku lema vamuanetu na (3) ku ecela vamuanetu ku fuminina ku mutima.

7, 8. Cilemo ca Kilistu ca pande ku tu vuisa vika, kaha ca pande ku tu sindiya ku linga vika?

⁷ Ca ku livanga, tua pande ku ivua cizango ca ku yoya mu njila ya lema Yesu. Kapostolo Paulu ua handekele ngueni: “Cilemo ca Kilistu ci li na ku tu sindiya.” (Tandenu 2 Kolintu 5:14, 15.) Paulu ua tantekeyele ngecize nga tu tava cilemo ca kama ca Yesu, ci ka tu sindiya ku mu lema na ku mu ononoka. Mua vusunga nga tu ivuisisa vuino via tu pangela Yehova, cilemo ceni ci ka tu sindiya ku yoya mu njila ya ya Yesu ku mutima. Vati tu hasa ku lingamo?

⁸ Ku lema Yehova ci ka tu sindiya ku tambuluisa vuino Yesu, na ku kava lungano lueni. (1 Petulu 2:21; 1 Yoano 2:6) Nga tu ononoka Njambi na Kilistu, tu ka muesa ngecize tua va lema. Yesu ua handekele ngueni: “Ou ali na mezi ange, a lisiko kaha a  a niunga, ikeye vene a nji lema: nou a nji lema, kaha nji ka lisolola ange ivene kuli ikeye.”—Yoano 14:21; 1 Yoano 5:3.

9. Ntsindiye ika tue ku lua nayo?

⁹ Ku ntsimbu ya ku vuluka kutsa ca Yesu, tua pande ku hilula vati tuli na ku pangesa muono uetu. Lihulenu nguenu: ‘Mu vinjila vika nja sua laza ku tambuluisa Yesu? Ha vifua vika nja pande ku pangela?’ Ca pua ca seho ku lihilula muomu vakua mavu va tonda tu yoye ngue vakevo. (Loma 12:2) Nga ka tu zangama, tu kevua ntsindiye ya ku tambuluisa valongisi va mavu na vakua ku tsimana mu vueho. (Kolose 2:8; 1 Yoano 2:15-17) Vati tu hasa ku viana eci cimbembesi ca cipi?

10. Vika tua pande ku lihula ku ntsimbu ya Mulalelo? Kaha Vikumbululo via vihula viaco via pande ku tu sindiya ku linga vika? (Talenu cikupulu ku vuputukilo)

¹⁰ Ci ka pua ca cili, ha ntsimbu ya Mulalelo ku tala vuino vuzalo vuetu, vi video, miaso na nkala viuma vi tuli navio mu Komputador, telefone, ni tablet. Mu hasa ku lihula ngueni: ‘Nga Yesu ua kele hamo nange, vuzalo vuange vu ka nji vuisa ntsoni ni?’ (Tandenu 1 Timoteo 2:9, 10) ‘Vuno vuzalo vuange vue ku muesa ngecize nji ndongesi ya Kilistu ni? Vuno Yesu nga na tava ku tala vivideo vi nje ku tala ni? Nga na tava ku halakana ku miaso i nje ku halakana ni? Nga Yesu a nji vundila ku tala mu fone yange ni tablet nji kevua ntsoni omo lia viuma via monamo ni? Vuno ci ka nji kaluuila ku leka Yesu vika nja lemena vimo vivideo game ni?’ Ku lema Yehova ci ka tu sindiya ku mbila kuti nkala cuma kati ca Vakua Kilistu cipue nga ca ndando ya kama. (Vilinga 19:19, 20) Mu tua lihanene ku pangela Yehova, tua likuminyine ku pangesa muono uetu mu ku lema Kilistu. Ngeci mukemuo ka tua pandele ku tavesa nkala cuma ci tu tangule ku tambuluisa Yesu.—Mateo 5:29, 30; Filipu 4:8.

11. (a) Vati ku lema Njambi na Yesu ce ku tu sindiya ku ambulula? (b) Vati ku lema vakuetu mu cikungulukilo ce ku tu sindiya ku va kuasa?

