“Vamala va na pande ku lema vampuevo vavo ngue mivila yavo vavene. Ou a lema mpuevo yeni a lilema ikeye ivene: muomu na umosi uahi na zindi ntsitu yeni ivene; vunoni a i lisa na ku i lela.”—EFESO 5:28, 29.

Yala ikeye mutue ua vusoko. (Efeso 5:23) Vunoni yala ua cili ka puile mukua vutenu ni cikolonia, houe. Ua haka seho mpueyeni kaha ue ku mu niunga vuino mu ku mu hana via tondeka. Ue ku lihakela kapandi ka ku mu vuisa ndzolela kati ka ku tuameka lika vizango vieni. (Filipu 2:4) Cikuavo naua, yala ua cili ue ku simutuila vuino na mpueyeni kaha na ku mu halakana na mutima uose. Kaha naua ke ku ‘sasa’ na mpueyeni ni nguetu, ku mu veta ni ku mu handeka mezi a api.—Kolose 3:19.

“Mpuevo a singimike yalieni.”—EFESO 5:33.

Nga mpuevo a singimika yalieni na ku mu kuasa mu vihangula vieni, ue ku kuasa vusoko vu yoye mu ciyulo. Ambe nga yalieni na sevuka, ke ku mu sembulula vunoni ue ku tualelaho ku mu muesa kasingimiko na ku konkama. (1 Petulu 3:4) Nga a tonda ku leka yalieni cimo cisoti, mpuevo ua cili ue ku hangula ntsimbu ya cili ya ku handeka kaha ue ku lingamo na kasingimiko.—Ekelesiaste 3:7.

“Yala a ka seza ise na naye na ku kakatela mpuevo yeni: kaha va ka pua ntsitu imo lika.”—NJENISISI 2:24.

Nga yala na mpuevo va liambata, ve ku likuata vusamba vua kama. Ngeci mukemuo, va na pande kaniamesa vulo vuavo mu ku simutuila na mutima uose kaha na ku lilingila umo na mukuavo viuma via cili. Va na pande ku pua vakua vusunga kuli umo na mukuavo, mu ku hona kuenda vungungu mukua ndzivo yavo, ni nguetu ku limona ku mivila na muntu ueka. Vungungu vue ku vavala cikuma ku mutima. Vue ku lingisa vampuevo na yala kati va likulahele naua ni vene ku tepa vusoko.—VaHevelu 13:4.

“Longesa kanike njila ize i a na pande ku endela, kaha vene omo na kulu ka li ka fumamo.”—VISIMO 22:6.

Njambi ua kundika visemi cipanga ca ku longesa vana. Eci ca ambatesela kumo na ku va longesa mana a cili kaha na ku va muesa lungano lua cili. (Ndeutelonomi 6:6, 7) Nga muana na vihisa vimo, cisemi ua cili ke ku tuntila ku niengua. Vunoni ue ku ‘zangula mu ku ivua, ku livandeka mu ku handeka, na ku livandeka naua ku vutenu.’ (Tiango 1:19) Nga a mona ngecize muana a tondeka ku mu sungamesa, a lingamo na cilemo kati na matoto.

“Enu vana, tamunukenu ku visemi venu . . . Lemesa iso na noko.”—EFESO 6:1, 2.

Vana va na pande ku ononoka visemi vavo na ku va singimika. Nga vana va singimika visemi vavo, ve ku neha ndzolela ha ndzivo kaha vusoko vue ku yoya mu ciyulo na ku likuata kumo. Vana va ku kola ve ku singimika visemi vavo mu ku lihakela kapandi ka ku va niunga vuino. Evi vi hasa ku ambatesela kumo na ku va kuasa ku viukisa ndzivo yavo ni ku va hana viuma via ku likuasa navio.—1 Timoteo 5:3, 4.