Nenu mua tava ngoco ni? Tu vose ngeci mua Samantha tua hita laza mu vitanga vintsimbu vimo. Vi tue ku linga nga kua soloka viuma vi tu eseka, vi hasa ku solola vati tue ku muenamo ku pua vakua vusunga. Ca ku muenako, nga tue ku mona nguetu ca kama ku kuasa vakuetu kati va sahuke, kaha kuli yetu ku onga ka ci ka tu puila citanga. Vunoni vusunga mu vue ku lisolola, ku onga ce ku neha luvinda. Talenu mizimbu i na hatako.

Vusamba vuemana ha ku litsiliela. Nga vantu va litsiliela umo na mukuavo ve ku yoya vuino. Vunoni ku tsiliela muntu kati ca casi. Vantu ve ku litsiliela nga va kala hamo ku panga hamo na ku simutuila mu ciyulo. Visaki vi hasa ku tsiha ku litsiliela ha kati ka vantu. Kaha nga ku litsiliela ci hua ha kati ka vantu ca cikalu ku ci hiluisa naua.

Va mi kuisaho laza ku muntu u mua singaniekele ku pua kavusamba kenu ni? Nga mukemuo, vati mua vuile? Citava mua vuile ku vavala ha mutima, ngue va na mi ende vungungu. Mu ce ku fua vene. Mua vusunga visaki vi hasa pihisa vusamba vua seho ya kama.

Robert Innes mulongisi ua ku Universidade ya California ngueni, “visaki vie ku sambukila.” Ngeci, ku handeka visaki ca pua ngue vuvezi vua ku sambukila​—nga mu pua na ku kala ntsimbu yose ha kati ka vakua makuli nenu va ka mi “sambuisila.”

Vati mu hasa ku lihenga mu ku pua mukua makuli? Mbimbiliya i hasa ku mi kuasa. Aci talenu evi vitume via mu Mbimbiliya.