SEHO YA KALA HA KU SINGIMIKA VUSOKO

• Livulu Os Sete Princípios para Fazer o Casamento Funcionar, ngualio va yala na mpuevo ve ku limuesa kasingimiko, “kati lika mu viuma via kama, vunoni cipue mu tuviuma tua tundende, kaha matangua ose.”

• Cimo ku tondesesa ca muesa ngecize vanike ve ku lilongesa ku singimika vakuavo, va kala na kakesi ka cili, vusamba vua cili na visemi kaha ce ku va kuasa ku tepulula vitanga via mu vuongo.

 VATI MU HASA KU MUESA KASINGIMIKO MU VUSOKO?

Lihakelenu vimo vizango hamo lika na vusoko. Ha katete, vose mu vusoko va na pande kuivuisisa vika ca lumbunuka “ku muesa kasingimiko.” Ca mu civali, sonekenu kasingimiko ka cifua cika mua lavelela mu vusoko vuenu, kaha na vilinga vika va na pande ku viana. Ca mu citatu, visimutuilenu mu vusoko linga vose vazivukemo na vati va hasa ku vipuisamo.

Puenu lungano lua cili. Vuno mue ku hisa vusoko vuenu, ku tsopa ni ku sembulula vinguli viavo ni vene ku vakuata ku lizi nga vali na ku handeka ni?

Lihungu: Muesenu ngecize mue kusingimika mukua ndzivo yenu na vana venu, ambe nga kave ku mi muesa kasingimiko kaco.

Muesenu kasingimiko ambe nga ka mua tavele cihangula ca mukuenu. Nga kua soloka visoti, vianenu ku handeka mezi ngeci mua “ntsimbu yose” ni “eni na limo litangua liahi.” Aa mezi eku lingisa muntu kuivua matoto na ku katula hoi-hoi mu vusoko.