KULI VAZE VA LIAMBATA
1: Lukakatela
VI CA LOMBOLOKA
Lukakatela lue ku kuasa vaze va liambata va mone vulo vuavo ku pua ku likata ca ntsimbu yose kaha eci ce ku va kuasa ku lembama mutima. Muomu ce ku lingisa cipue mpuevo ni yala a livue ngecize mukuavo ua lihakela kapandi ka ku singimika vulo ambe mu vintsimbu via vikalu.
Vamo vantu va liambata ve ku ivua ntsindiye ya ku tualeleho ku kala hamo, omo lia liova lia vavusoko ni lia vantu muimbo. Vunoni ci li ku lutue mpuevo na yala va tualeleho ku likata omo lia ku lilema na ku lisingimika umo na mukuavo.
CITUME CA MU MBIMBILIYA: “Yala naua kati a seze mpuevo yeni.”—1 Kolintu 7:11.
“Nga mua kala na lukakatela mu vulo vuenu, ka mu ka pu na ku niengua vuasi. Mu ka kala na vuasi mu ku ecela na ku pinga ku ecela kaha ka mu ka mono nkala citanga ci soloka ku pua vukovelelo vua ku tsiha vulo.”—Micah.
SEHO YA KALAHO
Nga ku na soloka visoti, va yala na mpuevo va lukakatela ka va ka singanieka nguavo, ‘Tua liambatele ngoco, ka tua litombuele,’ muomu evi vie ku lingisa va tonde vukovelelo vua ku tsiha vulo.
“Vantu vavengi, ve ku kovela mu vulo oku va na kulahela mu vumo vutumbe. Vutumbe vuka? Ku tsiha vulo. Vunoni ku kovela mu vulo oku muntu ali laza na ku singanieka ha ku vu tsiha nga ku ka soloka cimo cisoti, ce ku lingisa muntu uaco kati a kale na lukakatela tunde vene ku vuputukilo.”—Jean.
VI MU HASA KULINGA
LIESEKENU ENU VAVENE
Nga muli na kuli pindisa na mukua ndzivo yenu . . .
-
Vuno mue ku liveya nguenu vika nja ambatele ni ku somboka ku muntu ua ku fua muze ni?
-
Vuno mue ku singanieka ku-sua kumo ngue mu na liambata na muntu ueka ni?
-
Vuno mue ku handeka viuma ngeci mua, “nji ku seza” ni “nji ka tonda muntu ueka ua nji haka seho” ni?
Nga mu na kumbulula ngueni eyo ku cihula cimo ni via vingi ha kati kevi, pangelenu ha ku kaniamesa lukakatela luenu.
SIMUTUILENU NA MUKUA NDZIVO YENU
-
Vuno ku likata cetu mu vulo ci na tepuluka ni? Nga mukemuo, omo lia vika?
-
Vika tu hasa ku linga vuovuno, mangana tu kaniamese ku likata cetu?
MAHUNGU
-
Vintsimbu vimo puenu na ku sonekela mukua ndzivo yenu mezi a cilemo
-
Muesenu ngecize mua likata na mukua ndzivo yenu mu ku haka vikupulo vieni ku cihela ci mue ku pangela
-
Puenu na ku tonda vukovelelo vua ku simutuila na mukua ndzivo yenu nga muli ku vipanga ni ka muesi hamo
CITUME CA MU MBIMBILIYA: “Ava Njambi na va pandakana, muntu kati a ka va hangunune.”—Mateo 19:6.
