1. Vutuhu Yehova ikeye ua Hiana viose ua lania vakuavo ku linga vika?

YEHOVA ikeye ua Hiana viose. Ua tangele viose, kaha naua ua hiana ku mana na ngolo. Mu nima ya ku kuasa Yombi ku tantekeya ovu vusunga vuaco, Yombi ua kumbuluile ngueni: “Nji tantekeya ngecize ove u hasa viuma viose, na viove via ku kana ka ci tava ku vi vindika.” (Yombi 42:2) Yehova a hasa ku linga viose via tonda ca ku hona ku lomba vukuasi vua muntu. Vunoni ue ku muesa cilemo mu ku lania vakuavo ku panga neni, linga va puisemo vutumbe vueni.

2. Cipanga cika ca seho ya kama, Yehova ua laniene Yesu ku linga?

² Njambi ha katete ua tangele Muaneni, Yesu, tele kanda a tange nkala cuma. Kaha Yehova ua tavele muaneni ku mu kuasa ku tanga viuma viose. (Yoano 1:1-3, 18) Kapostolo Paulu ua sonekele via Yesu ngueni: “Muli ikeye va tangele viuma viose, vi li muilu na hano ha mavu, viuma via ku mona na viuma vintsa ka tu hasa ku mona, cipue vusuana cipue vuangana cipue vumuata  cipue vukama; viuma viose va vi tangele hali ikeye, na kuli ikeye.” (Kolose 1:15-17) Yehova ka hele lika Yesu cipanga ca ku tanga vunoni ua sololuele mizimbu yaco ku vakuavo. Eci ca puile ku vezika mpundu!

3. Yehova ua laniene Andama ku linga vika, kaha omo lia vika?

³ Yehova ua laniene naua vantu ku panga hamo neni. Ca ku muenako, ua tavesele Andama ku luka mazina tusitu. (Njenisisi 2:19, 20) Aci singaniekenu ndzolela ya vuile Andama ha ku mu hana eci cipanga! Ua talele vuino cifua ca kasitu na vilinga vieni, kaha ua mu lukile lizina. Yehova ikeye ua tangele tusitu vose, citava nga ua va lukile mazina ikeye ivene. Vunoni ua muesele cilemo ceni kuli Andama mu ku mu hana cipanga ca ku luka mazina tusitu. Njambi ua hele naua Andama cipanga ca ku alulula mavu ose na ku a puisa palandaizi. (Njenisisi 1:27, 28) Vunoni mu ku hita ca ntsimbu Andama ua likelele ku panga na Njambi, ngeci muezile tuyando tua tuingi kuli ikeye na ku vana veni vose.—Njenisisi 3:17-19, 23.

4. Vati vamo va pangele na Njambi mu ku puisamo vutumbe vueni?

⁴ Njambi ua laniene naua vantu ku panga neni. Noa ua tungile vuato, mua vandele na vakua ndzivo yeni, kaha vua mu ovuele ku Livazi. Mosesa ua ka patuile vana vaIsaleli mu Ingito. Yehosua ua tuamenene vaIsaleli mu Cifuti ca va Kulahesele Njambi. Solomone ua tungile tembele mu Yelusalema. Maliya ua puile naye ya Yesu. Ava vangamba va Yehova na vakuavo va vengi va pangele neni mu ku puisamo vutumbe vueni.

5. Cipanga cika tu hasa ku pangela hamo na Yehova, kaha vuno eci ca tondeka a tu lanie ni? (Talenu cikupulo ku vuputukilo)

⁵ Lelo lino, Yehova ali na ku tu lania tu pange na ngolo yose mu ku kuatesa Vuangana vueni. Tu hasa ku pangela Njambi mu vinjila via ku liseza-seza. Vutuhu tu vose ka tu hasa ku mu pangela mu cifua cimo lika, vunoni tu vose tu hasa ku ambulula muzimbu ua cili ua Vuangana. Yehova nga na lingi eci cipanga ikeye ivene. Citava nga na ambuluila vantu ku fuminina muilu. Muomu Yesu ua handekele ngueni, Yehova a hasa ku lingisa mavue ku leka vantu via Muangana ua Vuangana vueni. (Luka 19:37-40) Ngeci tua vezika mu ku tu tavesa ku pua “vangamba kumo na Njambi.” (1 Kolintu 3:9) Kapostolo Paulu ua sonekele ngueni: “Mu ku panga mumo neni, tu mi lambelela naua, nguetu kati mu tambule kavumbi ka Njambi ngoco.” (2 Kolintu 6:1) Eci ca pua ku vezika ca kama ku tu lania ku panga na Njambi. Tu talenu vumo vusunga vu tu vuisa ndzolela yaco.

