Vuovuno Vuangana vua Njambi ni nguetu nguvulu ya tumbika Njambi i ka neha ciyulo na ku litavasiana ha mavu. Kaha ngue mu ya kulahesa Visamo 72:7, ha mavu ha ka kala “ku-lana ca ciyulo.” Vunoni tangua lika honi vu ka putuka ku sika Vuangana vua Njambi? Vati vu ka lingamo? Kaha vati mu hasa ku uana vukuasi ku ku sika ca Vuangana vuaco?

Mbimbiliya ya polofetele ku soloka ca viuma via vingi via ku komouesa vi muesa ngecize Vuangana vua Njambi vuli mu hiehi. Viuma viaco viose via pua “citantekeyeso” ca ambatesela kumo na vindzita, vindzala, mavezi, mandunduma na ku livuezelela ca vukenia na vumbanditu.​—Mateo 24:3, 7, 12; Luka 21:11; Ku-Solola 6:2-8.

Vupolofeto vukuavo nguavuo: “Tantekeya eci ngecize ku matangua aze a ku kotokela ku keza zintsimbu zia ku kaluua. Muomu vantu va ka pua vakua ku lilema vavene, vakua ku lema zimbongo, . . . vakua lisino ku visemi vavo, ka ve ku santsela, ka ve ku lela, cilemo ca cisemua cahiko, ka ci tava ku va kanda, vakua ku tuaha, ka ve ku lipokuesa, vakua ku kaluua, ka va leme ngozi, . . . vakua ku futunuka, vakua ku lema ku viukilila via ha mavu, na Njambi intsa ka va leme.” (2 Timoteo 3:1-4) Vutuhu tunde ku laza, vantu ve ku muesa vifua ngeci muevi, vunoni matangua ano vi na ila mueka honi.

Ovu vupolofeto vua putukile ku lipuisamo tunde 1914. Vakua ku soneka mizimbu ya laza, vakua pulitika na vakua ku soneka mavulu ve ku handeka nguavo mavu a aluluka cikuma tunde mu muaka uaco. Ca ku muenako, Peter Munch mukua ku soneka mizimbu ya laza ua ku Dinamarca, ua sonekele ngueni: “Ku putuka ca ndzita ya mu mavu ose mu 1914, ca alulula cikuma muono ua vantu ha mavu. Tele muaka uaco kanda u hete, vantu va lavelele nguavo mavu a tualelelaho ku vuaha, vunoni tunde mu muaka uaco vusonde, viyovo, vizindo na liova via livuezelela cikuma mu mavu ose.”

Vunoni nga tu hilulaho vuino, visoti viaco viose vi na pu ngue niondzi kaha vuovuno i ca. Muomu Vuangana vua Njambi vuovuno vua ku sika mavu ose. Ngeci mukemuo, vutuhu Yesu ua handekele via visoti viaco, vunoni ua vuezeleko muzimbu ua cili, ngueni: “Zimpande ezi vene zia cili zia vuangana va ka zi ambulula ku vifuti viose, zi ka pua vukaleho vua kuli vakua vifuti viose; amba vuose ku-kotoka ca mavu ci keza.”—Mateo 24:14.

Ou muzimbu ua cili ukeuo u ve ku ambulula cikuma Vakaleho va Yehova. Ngeci mukemuo, mukanda u ve ku tuhula cikuma va u luka nguavo Vutala vua Kaniungi Vuli na ku Ambulula Vuangana vua Yehova. Vue ku handeka ku sua kumo ku tuala ha viuma via cili vi vu ka linga Vuangana vua Njambi ku vantu na ku mavu.

Cikumbululo cemana hali evi viuma viuana via seho:

1. Vuangana vuaco ka vu ka sika ku hitila mu vantuamena va pulitika ya ha mavu.

2. Vantuamena va pulitika ka va ka tava ku va tambula mpoko yavo ya ku sika, ngeci mukemuo va ka seteka ku luisa Vuangana vua Njambi.​—Visamo 2:2-9.

3. Vuangana vua Njambi vu ka nongesa mavuangana a pulitika aze a ka tonda ku tualelelaho ku sika vantu. (Ndaniele 2:44; Ku-Solola 19:17-21) Eyi ndzita ya ku manusuila ya mavu ose va i luka nguavo Alemangendo.—Ku-Solola 16:14, 16.

4. Vose ve ku tava ku sika ca Vuangana vua Njambi va kovoka ku Alemangendo na ku kovela mu mavu a aha a ciyulo. Vakevo va ya tumbula Mbimbiliya nguayo “civunga ca kama.” Eci ca muesa ngecize vantu vavengi cikuma va kovoka.—Ku-Solola 7:9, 10, 13, 14.

Cuma ca katete ca na pande ku linga uose a tonda ku ka mu sika ku Vuangana vua Njambi na pande ku lilongesa masiko eni. Ngeci Yesu ua vundilile kuli Njambi ngueni: “Muono ka ue ku hua ukeuo ou, ku ku tantekeya ove Njambi umo lika ua vusunga, na uze i ua tumine, ikeye Yesu Kilistu vene.”​—Yoano 17:3.

Nga vantu va tantekeya vuino Yehova Njambi, ve ku uana vukuasi mu vinjila via vingi. Tu ci simutuilenu ha vinjila vivali: Ya katete, ve ku kala na lutsilielo lua ku kaniama muli ikeye. Lutsilielo luaco luemana ha vukaleho, kaha lue ku va hana vusunga ngecize Vuangana vua Njambi vuli na ku sika muilu kaha vuovuno vua ku sika mavu. (VaHevelu 11:1) Ca mu civali, ve ku putuka ku lema cikuma Njambi na vakuavo vantu. Ku lema Njambi ce ku tu lingisa ku mu ononoka na mutima uose. Ku lema vakuavo vantu ce ku va lingisa ku niunga mezi a handekele Yesu ngueni: “Mu mu ku hianga vantu ku mi lingila, nenu naua va lingilenu vakevo ngecize.”—Luka 6:31.

Ngeci mua cisemi ua cilemo, Sakatanga uetu a tonda ku tu kuasa cikuma. Ua tonda tu ka tambule muono u ya tumbula Mbimbiliya nguayo ‘muono ua vusunga.’ (1 Timoteo 6:19) Lelo ka tuesi na ku yoya ‘muono ua vusunga.’ Vantu vavengi vali na ku yanda kaha miono yavo ya kala mu vusonde. Mu ku mi makelesa lika ku ‘muono ua vusunga’ tu simutuilenu ha viuma via cili vi vu ka linga Vuangana vua Njambi.