Kuma mutima omo lia liuayanga lia mavu ci hasa ku kuata ku cihindu ca vantu, ca ku muvila na ca mu visinganieka. Vavengi va hita laza mu visoti viaco, ve ku singanieka nguavo na limo litangua liahi evi visoti vi ka hua. Vika honi ve ku linga?

• Vamo ka ve ku tonda ku singanieka ha viuma vi ka soloka ku lutue.

• Vamo ve ku likovelesa mu vuala ni mu vidroga linga kati va singanieke ha visoti viavo.

• Vamo ve ku singanieka nguavo ci li ku lutue kutsa, ngeci ve ku litsiha.

• Vimo visoti vi mue ku pinda navio, vi hasa ku pua via kantsimbu lika kaha vi hasa ku aluluka mu cifua ka mua lavelelele.

• Ambe nga visoti vienu ka via huile, vunoni kuli vimo vi mu hasa ku lingako linga mu kolese.

• Mbimbiliya ya tu hana lulavelelo lua vusunga ku tuala ha ku manusula visoti via vantu.

Mbimbiliya nguayo: “Kati mu umine mitima ku litangua lia mene: muomu litangua lia mene li komina mutima likelio livene. Kayando ka na lipuisila litangua liako.”—Mateo 6:34.

Nkala litangua na visoti vialio. Kati mu tavese visoti via mene vi mi lingise ku hona ku puisamo vi mu hasa ku linga lelo.

Ku lisosomua na viuma via ku vihia vi mua singanieka nguenu halumo vi ka soloka, vi hasa lika ku mi sakalalesa mutima na ku zeyesa lulavelelo luenu.

 Umo mukua visamo ua vundilile kuli Njambi ngueni: “Lizi liove likelio ndeya ku viliato viange, na ceke ku njila yange.” (Visamo 119:105) Talenu vati Lizi lia Njambi, Mbimbiliya lia pua ndeya:

Nga tuli mu milima, ndeya ye ku tu kuasa ku temuna mu njila. Na vuno vene, Mbimbiliya ya kala na vitume via mana vi hasa ku tu tuamenena nga tu tonda ku linga cihangula ca cikalu.

Ndeya ye ku tu kuasa ku mona vili ku lutue. Na vuno vene, Mbimbiliya i hasa ku tu kuasa ku mona muono ua cili u tua lavelela ku lutue.