6. Vati ua vuile Muana Njambi mu ku pangela hamo na Ise?

⁶ Ku pangela hamo na Njambi ce ku vuisa vangamba va Yehova ndzolela fumeko. Muana Njambi ntsimbu tele kanda eze ha mavu ua handekele ngueni: “Yehova ua nji fukile ku vusangumukilo vua njila yeni, te kanda vipanga vieni via laza. . . Nja kele neni, ngue mesele ua ku hiana; nange nja puile ndzolela yeni ku litangua ku litangua, ku viukilila ntsimbu yose ku meso eni.” (Visimo 8:22, 30) Omo Yesu ua pangele na Ise, ua kele na ndzolela muomu ua puisilemo viuma via vingi ,kaha ua tantekeyele ngecize Yehova ua mu lema. Amba yetu co?

7. Omo lia vika ku ambulula ce ku tu vuisa ndzolela?

⁷ Yesu ua ambele ngueni mu ku hana na ku tambula mua kala ndzolela. (Vilinga 20:35) Tua vuile ndzolela ya kama mu tua lilongesele  vusunga, kaha vika tue ku vuila ndzolela mu ku longesako vakuetu? Muomu, tue ku mona ndzolela yavo nga va putuka ku ivuisisa vilongesa via Mbimbiliya na ku likuata vusamba na Njambi. Tue ku viukilila mu tue ku va mona va alulula visinganieka viavo na cifua ca muono uavo. Ku ambulula ca pua cipanga ca hiana seho, kaha ce ku tu vuisa ndzolela mu tue ku ci linga. Muomu ce ku kuasa va tue ku longesa ku pua va vusamba va Njambi na ku va hana lulavelelo lua muono ka ue hua.—2 Kolintu 5:20.

8. Vika va handekele vamo ku tuala ha ndzolela ya ku pangela hamo na Yehova?

⁸ Mu tue ku kuasa vakuetu ku lilongesa via Njambi, tue ku tantekeya nguetu tu li na ku ya Yehova ku mutima, kaha ikeye ua haka seho ku vipanga vietu. Ce ku tu vuisa ndzolela. (Tandenu 1 Kolintu 15:58.) Marco, ua kala ku Italia ua handekele ngueni: “Ca pua ku vezika ca kama ku tantekeya ngecize nji li na ku pangela Yehova na ndzili yange yose, kati ku muntu a ka suva vuovuno vipanga viange.” Franco ua ku Italia neni ua handekele ngueni: “Ku hitila mu Mbimbiliya na mikanda, Yehova ue ku tu vuluisa tangua na tangua ngecize ua tu lema, kaha viose vi tue ku mu pangela via kala na seho, ambe nga tue ku vi mona ngue ka viesi na seho. Ngeci mukemuo ku pangela hamo na Njambi ce ku nji vuisa ndzolela ya kama.”

9. Vusamba vuka vua kele ha kati ka Yehova na Yesu, kaha omo lia vika?

⁹ Nga tu pangela hamo lika na vaze va tua lema, tu ka kala navo mu hiehi. Tu ka tantekeya vuino vuntu vuavo na vifua viavo. Tu ka tantekeya vutumbe vuavo na kapandi ka ve ku lihakela mu ku vu puisamo. Yesu ua pangele na Yehova makulukazi na makulukazi a miaka. Cilemo cavo ca kolele cikuma, na vimo viahi via hasele ku ci tepa. Yesu ua lomboluelele vati vusamba vuavo vua fuile mu ku handeka ngueni: “Na Tata nange tu na pu umo lika.” (Yoano 10:30) Mua vusunga va likuatele kumo, kaha va litavasianene ku pangela hamo lika.

