1, 2. (a) Vika ua handekele Yehova ngueni vi ka soloka ku matangua ano? (b) Vihula vika tu ka tantekeya mu cilongesa cino? (Talenu cikupulo ca ku vuputukilo.)

YEHOVA ua handekele ngueni ku ntsimbu yetu, “likumi lia vamala va ku malimi ose a vakua vifuti va ka kuata, ku mukunduilo uo uze ikeye kaYundeya, nguavo, Tu ka ya nove, muomu tu nevu ngecize Njambi ua kala nove.” (Zakaliya 8:23) KaYundeya uemanena vaze va ku vuavesa na sipilitu santu. Ve ku va sana naua nguavo “vaIsaleli va Njambi.” (Ngalata 6:16) Vamala likumi vemanena vose vakua lulavelelo lua ku yoyela ha mavu miaka yose. Va tantekeya ngecize Yehova na vezikisa civunga ca vaze va ku vuavesa, kaha va na mono ngecize ca pua ku vezika ku lemesa hamo navo.

² Ngeci mua kapolofeto Zakaliya, Yesu ua handekele ngueni vantu va Njambi va ka lipandakana. Ua handekele via vaze va na lavelela ku ka yoyela muilu ngueni “kavutanga,” kaha vaze va na lavelela ku ka yoyela ha mavu ngueni “vampanga veka.” Vunoni Yesu ua handekele naua ngueni va ka pua “vutanga vumo lika” kaha va ka kava ikeye “kaniungi umo lika.” (Luka 12:32; Yoano 10:16) Mu ku linga va pua vivunga vivali, eci ce ku katula vihula: (1) Vuno vampanga veka va pande ku tantekeya mazina a vose va ku vuavesa ni? (2) Vati Vakua Kilistu va ku vuavesa va pande ku livua?  (3) Vati nja pande ku muenamo muntu a putuka ku lia mbolo na ku nua viniu ha Mulalelo? (4) Vuno nja pande ku lisosomua ku livuezelela ca vakua ku lia ha mulalelo ni? Tu ka tantekeya vikumbululo mu cilongesa cino.

3. Omo lia vika ka tu hasa ku tantekeya mpundu mazina a vose vakua civunga ca 144,000?

³ Vuno vampanga veka va pande ku tantekeya mazina a vose va ku vuavesa va ci li ha mavu ni? Houe. Omo lia vika? Muomu ka tuesi na vusunga nga vose tangua va ka tambula cilunguiso cavo.Vutuhu Njambi na va lania ku ka yoyela muilu, vunoni va ka tambula lika cilunguiso cavo nga va tualelelaho ku ononoka. Mu ku linga Satana na tantekeya ovu vusunga vuaco ue ku pangesa “vapolofeto va makuli” mu ku seteka ku va “tangula.” (Mateo 24:24) Vakua Kilistu va ku vuavesa ka va hasa ku kala na vusunga ngecize va ka tambula cilunguiso cavo, ku vanga noho a ka va muesa mpundu ngecize va na fuila ku ya muilu. Yehova ue ku va hana citantekeyeso nga va ya muilu ni kuahi ntsimbu kanda vatse ni ntsimbu kanda “lamba ya kama” i putuke. Ngeci mukemuo, ci ka pua ku lipakesa ngoco, nga muntu a tonda ku tantekeya veya vakua civunga ca vakua 144.000 ha vangamba va Njambi.​—Ku-Solola 2:10; 7:3, 14. ^[1]

4. Nga ka tu hasa ku tantekeya mazina a vose va ku vuavesa vali ha mavu vati tu hasa ‘ku ya’ navo?

⁴ Nga vampanga veka ka va hasa ku tantekeya mazina a vose va ku vuavesa vali ha mavu, kaha vati va hasa ‘ku ya’ navo? Mbimbiliya nguayo likumi lia vamala “va ka kuata, ku mukunduilo uo uze ikeye kaYundeya, nguavo, Tu ka ya nove, muomu tu nevu ngecize Njambi ua kala nove.’” Vutuhu cinanga caco ca tumbula kaYundeya, eci ca lomboloka ngecize kemanene muntu umo lika vunoni va vengi. Eci ca muesa ngecize kaYundeya nemanena civunga cose ca vaze va ku vuavesa. Vampanga veka va tantekeyamo, ngeci ve ku pangela Yehova hamo, neci civunga caco. Ka ci tondeka va tantekeye mazina a vose va kala mu civunga linga va va kave muntu ku muntu. Yesu ikeye Ntuamena yetu kaha Mbimbiliya nguayo tua pande ku kava lika ikeye.—Mateo 23:10.

