Ku lisosomua ni ku sakalala ca pua cifua ci ue ku livuilamo muvila nga tuli mu cimo cisoti. Vuongo vue ku sanduola vimo mu muvila vi va sana mu putu nguavo hormônio, kaha nga muntu na lisosomua, vihormônio vie ku lingisa mbunge i pupe mua kama, maninga a lue cikuma, ku huimangana na ku lingisa misuni i likute. Ntsimbu kanda mu tantekeye mpundu vika via soloka, muvila uenu ue ku liviukisila vua lumo. Kaha nga ku sakalala ca hiti, muvila ue ku hiluka ngue mu ua fua.

Ku sakalala mutima tua semuka naco, kaha ce ku tu kuasa ku livuahesela nga kuli vumo vusonde ni viuma via kaluua. Kaha naua ce ku putukila mu vuongo. Vunoni ku sakalala mutima ci hasa ku mi kuasa ku kuata mbunge, ku puisamo vutumbe vuenu, ni ku mi kuasa ku viprova via ku sikola, ku vipanga ni ku uana vinjila via vingi via ku lingilamo viuma.

Vunoni ku sakalala cikuma mutima ntsimbu yose ci hasa ku tu vulumuna. Kaha nga ntsimbu yose mua haka muvila uenu ha mpinda, mu hasa ku vavala, ku kala vuasi na matoto, ku suva cikuma ni ku hona ku singanieka vuino. Na cifua ci mue ku yoyelamo na vakuenu ci hasa ku aluluka. Ku sakalala mutima cikuma ci hasa naua ku mi kovelesa mu ku nua cikuma vuala, ku sipa, ku nua ngoco vihemba na vilinga vikuavo via ku vihia. Kaha naua ci hasa ku mi honesa, ku mi kokela litima ni ku tonda ku lisukika.

Vutuhu ku sakalala mutima ka ce ku kuata ku cihindu ca vantu mu cifua cimo lika, vunoni kasi ce ku koka mavezi. Kaha ci hasa ku kuata ku muvila uose.