10. Omo lia vika ku ambulula ce ku tu suenesa kuli Njambi na vakuetu?

¹⁰ Yesu ua vundilile Yehova a niunge vandongesi veni. Ngeci ua lombele ngueni: “Linga va pue umo, ngue omo etu tu umo lika.” (Yoano 17:11) Nga tu yoya muaya vitume via Njambi na ku pangela hamo na vakuetu mu ku ambulula, ci ka tu kuasa ku ivuisisa vifua via Njambi via ku komouesa. Tua tantekeya nguetu ku tsiliela Njambi na ku kava vitume vieni ca pua ku zangama. Nga tu suena mu hiehi na Njambi neni a ka tu suena. (Tandenu Tiango 4:8.) Eci ci ka tu suenesa mu hiehi na vamuanetu muomu tue ku hita mu visoti vimo, kaha tue ku ivua ndzolela muomu vizango vietu vimo. Omo tu pangela hamo, tu ka viukilila hamo,na ku kolesela hamo. Muanetu Octavia, ua ku Britania ngueni: “Ku  pangela hamo na Yehova ce ku nji suenesa mu hiehi na vamuanetu.” Ua handekele ngecize muomu vizango vieni na vavusamba veni vie ku pua vimo. Mua vusunga tu vose tue ku ivuamo. Ngeci mukemuo omo tue ku mona kapandi ka ve ku lihakela vamuanetu ka ku ya Yehova ku mutima, ce ku tu suenesa mu hiehi navo.

11. Vika tu handekela nguetu mu mavu a aha tu ka suena mu hiehi na Yehova na vamuanetu?

¹¹ Cilemo cetu kuli Njambi na kuli vamuanetu ca pua ca ku kola, vunoni ci ka pua ca ku kola mpundu mu mavu a aha. Aci singaniekenu ha cipanga ca ndzolela tu ka linga ku lutue! Tu ka tambula vose va ka sanguka na ku va longesa via Yehova. Kaha naua tu ka pangela hamo mu ku puisa mavu Palandaizi. Ci ka pua ku viukilila ca kama ku ka pangela hamo na ku ka pua va ku tantuluka mu ku sika ca Kilistu. Vantu vose va ka likuata vusamba vua kama umo na mukuavo na Yehova, uze a ka “kutisa cizango ca viose vili na muono.”—Visamo 145:16.

12. Vati ku ambulula ce ku tu niunga?

¹² Tua pande ku niunga vusamba vuetu na Yehova. Muomu tuli na ku yoyela mu mavu a Satana kaha ka tua tantulukile, ngeci ca casi ku tambuluisa vilinga via mavu ano na visinganieka viao. Ci na fu ngue muntu a kanduisa muta u tonda ku mu hungumuna. Ngeci tua pande ku pangesa ngolo yetu yose mu ku viana cimbembesi ca mavu a Satana. Vati ku ambulula ce ku tu niunga? Mu tue ku pangesa Mbimbiliya mu ku ambulula via Yehova, tue ku tuala mana ku viuma via cili, kati ku vize vi hasa ku tu zeyesa mu lutsilielo. (Filipu 4:8) Ku ambulula ce ku tu kolesa mu lutsilielo muomu ce ku tu vuluisa vikulaheso na vitume via Njambi via cilemo. Ce ku tu kuasa naua ku kala na vifua vize vi ka tu niunga kuli Satana na mavu eni.​—Tandenu Efeso 6:14-17.

13. Vati ue ku ivua umo Muanetu ku Australia ku tuala ha ku ambulula?

¹³ Nga tu lihaka ntsimbu yose mu ku ambulula, ku lilongesa na ku pangela vakuetu mu cikungulukilo, ci ka tu niunga muomu ka tu ka lisosomua cikuma visoti vietu. Joel, ua ku Australia ua handekele ngueni: “Ku ambulula ce ku nji kuasa linga kati nji seze vusunga. Ce ku nji vuluisa visoti vi vali na ku lihita navio vantu na vivezikiso vi nji li navio mu ku niunga vitume via Mbimbiliya mu muono uange. Ku ambulula ce ku nji kuasa ku pua ua ku likehesa, ce ku nji hana vukovelelo vua ku tsiliela lika Yehova na vamuanetu.”