5. Cimamuna cika Vakua Kilistu va ku vuavesa va pande ku hilula cikumakuma, kaha omo lia vika?

⁵ Vakua Kilistu va ku vuavesa va pande ku hilula vuino ha cimamuna ca ku 1 Kolintu 11:27-29. (Tandenu.) Vati ua ku vuavesa a hasa ku lia mbolo na ku nua viniu ha Mulalelo “na ku viukila cahi.”? Nga ikeye kesi na vusamba vua cili na Yehova kaha kati mukua vusunga, vunoni a lia ku mbolo na ku nua ku viniu, a muesa kasahuntu. (VaHevelu 6:4-6; 10:26-29) Eci cimamuna ca ntsindo, ci vuluisa vose va ku vuavesa ngecize va pande ku pua va ku konkama nga va tonda ku ka tambula “cilunguiso ca ku-sana cize ca Njambi ca muli Kilistu Yesu.”—Filipu 3:13-16.

6. Vati Vakua Kilistu va ku vuavesa va na pande ku limona avo vavene?

⁶ Paulu ua lekele Vakua Kilistu va ku vuavesa ngueni: “Nji cindzinda muli Muangana, nji mi lambelela ngecize mu ende-ende ngue omo mu na pande ku-sana cize va mi saneneneco.” Paulu ua lomboluele naua ngueni: “Na ku-likehesa cose na ku-konkoma cose, na ntsintsa ya ngozi liyandelienu ha kati kenu umo na mukuavo na cilemo; zangamenu mu ku niunga vumo vua sipilitu na lizitiko lia ciyulo.” (Efeso 4:1-3) Sipilitu ya Yehova ye ku kuasa vangamba veni ku likehesa, kati ku lihalesa. (Kolose 3:12) Va ku vuavesa ka ve ku limona ngue va  kala na seho ya kama cikuma ku hiana vakuavo. Va tantekeya ngecize Yehova ue ku hana sipilitu santu ku vangamba veni vose cipue vaze kati va ku vuavesa. Kaha ka ve ku ivua ngue vakevo lika ve ku ivuisisa vuino vusunga vua Mbimbiliya ku hiana nkala muntu. Cikuavo naua ka ve ku leka muntu a lie mbolo na ku nua ku viniu ha Mulalelo. Vunoni ve ku likehesa kaha va tantekeya ngecize Yehova ikeye lika ali na mpoko ya ku lania vantu va ka ya muilu.

7, 8. Viuma vika va ku vuavesa ka va pandele ku lavelela, kaha omo lia vika?

⁷ Vutuhu va ku vuavesa va tantekeya ngecize cilanio ca ku ya muilu ca pua ku vezika ca kama, ka ve ku tonda va va mone ngue va hiana seho. (Efeso 1:18, 19; tandenu Filipu 2:2, 3.) Vakevo naua va tantekeya ngecize, omo Yehova ua va vuavesele ka zimbuile ku vantu linga va vi tantekeye. Ngeci mukemuo, muntu ua ku vuavesa ke ku komoka nga vantu ha katete ka va tsiliela ngecize va na mu vuavesa. Ue ku vuluka vi ya handeka Mbimbiliya nguayo ka tua pande ku tsiliela vuasi-vuasi muntu a litumbula ngueni Njambi na mu hana cipanga ca ku lifuila cikuma. (Ku-Solola 2:2) Omo tua tantekeya nguetu, ua ku vuavesa ke ku tonda va mu mone mu njila ya ku lifuila cikuma, ke ku ya na ku leka vose va uana lua mbangelo ngueni ua pua ua ku vuavesa. Mua vusunga ka ka sanduola eyi mizimbu yaco. Ka kayi na ku lipamba omo lia viuma via cili via ka linga muilu.—1 Kolintu 1:28, 29; tandenu 1 Kolintu 4:6-8.

⁸ Va ku vuavesa ka ve ku singanieka nguavo va pande lika ku kala na vakuavo va ku vuavesa, va linge honi ngue vakua civunga ca mbola. Kaha ka ve ku tonda vakuavo va ku vuavesa linga va simutuile via ku ka sika cavo muilu ni cipue ku lilongesa hamo Mbimbiliya. (Ngalata 1:15-17) Nga va ku vuavesa va lingamo, kaha cikungulukilo ka ci kende vuino. Ci ka pua ku luisa sipilitu santu, ize ye ku kuasa vantu va Njambi ku kala mu ciyulo na ku pangela hamo.—Tandenu Loma 16:17, 18.

