Omo lia Vika Vantu ka ve ku Singimikila Naua Muono?

ZIKULENU

SEHO YA KALA HA KU SINGIMIKA MUONO

Ku linga viuma vie ku muesa kasahuntu ku muono ci hasa ku pihisa cihindu cenu na ku koka vusonde muimbo.

Ku sipa ka ce ku koka lika cancer vunoni ce ku zeyesa naua ndzili ya muvila ya kulua na misongo. Ngeci mukemuo, cingi ca vantu ve kutsa ku cancer ya ku mampunga ni nguetu masapala, omo lia ku sipa ni ku kala mu hiehi na vakua ku sipa.
Ku lundumuna mbunga na vitua ce ku sila vavengi vitamba via mu visinganieka. Imo sikola ya kama nguayo: “Cipue vaze ve ku hita ku visikola ya masualale ve ku hasa kuovoka ku mata na citonyo cahi, kasi ve ku tundisaho vitamba via mu visinganieka.”—Stanford University
Kuendesa mendelo oku muntu na pende ni na fuenye vidroga, ce ku koka vimponde ku mendelo na ku vantu vakua kuenda ha mikono. Vantu vavengi va hasa ku vulumuka muimbo nga tu linga viuma ka vie ku muesa kasingimiko ku muono.

VI MU HASA KU LINGA

Niungenu cihindu cenu. Ambe nga mu na hiti miaka ya yingi, kasi citava ku likela ku sipa, ku penda na ku fuenya vidroga. Vilinga viaco vie ku vulumuna muono uenu na ku muesa kasahuntu ku miono ya vakuenu, cikuma-kuma vavusoko vuenu.

“Tu lilelesenu ku mazilo ose.”—2 Kolintu 7:1.

Hakenu seho ku muono uenu na ua vakuenu. Puenu na ku viukisa ndzivo yenu ntsimbu yose, linga mu liniunge ku vimponde. Puenu na kuendesa vuino liendelo lienu na ku liniunga vuino. Kati mu tave ntsindiye ya vakuenu ya ku linga viuma vie ku koka ku vetua ni mponde.

“Omo u tunga ndzivo ya iha, kaha u ka tunga citungu helu liayo, linga kati u nehe maninga ha ndzivo yove, nga umosi a lahukaho.”— Ndeutelonomi 22:8. a

Muesenu ngozi ku vakuenu. Ku muesa kasingimiko ku muono ca ambatesela kumo na cifua ci tue ku muenamo vantu va ku visemua na vifuti viose, cipue nga vampite ni vihutu, cipue nga va lilongesa mua kama ni kuahi. Muomu kahangu na vizindo vikevio muzi ua kama ue ku koka vukenia na vindzita hano ha mavu.

“Nianga yose, na vutenu na matoto, na muyoyo, na visaki, vi fume ha kati kenu, na indzi yose: Vunoni puenu umo na mukuavo vakua mitima ya cili.”—Efeso 4:31, 32.

VI VE KU LINGA VAKALEHO VA YEHOVA

Vakaleho va Yehova ve ku longesa vakuavo ku yoya mu cifua ci muesa kasingimiko ku muono. Vipanga vietu via ku longesa Mbimbiliya via kuasa vavengi ku vula vilinga via ku vihia na viuma vie ku tengula.

Tue kuononoka masiko a ku liniunga ku vimponde ku ku tunga cetu. Mu tue ku tunga vihela vie ku tuala ku lutue cipanga cetu ca ku longesa Mbimbiliya, tue ku lilongesa vutongue vua ku liniunga ku vimponde. Kaha vihela viaco ve ku vi hilula kusua kumo mu kuononoka masiko a nguvulu ku tuala ha ku liniunga ku vusonde.

Tue ku kuasa vakua ku hita mu vimponde. Mu vingonde 12 vi na hiti ngeci, tu na kuasa ku vimponde via ku pua 200 mu mavu ose, kaha hanai 12 milhoes ya vidolare via ku tunda ku milambu yetu.

Mu ua putukile musongo ua Ebola ku cihava ca Africa mu 2014, kaha mu Congo co mu 2018, tua longesele vantu mua ku liniungila ku musongo uaco. Tua tumine miluua va ka longesele vantu ku tuala ha cimpande “Kuononoka ce Kuohiela Miono.” Tua sokoluele vihela via ku tanena ku mavoko ku Vindzivo vi tue ku lemesela, na ku longesa vantu seho ya ku tana ku mavoko ntsimbu yose.

Ku Serra Leoa, vamo vakua cisandzi va sangalele vakaleho va Yehova omo lia ku kuasa kati lika vakua vulombelo vuavo vunoni na mbunga ikuavo, ku tuala ha ku liniunga ku Ebola.

Ku cihela ca ku tanena ku mavoko ku ndzivo ya Vuangana ya ku Libéria mu 2014, mu kua kele musongo ua Ebola

a Ku Isaleli ya laza, eli lisiko lia muesele seho ku tuala ha ku singimika muono ua vavusoko na vantu veka.

VINGILENU!