Vantu vavengi ve ku pindasiana tangua na tangua linga va uane viuma vi va tondeka. Vunoni visoti via mavu vie ku kaluuisa cikuma viuma. Omo lia vika?

• Nga muimbo mua katuka liuayanga, viuma ngeci mua via kulia na ku tonda kua ku kala vie ku kaluua.

• Ku kaluua ca vimbongo ci hasa ku lingisa vantu va va tundise ha vipanga ni ku pangela vene kambongo ka kandende.

• Viyovo via mavu vi hasa ku puzula ni ku pihisa mingoso ya vantu, vindzivo ni viuma vikuavo. Kaha evi vie ku kokela vantu vavengi vuhutu.

• Nga mu pangesa kambongo kenu na mana, mu ka uana mua ku yoyela ambe nga visoti vi ka mi tungumuna.

• Vulukenu ngecize vipanga, mingoso ni vimbongo vi hasa ku hua.

• Kua kala viuma ka tu hasa ku landa na vimbongo, ngeci mua ndzolela na ciyulo mu vusoko.

Mbimbiliya nguayo: “Omo tu li na via ku lia na vuzalo, nevi vene tu ka tumama na vuhuanga.”—1 Timoteo 6:8.

Ku viukilila na viuma vi tuli navio, ca lomboloka ku yoya mu ndzolela nga tuli na viuma vi tu tondeka mpundu. Evi via pua via seho cikumakuma nga kambongo ka na keha.

Linga mu viukilile na viuma vi muli navio, ca pua ca seho ku asiuisa yoyesi yenu. Nga ntsimbu yose mue ku landa lika viuma via ndando ya kama, mu ka kala na vitanga via vingi.