14. Vati lukakatela luetu lue ku muesa ngecize tua kala na sipilitu ya Njambi?

¹⁴ Ku ambulula ce ku tu kuasa ku tsiliela mpundu ngecize Njambi ue ku tu hana sipilitu santu. Ca ku muenako: Aci singaniekenu nga mue ku linga cipanga ca ku tuala mbolo ya vuana ku vantu muimbo lienu. Kaha ka ve ku mi fueta, mue ku linga viose ku ngolo yenu. Vunoni cingi ca vantu ka va tondo mbolo yenu, vamo va mi zinda omo lia ku va tualela mbolo yaco. Miaka ingahi mu ka linga cipanga caco? Mua vusunga, mu ka zeya na ku likela. Vunoni cingi cetu kasi tue ku ambulula muaka ku muaka, halumo tue ku pangesa vimbongo vietu na ntsimbu yetu. Kasi vamo ve ku tu sembulula na ku tu vuila matoto. Ovu vusunga vu muesa ngecize tua kala na sipilitu ya Njambi.

15. Vati ku ambulula muzimbu ua cili ca likuata na vutumbe vua Njambi ku vantu?

¹⁵ Vati ku ambulula ca likuata na vutumbe  vua Njambi ku vantu? Njambi ua tonda vantu va ka yoye miaka yose. Vupi vua Andama ka vua aluluile vutumbe vueni. (Isaya 55:11) Njambi ua viukisa viose linga vantu va patuke ku vupi na ku kutsa. Mu njila ika? Yesu uezile ha mavu na ku hana muono ueni. Vunoni linga vantu va uane ku vezika, va pande ku ononoka Njambi. Ngeci mukemuo Yesu ua longesele vantu va tantekeye via tonda Njambi, kaha ua tumine vandongesi veni ku linga cipanga caco. Mu tue ku ambulula na ku kuasa vakuetu ku pua vavusamba va Njambi lelo lino, tu li na ku panga mpundu na Njambi mu vutumbe vueni vua ku patula vantu ku vupi na ku kutsa.

16. Vati ku ambulula ce ku muesa ngecize tue ku ononoka masiko a kama a Njambi?

¹⁶ Mu tue ku kuasa vakuetu ku tantekeya njila i tuala ku muono ua ya-ye, tue ku muesa cilemo kuli vakevo na Yehova. Njambi “a hianga vantu vose vovoke, va hete ha ku tantekeya vusunga.” (1 Timoteo 2:4) Omo kaFaliseo ue huile Yesu ngueni lizi lika lia kama ku mezi a lisiko, Yesu ua mu kumbuluile ngueni: “‘U ka lema muangana Njambi yove na mutima uove uose, na muono uove uose, na mana ove ose’.  Eli likelio lizi lia lisiko lia kama na likelio lia ku livanga. Kaha lia mu civali lia ku lifua neli naua, likelio U ka lema mukuenu ngue ove ivene.’” (Mateo 22:37-39) Mu tue ku ambulula muzimbu ua cili, tue ku ononoka aa masiko aco.​—Tandenu Vilinga 10:42.

17. Vati mue ku ivua ku tuala ha ku ambulula muzimbu ua cili?

¹⁷ Ca pua ku vezika mpundu! Yehova ua tu hana cipanga ce ku tu vuisa ndzolela, na ku tu suenesa mu hiehi neni na va muanetu, kaha eci ce ku niunga vusamba vuetu neni. Ce ku tu hana naua vukovelelo vua ku muesa cilemo cetu kuli ikeye na ku vakuetu. Yehova ali na makulukazi a makulukazi a vantu mu mavu ose, kaha vose va li na ku yoya mu vifua via ku liseza-seza. Vunoni cipue nga tu vanike ni vakuluntu, vampite ni vihutu, nga tua kala ngolo ni tu va ku zeya, tue ku linga cose mu ku longesako vakuetu. Tue ku ivua ngeci mua muanetu Chantel ku França, ngueni: “Sakatanga ua viose, ua Hiana ngolo, Njambi ua ndzolela na nji tumu ngueni: ‘Ya! Handeka! Nji handekeleko ku mutima uove. Nji ku hana ngolo, Lizi liange Mbimbiliya, tungelo va ku kuasa, vamuanoko ha mavu va ku kuasa, va ku longesa ntsimbu yose, na ku ku kuasa mu ntsimbu i tondeka.’ Ca pua ku vezika ca kama ku panga via tu tuma Yehova na ku pangela hamo na Njambi yetu!”