¹¹ Ku lema Yesu ci ka tu sindiya ku ambulula na ku longesa na ntsintsa. (Mateo 28:19, 20; Luka 4:43) Ku ntsimbu ya Mulalelo, citava mu liviukisile linga mu kovele mu cipanga ca vupioneiro vua ku hana viola 30 ni 50 mu ku ambulula. Umo muanetu ua kasinakazi ua yala ua miaka 84 ua singaniekele ngueni ka hasa ku pua pioneiro, omo lia miaka yeni na ku hona cihindu ca cili. Vunoni vapioneiro va muimbo lia kala va kele na cizango ca ku mu kuasa. Va mu kuasele na liendelo na ku mu hanguila cihela ca cili ca ku ambuluila. Mua vusunga ou muanetu ua puisilemo vutumbe vueni vua ku hana viola 30. Citava mu kuase umo mu cikungulukilo ku kovela mu vupioneiro vuaco mu vingonde via Março na Abril ni? Mua vusunga, kati vose va hasa ku pua vapioneiro. Vunoni tu hasa ku pangesa vuino ntsimbu na ngolo yetu mu ku tuala ku lutue cipanga cetu kuli Yehova. Nga tu lingamo, tu ka muesa ngecize tua tava cilemo ca tu muesele Yesu ci tu sindiye, ngue mua lingile Paulu. Viuma vika vikuavo cilemo ca Njambi ci ka tu lingisa ku panga?

12. Ku lema Njambi ca pande ku tu sindiya ku linga vika?

¹² Ca mu civali, ku lema Njambi ca pande ku tu sindiya ku lema vamuanetu. Kapostolo Yoano ua sonekele ngueni: “Vakua cilemo cange, Njambi nga na tu leme ngecize, netu tu na pande ku lilema umo na mukuavo.” (1 Yoano 4:7-11) Kaha nga tu tonda Njambi a tu leme, tua pande ku lema vamuanetu.  (1 Yoano 3:16) Vati tu hasa ku lema vakuetu?

13. Lungano luka Yesu ua tu sila mu ku lema vakuetu?

¹³ Yesu ua tu sila lungano lua vati tu hasa ku lema vakuetu. Mua kele hano ha mavu, ua kuasele vantu cikumakuma vaze va likehesele. Ua kanguisile vakua ku vavala, vakua mbumba, vilema, tupuputa na tuveveve. (Mateo 11:4, 5) Yesu ua kele na ndzolela ya ku longesa vaze va kele na cizango ca ku lilongesa, kati ngue vakuluntu va malombelo va ntsimbu ize. (Yoano 7:49) Ua lemene vihutu mu ku lihakela kapandi ka ku va kuasa.—Mateo 20:28.

14. Vika mua pande ku linga mu ku muesa cilemo kuli vamuanoko?

¹⁴ Ntsimbu ya Mulalelo ya pua ntsimbu ya cili ya ku singanieka vati tu hasa ku kuasa vamuanetu mu cikungulukilo, cikumakuma tusinakazi. Citava tu ka va meneke. Cipue ku va tualelako via ku-lia, ku va kuasa mu vipanga via ha ndzivo, ku va kuasa na liendelo mu ku kunguluka ni ku panga navo muihia. (Tandenu Luka 14:12-14.) Tavesenu cilemo ca Njambi ci mi sindiye ku lema vamuanoko!

15. Vusunga vuka tua pande ku tantekeya?

¹⁵ Ca mu citatu, ku lema Yehova ca pande ku tu sindiya ku ecela vamuanetu. Tu vose tua suana vupi na kutsa kuli Andama, ngeci na umo uahi a hasa ku handeka ngueni, “Ka nji tondo ku nji kula.” Cipue ngamba ya Njambi ua ku ononoka cikuma neni a tonda ku mu kula. Tu vose va tu ecela ku milonga ya kama! Omo lia vika ka tua pandele ku suva ovu vusunga vuaco? Cikumbululo tu ci uana mu cisimo ca tele Yesu.

16, 17. (a) Vika tu lilongesa ha cisimo ca Yesu ca muangana na vangamba veni? (b) Mu nima ya ku hilula ha cisimo ca Yesu kapandi ka ka mu na lihakela?

