Evi vikevio vi ca nongonuene cimo civunga ca vakua ku tondesesa. Nga mua tsiliela muli Sakatanga, evi vi va nongonona ava vakua siensia vi hasa ku mi vuluisa cingi ca viuma via tangele Njambi mu ku niunga mavu.

Vunoni mu ku linga vantu vali na ku vihisa mua kama mavu, ka a hasa ku likangukila lika liao. Vika vi tu hana vusunga ngecize Njambi a ka lingako mumo?

Talenu vinimbu via tu hana vusunga ngecize mavu a ka pua naua a cili mu cikasa.

• Mavu va a tangele kuli Njambi. “Ha katete Njambi ua tangele melu na mavu.”—Njenisisi 1:1

• Njambi ikeye ivene mavu. “Mavu akeo a Yehova a na ku-sula cao.” —Visamo 24:1

• Njambi ua tangele mavu a kaleko miaka yose. “Ua hakele mavula a mavu, linga kati a taliangele ku miaka yose.”—Visamo 104:5

• Njambi ua kulahesa ngecize ha mavu ha ka kala muono ku miaka yose.“Njambi uze ua vumbile mavu na ku a panga, . . . ka a tangele cihuolohuohuo, ua a vumbile linga va kaleho.”—Isaya 45:18

• Njambi ua kulahesa ngecize vantu va ka kala ha mavu ku miaka yose. “Vakua vuviuke va ka suana cifuti, kaha va ka kalamo ku miaka na miaka ya ya-ye.” —Visamo 37:29

Njambi ua tangele mavu mu cifua ca ku linga vantu va hasa ku yoyelaho ku miaka yose nga ka va a vihisa. Yehova Njambi ua kulahesa ngueni tangua a ka nongesa vakua ku vihisa mavu.—Ku-Solola 11:18

Mbimbiliya ya kulahesa ngecize Njambi a ka himpula ano mavu ku pua citungu ca cili na ku sempununa livoko lieni mu ku puisamo “cizango ca viuma viose vi li na muono.”—Visamo 145:16