9. Omo lia vika mua pande ku zangama ha cifua ci mue ku muenamo vakua ku lia mbolo na ku nua viniu ha Mulalelo? (Talenu mu cikasa“  “‘Cilemo ka ce ku Lisahuisa.’”)

⁹ Vati mua pande ku muenamo vamuanetu va ku vuavesa? Yesu ua lekele vandongesi veni ngueni: “Enu vose mu vana va naye.” Kaha naua ngueni: “Uose a ka lihaka ku vukama, va ka mu kehesa; nou a ka likehesa, va ka mu haka ku vukama.” (Mateo 23:8-12) Ngeci mukemuo kati ca cili ku komoka cikuma muntu, cipue muanaye ya Kilistu ua ku vuavesa. Mbimbiliya mu ye ku handeka via vakuluntu mu cikungulukilo, ye ku tu mamuna ku tambuluisa ku-tsiliela cavo, vunoni nguayo ka tua pandele ku puisa muntu ntuamena yetu. (VaHevelu 13:7) Cili vene Mbimbiliya nguayo vamo va pande “tusingimiko tuvali.” Muomu “vakua ku sika mua cili” kaha “ve ku panga mu lizi na mu ku longesa.” (1 Timoteo 5:17) Nga tu halesa cikuma Vakua Kilistu va ku vuavesa na ku va haka seho ya kama cikuma, tu ka va vuisa ntsoni. Kaha tu hasa ku va lingisa va lihalese. (Loma 12:3) Mua vusunga ka tu tondo ku panga viuma vi hasa ku suntsuisa umo ua vamuanaye ya Kilistu.—Luka 17:2.

10. Vati mu hasa muesa kasingimiko ku Vakua Kilistu va ku vuavesa?

¹⁰ Vati tu hasa ku muesa kasingimiko ku vantu va vuavesa Yehova? Tu hasa ku lingamo nga ka tu ka va hula vati va va vuavesele. Muomu eyi ya pua mizimbu yavo lika, kaha ka tuesi na mpoko ya ku i tantekeya. (1 Tesalonika 4:11; 2 Tesalonika 3:11) Kaha ka tua pandele ku singanieka nguetu mukua ndzivo yavo, ni vavusoko vavo navo va pua va ku vuavesa. Muomu muntu ke ku suana lulavelelo mu vusoko. (1 Tesalonika 2:12) Kaha ka tua pandele  ku pua na ku linga vihula vi vavalesa vakuetu ha mitima. Ngeci mua ku hula muanetu ua somboka, vati ue ku ivua ku ka yoyela ha mavu miaka yose ca ku hona Yalieni ni mpueyeni. Muomu tua tantekeya nguetu, mu mavu a aha Yehova a ka “kutisa cizango ca viuma viose vili na muono.”—Visamo 145:16.

11. Vati ku likela ku komoka vantu ci hasa ku tu niunga?

¹¹ Nga ka tu tala va ku vuavesa ku pua va seho ya kama cikuma ku hiana vamuanetu vakuavo, ci ka tu niunga. Mu njila ika? Mbimbiliya nguayo ku hasa ku kala “vamuanetu va makuli” mu cikungulukilo, vamo va hasa ku litumbula nguavo va ku vuavesa. (Ngalata 2:4, 5; 1 Yoano 2:19) Kaha naua vamo va ku vuavesa halumo ka va kende vuino. (Mateo 25:10-12; 2 Petulu 2:20, 21) Vunoni nga tu ka viana ku komoka vantu, ka tu ka suamangeya va ku vuavesa ni vaze va tsimana, ambe vaze va sua laza ku pangela Yehova. Kaha cipue va vulumune ni ku tuhuka mu cikungulukilo, ka tu ka zeye mu lutsilielo ni ku likela ku lemesa Yehova.—Yunda 16.

12, 13. Omo lia vika ka tua pandele ku lisosomua ku livuezelela ca vakua ku lia mbolo na ku nua viniu ha Mulalelo?

¹² Mu miaka ya ku nima, numelu ya vantu va kele na ku lia mbolo na ku nua viniu ha Mulalelo ya kele na ku tepuluka. Vunoni mu miaka ino numelu yaco ili na ku livuezelela muaka ku muaka. Tua pande ku lisosomua ni? Houe. Tu tantekeyenu omo lia vika.