¹⁶ Yesu ua tele cisimo ca umo muangana uecelele ngamba yeni makongo a ku heta ku 60,000,000 denario. Vunoni mu nima yaco, ou ngamba yaco ka tavele ku ecela mukuavo ua mu levalele vimbongo via ku pua lika 100 denario. Ngozi ya muesele muangana kuli uze ngamba, ya pandele ku mu sindiya ku ecela mukuavo. Ngeci muangana ua tenukile cikuma mua vuile ngecize ka tavele ku ecela mukuavo ka mulonga ka kandende. Kaha ua handekele ngueni: “Ove u mukuamanda ua ku pihia, ange nja ku ecelele likongo liove liose muomu ua nji vundilile: Nove naua ka ca pande ku vuila mukuenu mukuamanda cikeketima, ngue omo yange nja ku vuililile cikeketima, ni?” (Mateo 18:23-35) Ngeci mua uze muangana, Yehova neni ua tu ecela ku milonga ya kama. Ku lema Yehova ca pande ku tu sindiya ku linga vika?

¹⁷ Omo tu liviukisila Mulalelo, tua pande ku lihula nguetu: ‘Kuli umo muanetu u nja vulumuina ni? Ca cikalu ku mu ecela ni?’  Nga mukemuo, ikeyo ntsimbu ya ku tambuluisa Yehova, ua kala na “vuasi mu ku ecela milonga.” (Nehemiya 9:17; Visamo 86:5) Tu ka muesa seho ku vuana vua kama vua Yehova nga tu muesa ngozi ku vakuetu na ku vecela ku fuminina ku mutima. Noho tu leme vamuanetu na ku vecela amba Yehova a tu leme na ku tu ecela. (Mateo 6:14, 15) Ku ecela vakuetu ka ci ka lomboloka ngecize ka va tu vulumuinine houe. Vunoni ci ka tu kuasa ku yoya muono ua cili ku lutue.

18. Vati ku lema Njambi ca kuasele muanetu Lily ku lua na vuzeye vua muanaye?

¹⁸ Ci hasa ku pua ca cikalu ku lua na vuzeye vua vamuanetu. (Tandenu Efeso 4:32; Kolose 3:13, 14.) Lily umo muanetu ua hitamo. ^[1] (Talenu ku mezi a kuintsi.) Ua kuasele umo ntuluue ua lizina Carol. Ua kele na ku tuala Carol kuose kua tondele ku ya na ku mu kuasa ku landa vimo via tondele. Ua mu hele naua vukuasi vua ku liseza-seza. Vutuhu Lily ua pangele viose evi, Carol ua kele na ku mu paya kaha vintsimbu vimo ka ca puile ca casi ku mu kuasa. Vunoni Lily ua kele na ku tala lika ha vifua vieni via cili, ngeci ua mu kuasele noho ua vavalele cikuma na ha kutsa. Vutuhu ka ca puile ca casi kuli muanetu Lily ua handekele ngueni: “Nja lavelela ku ka mona Carol mu mavu a aha. Nji ka mu tantekeya vuino mua ka pua ua ku tantuluka.” Mua vusunga ku lema Njambi ci hasa ku tu sindiya ku yoya vuino na vamuanetu na ku lavelela ngecize vuzeye vua ku hona ku tantuluka vuovuno vu ka hua.

19. ‘Vuana vua Njambi vuze ka vu tava ku vu lombolola’ vu tu sindiya ku linga vika?

¹⁹ Mua vusunga Yehova ua tu hana ‘vuana vueni ka vu tava ku vu lombolola.’ Ci ka pua ca cili nga ntsimbu yose tu ka muesa ku santsela ku vuana ovu! Ntsimbu ya mulalelo ya pua ntsimbu ya cili cikuma ya ku hilula ha viuma via tu pangela Yehova na Yesu. Ngeci mukemuo cilemo cavo ca pande ku tu sindiya ku tambuluisa mpundu Yesu, mu ku muesa cilemo ku vamuanetu na ku vecela ku milonga yavo ku fuminina ku mutima.