Vakua Kilistu va singimika cikuma mezi a ku huimina a kapostolo Paulu ngueni: “Tu hianga ku yoya na vusunga mu viuma vioser.” Ca ambatela kumo na ku linga vika?

Cingi ca vantu va lema ku litala ha katalelo cimene, ntsimbu kanda va ka soloke ku mbunga. Omo lia vika? Muomu ve ku tonda ku fuila. Vunoni kua kala via seho ku hiana cifua ca vinkambu ni ku zala vuzalo vua ndando. Mua vusunga, vuntu vuetu vua mukati vu hasa ku viukisa ni ku pihisa cifua cetu.

Mbimbiliya ya tumamuna mpundu nguayo tua zendamena ku vupi. Njenisisi 8:21 Nguayo: “Ciyongola ca mutima ua muntu cikeco ca cipi fume ku vunike vueni.” Nkuma nga tu tonda ku pua vakua vusunga tua pande ku lua na vupi vu tua semuka navuo. Kapostolo Paulu ua lomboluele vuino via ku lua ceni ngueni: “Muomu nji viukilila mu mezi a lisiko a Njambi na vuntu vua mu kati: Vunoni nji mona mezi eka a lisiko mu vilio viange, akeo a li na ku lua ndzita na mezi a lisiko a mu mutima uange na akeo ali na ku nji ku kutiliya ku vundzinda vua mezi a lisiko a vupi, aze a li mu vilio viange.”​—Loma 7:22, 23.

Ca ku muenako, nga mutima uetu u tu kokueya mu ku linga via vipi kaha tu li na viyongola via ku likela ku pua vakua vusunga, ka tua pandele ku tava ku pua vandungo va mitima yetu. Tu hasa ku lingako mumo. Nga tu hangula ku viana visinganieka via ku pihia, tu ka pua vakua vusunga vutuhu tua kala ha kati ka vakua makuli.

Nga tu tonda ku pua vakua vusunga tua pande ku ci muesa mu yoyesi yetu. Ci vuisa vusiua, ku mona ngecize cingi ca vantu ve ku pangesa ntsimbu ya yingi mu ku hangula ‘cifua ca vuzalo vuavo’ ca ku hona ku singanieka ha yoyesi yavo. Ngeci ve ku onga na ku sanguluka nga va tonda ku linga vimo. Limo livulu ngualio: “Tue ku onga ku vanga noho tua soloka ngue tu vantu va cili.” Vuno kua kala vitume vi tu hasa ku tsiliela, vi tu kuase ku mona nga tu vakua vusunga ni kuahi ni? Eyo.

Makulukazi na makulukazi a vantu va na limuena ngecize Mbimbiliya i hasa ku kuasa mpundu. Mu Mbimbiliya mua kala vitume via seho ya kama. (Visamo 19:7) Ya kala na vitume ku tuala ha muono, vipanga, yoyesi na mua ku lemesela Njambi. Vitume viayo via ntsindo ka vie ku hita. Masiko ayo na vitume viayo vi hasa ku kuasa nkala cifuti, muyati, visemua na vantu vose. Nga tu tanda Mbimbiliya, na ku hilula ha viuma vi ya handeka na ku pangesa vimamuna viayo tu hasa ku longesa mutima uetu ku pua ua vusunga.

Mu ku tonda ku pua mukua vusunga mue ku iza naua vikuavo kati ku tantekeya lika vusunga vua Mbimbiliya. Mu ku linga yoyesi ya vantu va lelo lino ya sulu vuhenge, va hasa ku tu kokueya. Ngeci mukemuo tua pande ku vundila Njambi a tu kuase na ku tu kaniamesa. (Filipu 4:6, 7, 13) Nga tu lingamo, tu ka pua va ku simpa mu ku hakuila vuviuke na ku pua vakua vusunga.

HItoshi, ali mu cimpande ca katete, ua vezikile mu ku mu tantekeya ku pua mukua vusunga ku vipanga. Vuovuno ue ku pangela umo yala ua lema vusunga. Hitoshi ua handekele ngueni: “Nja vezika cikuma, kaha nja uana cipanga ci nji hasa ku panga na mutima ua ku lela.”

Ku li vamo naua va na tava vusunga vuaco. Aci hilulenu ha malungano a vamo va na vezika omo lia ku kava vitume via Mbimbiliya via “ku yoya na vusunga mu viuma viose.”

• Mutima ua ku Lela

  “Nja fumine ku sikola na miaka 13 nja putukile ku panga na vezi. Ngeci cingi ca viuma vi nja uanene tele via mu ku onga. Kaha mu ku hita ca miaka nja sombokele, nange na yaliange tua putukile ku lilongesa Mbimbiliya na umo Mukaleho ua Yehova. Tua lilongesele ngecize Yehova * Njambi ua zinda vakua ku onga, ngeci tua hanguile ku alulula muono uetu. Mu muaka ua 1990 tua lihanene kuli Yehova na ku tu mbatiza, tua pua Vakaleho va Yehova.”​—Visimo 6:16-19.

  Ku miaka ya ku nima, mu ndzivo yange mua sulile na vikuata via ku punda, vunoni lelo nja patuka ku viuma viaco, kaha via nji seza na mutima ua ku lela. Ku singanieka ha miaka ya ingi i nja puile mukua ku onga, nji santsela kuli Yehova mu ku nji muesa cikeketima ceni. Nje ku viukilila mu nje ku ya mu ku kosa nkala vutsiki, muomu lelo lino nje ku ya Yehova ku mutima.”​—Cheryl, Irlanda.

  “Mukuluntu uange ha cipanga mua tantekeyele ngecize ange nja vianene ntsambuelo ya yala umo mukua ku landa, ua nji lekele ngueni: ‘Njambi yove na ku puisa mukua vusunga mpundu! Tua vezika cikuma ku panga nove mu empreza.’ Ku pua mukua vusunga mu viose ce ku nji kuasa ku kala na mutima ua ku lela ku meso a Njambi. Ce ku nji kuasa naua ku kuasa vusoko vuange na vakuetu va pue ngeci muange.”​—Sonny, Hong Kong.

• Ciyulo mu Visinganieka

  “Nja pua mukuasi ua mukuluntu ua banco (bank) ya vifuti via vingi. Mu mingoso ya cifua eci vavengi vusunga va vu mbila kuti. Vantu va vengi ve ku singanieka nguavo, ‘ku onga kavundende ka cesi na vupi nga ci kuasa mingoso ku ya ku lutue.’ Vunoni yange mu ku pua mukua vusunga, nja kala na ciyulo mu visinganieka. Nja lihakela kapandi ka ku pua mukua vusunga ambe muize luvinda. Vakuluntu vange ha vipanga va tantekeya ngecize ka nje ku va kuisa cipue ku onga omo liavo.”—Tom, United States.

• Ku Lisingimika enu Vavene

  “Mukuluntu uange ha vipanga ua tondele nji pue na ku kuisa nga kua zimbala viuma ha vipanga, vunoni nja mu vianene. Kaha mu ku hita ca ntsimbu omo vezi va solokele, mukuluntu ua nji sangalele. Ku pua mukua vusunga mu mavu ano a makuli ci tondeka ku simpa. Vunoni ku ntsongo ya viose, tu ka tambula kasingimiko na ku tu tsiliela.”​—Kaori, Japan.

“Ku pua mukua vusunga ce ku neha vivezikiso ngeci mua mutima ua ku lela, ciyulo mu visinganieka na ku lisingimika enu vavene.—Mukemuo ni kuahi?