¹³ “Muangana [Yehova] a tantekeya vaze va na pu veni.” (2 Timoteo 2:19) Vamuanetu ve ku tanda vakua ku lia mbolo na ku nua viniu ha Mulalelo ka va tantekeya iya ua ku vuavesa mpundu. Vunoni Yehova ava tantekeya. Kaha numelu yaco ya ambatela kumo na vamo ve ku singanieka nguavo va ku vuavesa nkuma kuahi. Ca ku muenako, vamo va kele na ku lia mbolo na ku nua viniu ha Mulalelo va likela. Vamo halumo omo lia mavezi a mu vuongo ni ku lana ca visoti mu muono, ve ku singanieka nguavo va ka sika hamo na Kilistu muilu. Mua vusunga, ka tu tantekeya vangahi va ku vuavesa va na lisupu ha mavu.

14. Vika ya handeka Mbimbiliya ku tuala ha numelu ya va ku vuavesa va ka kala ha mavu omo ika putuka lamba ya kama?

¹⁴ Va ku vuavesa va vengi va ka kala ku mitamba yose ya mavu omo Yesu a ka vezila na ku va tuala muilu. Mbimbiliya nguayo Yesu “a ka tuma tungelo tueni na lizi lia kama lia luneta, kaha va ka kungulula veni vaze va va hanguile, ku mitamba yose iuana, ku mutamba uze kua lenga lilu na ku hetesa ha lenga mutamba ukuavo ua lilu.” (Mateo 24:31) Kaha naua ya muesa nguayo ku matangua a ku kotokela, va vandende lika va ku vuavesa va ka lisupa ha mavu. (Ku-Solola 12:17) Vunoni ka ya tumbuile vangahi va ka kalako omo ika putuka lamba ya kama.

15, 16. Vika tua pande ku ivuisisa ku tuala ha vantu 144,000 va hangula Yehova?

 ¹⁵ Yehova ikeye a zivuka ntsimbu ya na pande ku vuavesa muntu. (Loma 8:28-30) Yehova ua putukile ku hangula va ku vuavesa mu nima ya ku sangula Yesu. Eci ci muesa ngecize, ku sekula ya ku livanga, Vakua Kilistu va vusunga vose va puile va ku vuavesa. Mu nima ya vihita via miaka, cingi ca vaze va litumbuile Vakua Kilistu ka va kavele Kilistu. Vutuhu ngoco, mu miaka yaco Yehova ua vuavesele vaze va vandende va lisupileho mu ku pua Vakua Kilistu va vusunga. Va puile ngue tiliku ize ya tumbuile Yesu ngueni ika kola hamo lika na visoni. (Mateo 13:24-30) Ku matangua a ku kotokela, Yehova kasi ali na ku tualelelaho ku hangula vantu va kovele mu mukana ua 144,000. ^[2] (Talenu mezi a kuintsi.) Nga Njambi ali na ku hangula vamo ntsimbu kanda ku kotoka ci heta, tuli na vusunga nguetu ali na ku linga vize via viuka. (Isaya 45:9; Ndaniele 4:35; tandenu Loma 9:11, 16.)  ^[3] (Talenu mezi a kuintsi.) Tua pande ku zangana linga kati tu pue ngue vangamba vaze va tatuokele mu cifua ca va pangeselelemo sukuluavo, vutuhu va putukile ku panga ku viola via ku kotokela.—Tandenu Mateo 20:8-15.

¹⁶ Kati vose va li na lulavelelo lua ku ka yoyela muilu, va kala mu civunga ca “mukuamanda ua cili mukua mana.” (Mateo 24:45-47) Ngue mu ca puile ku sekulu ya ku livanga, Yehova na Yesu lelo lino ve ku pangesa vantu va vandende lika mu ku lisa na ku longesa va vengi. Ku sekulu ya ku livanga Yehova ua pangesele Vakua Kilistu va vandende lika ku soneka mikanda ya ciNgelengu. Na lelo lino, Njambi ua hana Vakua Kilistu va ku vuavesa  va vandende lika cipanga ca ku lisa vantu veni “ku ntsimbu ya ku lia.”

17. Vika mu na lilongesa mu cilongesa cino?

¹⁷ Mu cilongesa cino tua lilongesa ngecize, Yehova ua likuminia ku ka hana muono ka ue ku hua ku vantu va vengi ha mavu na muilu kuli vaze va ka sika hamo na Yesu. Yehova a hana cilunguiso ku vangamba veni vose, ku “kaYundeya” na “vamala likumi,” kaha ua tonda vose va niunge masiko eni na ku pua va ku konkama. Vose va na pande ku likehesa. Tu vose tua pande ku mu pangela hamo na mutima umo lika. Kaha tu vose tua pande ku niunga ciyulo mu cikungulukilo. Omo tu li mu hiehi na ku kotoka ca mavu, tu tualelelenuho ku pangela Yehova na ku kava Kilistu mu ku pua vutanga vuno lika.