Vilongesa via mu Mbimbiliya via kala na ngolo ya ku komouesa ya ku alulula vilinga via vantu. Tu hilulenu ha viuma vi va lihitile navio vantu vavali Ricardo na Andres.

RICARDO: Mu nja kele na miaka 15, nja kovelele ku civunga ca vambanditu. Civunga caco ca nji hungumuine. Nja tondele cikuma ku ka kala mu kamenga miaka 10! Cizango caco ci zivika ngue vusiname. Vunoni muimbo lietu, vantu va kele na ku singimika na ku komoka cikuma uose ua kele mu kamenga miaka ya yingi. Ngeci nange nja tondele ku ka hitamo linga va nji singimike.

Viose vi ve ku linga vambanditu nange nja vi lingile, ngeci mua ku fuenia vidroga, ku limona ku mivila na ku linga luozi. Tangua limo ku vutsiki, tua sangumukile mbuanja na ku lipiluila vutsiki vuose. Nja muene nguange lelo ni kuange ngu, vunoni nja hasele ku tina na citonio cahi. Tunde tangua lize, nja putukile ku hilula vuino ha muono uange na vizango viange, kaha nja tondele ku aluluka. Vunoni ka nja tantekeyele vati nji lingamo. Kulihi nje ku uanene vukuasi?

Cingi ca vavusoko vuange ka va kele na ndzolela. Miono yavo ya sulile na visoti. Vunoni umo nanantu na vusoko vueni va yoyele mu ndzolela. Nja tantekeyele ngecize va puile vantu va cili kaha va kele na ku niunga vitume via mu Mbimbiliya. imo ntsimbu ku nima, vakevo vene va nji longesele nguavo lizina lia Njambi, Yehova. Ngeci mukemuo, mu nima ya imo ntsimbu tunde lize litangua li tua lingile mbuanja, nja vundilile vukuasi kuli Njambi mu ku mu tumbula ha lizina lieni Yehova. Nja komokele cikuma, muomu lia mukuavo vene umo Mukaleho ua Yehova uezile ku ndzivo yange! Kaha ua putukile ku nji longesa Mbimbiliya.

Vunoni nja hitile mu citanga. Ku sua kumo, vavusamba vange va kele na ku nji sana ku telefone linga tuye mu ku endangana. Vutuhu ka ca puile ca casi, vunoni nja kele na ku viana. Muomu nja lihakelele kapandi ka ku tualelelaho ku lilongesa Mbimbiliya, kaha kali-kali nja lingilemo! Muono uange ua alulukile mu cifua ca ku komouesa, kaha nja uana ndzolela ya vusunga.

Tangua limo, nji vuluka nja vundilile kuli Njambi nguange, mu ku linga nja tondele ku kala miaka 10 mu kamenga linga va nji singimike, nga citava nji tonda naua ku kala miaka 10 ni ku tuvakana mu cipanga ca ntsimbu yose. Linga nji kuase vakuetu ngue mu va nji kuasele ange. Njambi ua kumbuluile civundilo cange, nja kala miaka 17 mu cipanga ca ntsimbu yose! Vunoni kanda va ci nji soke mu kamenga.

Vunoni cingi ca vavusamba vange vali mu tumenga mu miaka ya yingi. Vakuavo va tsa. Mu nje ku hilula ha muono uange, nje ku santsela cikuma vavusoko vuange vaze va pua Vakaleho. Va lihakelele kapandi ka ku litepa na vakuavo vantu linga vononoke vitume via mu Mbimbiliya.  Nja va singimikile cikuma ku hiana vakuetu vose va mu civunga ca vambanditu. Vunoni nje ku santsela cikuma-kuma kuli Njambi mu ku nji longesa njila ya cili cikuma ya ku yoyelamo.

ANDRES: Nja semukila na ku kolela mu limbo lia vuhutu vua kama, mua sulile vidroga, vuizi, ku litsihanga na vupangala. Vatate va tengukile na vuala na ku fuenia Kokaina. Navo na vanana va kele na ku licokota na ku lipupa ntsimbu yose.

Tele nji ua mundende cikuma, nja putukile ku-nua vuala na vidroga. Nja kele na ku kala cikuma mu vitapalo mu ku punda na ku landesa vize vi nji na pundu. Mu nja kolele, vatate va likuatele nange vusamba, kati mu njila ya cili vunoni mu ku nji longesa mua ku pundila na mua ku landesela mu vusueke vidroga na viuma vikuavo vi ya vindika nguvulu. Nja tapuile vimbongo via vingi mu ntsimbu ya indende. Vunoni mu ku linga nja tondele ku tsiha muntu, tangua limo vapulisia vezile ha ndzivo yetu, va nji kuatele na ku nji tuala mu kamenga miaka 5.

Tangua limo ku cimene tua vuile umo mutambi mu cisandzi ca kamenga, nguavo uose a tonda citava a ka simutuile via Mbimbiliya na Vakaleho va Yehova. Ngeci nja hanguile kuyako. Vi nja ka vuileko via nji ile ku mutima, ngeci nja putukile ku lilongesa Mbimbiliya na Vakaleho. Ka va suekele vimo vimpande via mu Mbimbiliya vize vi ve ku linga vakua malombelo akuavo nguavo ku tina vi nienguesa vantu, vunoni va nji longesele vitume via Njambi ngue muze mu via fua mpundu.

Mu ntsimbu ya indende nja muene ngecize nkuma ka nji hasa ku alulula muono uange ku ndzili yange lika, cikuma-kuma muomu vakuetu mu kamenga va kele na ku nji zuzuisa omo lia ku lilongesa Mbimbiliya. Ngeci nja vundilile ku simpa na mana kuli Yehova kaha ua nji kuasele. Nja simpile mu cifua ca ku linga nja hasele vene na ku va lekako vi nja kele na ku lilongesa.

Mu ya hetele ntsimbu ya ku patuka cange mu kamenga, nja lisosomuene cikuma, ngeci nja tondele ku hilukilamo! Mu nja kele na kuya, vindzinda (mapeleso) vavengi va nji salesele na livoko. Kaha vamo va handekele vene nguavo “uendaho, mulongisi ua kanike.”

Nje ku ivua liova lia ku singanieka ha vati ue ku fuile muono uange, nga ka nja tavesele Njambi a nji longese. Ngeci nje ku santsela cikuma-kuma ngecize Njambi ua nji lema kaha ka nji muene ngue ka kuesi naua mueka mua ku nji kuasela muahi, houe. a