“Liecelienu ha kati kenu ku milonga, nga umosi a li nevi via liniengele mukuavo.”—KOLOSE 3:13.

Tu vose tue ku sevuka. Tu hasa ku vulumuina vakuetu ni vakevo va tu vulumuina. Ngeci mukemuo, tua tonda vakuetu va tu ecele kaha netu tua pande ku va konekela. Nga tu ecela vakuetu va na tu sevukila, ka tu ka kala na nkulundundu. Kaha ka tu ka hiluisa “ca cipi neci ca cipi” ni ku va vuluisa ntsimbu yose viuma vi va tu lingile. (Loma 12:17) Amba co nga va na tu vavalesa cikuma ku mutima kaha ka tuesi na ku hasa ku suva vi va na tu lingi? Nga mukemuo, tua pande ku uana ntsimbu ya cili ya ku handeka na muntu uaco kua lika lietu. Vutumbe vuetu vua pua ku linga ciyulo kati ku tonda iya tu tuika mulonga.—Loma 12:18.

“Mu ku konkama umo a yongole mukuavo mukua ku hiana ivene.”—FILIPU 2:3.

Nga tu pua va ku likehesa na ku kala na kasingimiko, vantu va ka lema ku kala netu. Muomu va tantekeya ngecize tu ka kala navo vuino kaha ka tu ka va vulumuina ku cizango. Vunoni nga tu lihaka helu lia vakuetu mu ku limona ngue tua va hiana, ni ku linga viuma muaya cizango cetu lika, tu ka koka hoi-hoi  ntsimbu yose. Vantu va ka tu sondoloka kaha ka tu ka kala na vavusamba.

“Njambi ka hangula ku vantu: vunoni ku miyati yose, ou uose a mu vuila vuoma, kaha a linga vuviuke, ikeye ya na tava.”—VILINGA 10:34, 35.

Sakatanga uetu ke ku mona vamo vantu ngue va kala na seho ku hiana vakuavo omo lia cifuti, muyati, nga cihutu ni mpite ni cipue cikanda (likova) ceni. “Na tange na maninga amo lika miyati yose ya vantu.” (Vilinga 17:26) Eci ca lomboloka ngecize, tu vose tu vamuanetu na vandumbuetu. Nga tu singimika vakuetu na ku va muesa ngozi, ce ku tu vuisa ndzolela tu vose kaha tue ku ya Njambi ku mutima.

“Zalenu . . . ku konkama.”—KOLOSE 3:12.

Nga tu pua va ku konkama, tue ku lingisa vakuetu va livue ku zituka. Ve ku livua ku zituka mu ku handeka netu ni vene ku tu handekela, muomu va tantekeya ngecize tua pua va ku tula mutima. Nga muntu na tu vuila matoto kaha tu mu kumbulula na civovo, a ka hasa kutula matoto eni. Mukanda ua Visimo 15:1 nguauo: “Ku-kuania civotsi ci tengesa vukalu; vunoni lizi lia ku vavalesa li sangumuna vutenu.”

“Ku-hana ca hiana ku-tambula mu ku vezika.”—VILINGA 20:35.

Vantu vavengi lelo lino va kala na lizangamena kaha ve ku lituala cikuma mana vakevo vavene lika. Vunoni tu hasa ku kala na ndzolela ya vusunga nga tu pua vihuanga. (Luka 6:38) Vihuanga va yoya mu ndzolela muomu va lema vantu ku hiana vikuata. Cilemo caco ce ku va lingisa va santsele nga umo a va hana vimo. (Kolose 3:15) Lihulenu nguenu: “Iya nja tonda a pue kavusamba kange, vuno uze ua pua cilumbi kaha ke ku santsela ni cihuanga kaha ue ku santsela?” Vika tu lilongesaho? Lingenu vi mua tonda vakuenu va vi linge.—Mateo 7:12.