Mua ku Viukilila na Vize vi mua Kala Navio
Ambe nga tu vazike, tuambata ni ku somboka, ambe nga tu vanike ni vakuluntu, tu vose tua tonda ku yoya mu ndzolela na ku viukilila na viuma vi tuli navio. Mukemuo mua tonda Sakatanga uetu ngeci ua tu hana vimamuna via cili.
Puenu Vakua ku Fuitangana
“Mua cili [muntu] a pange na mavoko eni vize via cili, ngoco a kale nevi via li ka hana kuli uze na vi zela.”—EFESO 4:28.
Sakatanga uetu ua tonda tu mone vipanga mu njila ya cili. Omo lia vika? Muntu ue ku fuitangana ua yoya mu ndzolela muomu ue ku hasa ku lisuka ivene na vusoko vueni. Cikuavo naua, ue ku hasa ku kuasa vakuavo nga va tondeka vukuasi. Kaha mukuluntu ua ku vipanga vieni ue ku mu haka seho. Ngeci mukemuo, mukua ku fuitangana ka ve ku mu tundisa ngoco ha vipanga. Mbimbiliya ya handeka nguayo ku fuitangana ca pua “vuana vua Njambi.”—Ekelesiaste 3:13.
Puenu Vakua Vusunga
“Tua tsiliela ngecize tu li na mutima ua cili, tu hianga ku yoya na vusunga mu viuma viose.”—VAHEVELU 13:18.
Nga tu pua vakua vusunga, tu lihaka seho ya tu pande, tu kala na ciyulo ca mu visinganieka kaha tu pua na ku kosa tulo va cili. Cikuavo naua, vakuetu va ka tu kulahela na ku tu singimika. Vunoni vantu vakua ku onga ka ve ku likuua evi vivezikiso. Kaha mutima uavo ue ku va sompesa ntsimbu yose, ngeci ve ku yoya mu vuoma nguavo vakuavo tangua va va kuata.
Monenu Vimbongo mu Njila ya Cili
“Sambuenu ku cilemo ca zimbongo; viukililenu na vize vi mu li navio.”—VAHEVELU 13:5.
Tua tondeka vimbongo linga tu lande via kulia na viuma vikuavo. Vunoni “cilemo ca zimbongo” ca pua vusonde vua kama. Nga muntu ua lema cikuma vimbongo, ue ku vihisa ntsimbu na ndzili yeni mu ku tonda vimbongo via vingi. Eci ci hasa ku haka vulo vueni mu vusonde, ku hona ku uana ntsimbu ya ku kala hamo na vana, ni a hasa vene ku likokela ku vavala. (1 Timoteo 6:9, 10) Cikuavo naua, muntu ua lema cikuma vimbongo a hasa ku likovelesa mu makuli. Mbimbiliya nguayo: “Yala mukua vusunga a ka mona vivezikiso via vingi; vunoni uze a zangula mu ku fuka ka li kovoka ku kasitiku.” —Visimo 28:20.
Hangulenu Vilongesa via Seho
“Niunga mangana a cili na liano.”—VISIMO 3:21.
Vilongesa via cili vie ku tu kuasa ku pua vantu va cili ni visemi va cili. Vunoni ku ya ku sikola ka ca lombolokele ngecize mu ka kala na viose vi mu tondeka mu muono na ku yoya mu ndzolela, houe. Linga tu yoye mu ndzolela mu muono uetu uose, tua tondeka vilongesa via ku tunda kuli Njambi. Mbimbiliya ya handeka via muntu ue ku halakana Njambi nguayo: “Viose vi a ku linga vi ka vezika.”—Visamo 1:1-3.
