“Omo vakua vupi va soka ngue muila, nomo vose vakua ku linga via ngoco va tuikilila; cikeco muomu va ka venieka ku miaka yose ya ya-ye.”—VISAMO 92:7.

Ngue mu tua mono mu cilongesa ci na hiti, viuma via ku vihia vili na ku likulisa ku sua kumo. Evi ka via pandele ku tu komouesa. Muomu Mbimbiliya ya vi handekele laza ku 2 Timoteo 3:1-5 nguayo, ku ‘matangua a ku kotokela’ vantu ve ku kele na vilinga via ku vihia cikuma. Matangua a ku kotokela a vika? Matangua a ku kotokela a ano mavu a na sulu na vantu ka va tondo ku ononoka Njambi. Vuovuno Njambi a ka nongesa vaze ka va tondo ku aluluka. Kaha vantu va cili lika vaze ve ku ononoka Njambi, vakevo va kovoka. Mbimbiliya nguayo: “Vakua vuviuke va ka suana cifuti, kaha va ka kalamo ku miaka na miaka ya ya-ye.”—Visamo 37:29.

“Njambi mukua ciyulo vuovuno a ka palakana Satana.”—LOMA 16:20.

Nga va na nongesa Satana na vandemone hamo lika na vantu va vapi vose, kaha ha mavu hose ha ka kala ciyulo. Sakatanga ua kulahesa ngueni: “Na umo uahi a ka [tu] vuisa vuoma.”—Mika 4:4.

“Tembele ya Njambi i li hamo na vantu . . . kaha a ka hunda masozi ose ku meso avo; na ku-tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala.”—KU-SOLOLA 21:3, 4.

Lamba na ku vavala vi ka hua muomu Njambi a ka vi tundisako na viose via tu kokela Satana, Andama, Eva na ku hona ku tantuluka cetu. Kaha omo liaco cipue “ku-tsa ka ci ka [kalako] naua.” Vose va lema Njambi kaha ve ku mu ononoka, va ka yoya miaka yose. Kulihi honi va ka yoyela?

“Zindinda na mpambo vi ka zolela; na makango a ka viukilila, na ku tema ntsani ngue loza.”—ISAYA 35:1.

Omo Njambi a ka nongesa vakua vupi vose, mavu a ka pua citungu. A ka viuka cikuma na ku sula na vihela via cili na vitungu via ku vuaha cikuma. Kaha naua, ha mavu ha ka kala via kulia via vingi. (Visamo 72:16) Vindonga na visali vi ka kala na mema a ku lela. Omo liaco vantu va ka suva nguavo kua kele lizi “mazilo.” Vantu va ka litungila vindzivo viavo na ku yoyamo. Ka ku ka kala naua muntu ua ku hona ndzivo, muhutu ni cipue ndzala.—Isaya 65:21, 22.

“Ku ka kala cisangukilo.”—VILINGA 24:15.

Vuno mu tonda ku ka mona naua vavusoko na vavusamba venu vatsa ni? Njambi mukua ngolo yose a ka va sangula kaha va ka yoyela vene hano ha mavu mu citungu. Mu ka va tantekeya kaha navo vene va ka mi zivuka. Aci singaniekenu ndzolela i mu kevua mu vose! Vika vi tu hana vusunga nguetu vatsi va ka sanguka? Muomu mu Mbimbiliya mua kala mizimbu ya muesa ngecize ku laza kua kele vantu va va sanguile. Kaha va hilukile naua ku masoko avo mu ku yoya hamo lika naua. Cikuavo naua, cingi ca vantu va sanguile Yesu ua va sanguilile ha meso a mbunga.—Luka 8:49-56; Yoano 11:11-14, 38-44.