Omo lia Vika tue ku Yanda, ku Kulupa, na Kutsa?
Sakatanga uetu ue ku tu mona ku pua vana veni. Ngeci mukemuo, ka tondo tu yande. Vutuhu ngoco, tue ku mona lamba ya kama. Omo lia vika?
Tue ku Yanda Muomu Visemi Vetu va Katete Vakevo va Kavikoka
“Ngue hali yala umo lika, vupi vua kovelele hano ha mavu, na ku-tsa ha vupi; kaha ngecize ku-tsa ci na hete ku vantu vose.”—LOMA 5:12.
Njambi ua tangele visemi vetu va katete vaAndama na Eva na visinganieka na mivila ya ku tantuluka. Kaha ua va hele naua citungu ku pua limbo liavo, citungu caco va ci tumbula nguavo citungu ca Endene. Njambi ua va lekele ngueni citava va lie ku miti yose ya kelemo, ku tundisako muti umo lika. Vunoni vaAndama na Eva va lile vusuka vua ku muti u va va vindikile, kaha ku lingamo ca puile vupi. (Njenisisi 2:15-17; 3:1-19) Mu ku linga va muesele lisino, ngeci Njambi ua va sekuile mu citungu kaha muono ua putukile ku va kaluuila. Mu nima yaco va semene vana kaha navo vene muono ua va kaluuilile, vose va kulupile na kutsa. (Njenisisi 3:23; 5:5) Lelo lino tue ku vavala, ku kulupa, na kutsa omo lia vaAndama na Eva.
Tungelo va Vapi Navo ve ku Vueza ku Lamba Yetu
“Mavu ose a kundama kuli uze mukua vupi.”—1 YOANO 5:19.
“Mukua vupi” uaco ua pua Satana. Ua pua umo kangelo ua muesele lisino kuli Njambi. (Yoano 8:44; Ku-Solola 12:9) Mu nima yaco, tungelo vakuavo navo va muesele lisino na ku kava Satana, tungelo vaco va pua vandemone. Ava tungelo va vapi ve ku pangesa ngolo yavo mu kuonga vantu linga kati va ononoke Sakatanga. Ve ku songangeya vantu va linge viuma via ku vihia. (Visamo 106:35-38; 1 Timoteo 4:1) Satana na vandemone va lema ku yandesa vantu.
Vintsimbu Vimo Yetu Vavene tue ku Likokela Lamba
“Viose vize vie ku kuna muntu, vikevio via li ka tia naua.”—NGALATA 6:7.
Tu vose tue ku yanda omo lia vupi vu tua suana ku visemi vetu va katete kaha na viuma vie ku soloka mu mavu a Satana. Vunoni vintsimbu vimo, yetu vavene tue ku likokela tuyando. Mu njila ika? Nga tua lingi via ku vihia ni tu hangula viuma ca ku hona ku singanieka, ce ku tu yandesa. Vunoni, nga tu linga viuma via cili tue ku tia naua viuma via cili. Ca ku muenako, nga cisemi ua yala ua pua mukua vusunga, mukua ku fuitangana, kaha ua lema vusoko vueni, mua vusunga vusoko vueni vue ku yoya mu ndzolela. Vunoni nga ua pua mukua lizangamena, ue kunua cikuma vuala, kaha ua pua cilenda, vusoko vueni hamo lika neni vene vu ka yoya mu vuhutu. Ngeci mukemuo, nga tu ononoka Njambi ca pua ku muesa mana. Ua tonda tu likuue vivezikiso via vingi, hamo lika na “ciyulo ca kama.”—Visamo 119:165.
Tuli ku ‘Matangua a ku Kotokela’
“Ku matangua aze a ku kotokela . . . vantu va ka pua vakua ku lilema vavene, vakua ku lema zimbongo, . . vakua lisino ku visemi vavo, . . . ka ve ku lipokuesa, vakua ku kaluua, ka va leme ngozi.”—2 TIMOTEO 3:1-5.
Lelo lino, vilinga via vantu vi nafu vene ngue vi ya tumbuile Mbimbiliya. Vilinga viavo via muesa ha toma ngecize tuli ku ‘matangua a ku kotokela’ a ano mavu. Mbimbiliya ya tumbuile ngecize ku matangua etu kue ku kele vindzita, ndzala, mandunduma, na misongo. (Mateo 24:3, 7, 8; Luka 21:10, 11) Viuma viaco vie ku koka lamba ya kama na kutsa.
