KU VISEMI
8: Lungano
VI CA LOMBOLOKA
Visemi ve ku hana lungano lua cili, ve ku pangesa vi ve ku longesa. Ca ku muenako, ka mua pandele ku lavelela vana venu va handeke vusunga nga umo muntu neza ha ndzivo kaha mu leka vana venu nguenu, handekenu nguenu, ‘va na tundu,’ vunoni muli ha ndzivo.
“Vantu vezilila ku handeka nguavo, ‘linga vi nji ku leka, kati vi njili na ku linga.’ Vunoni eyi ka ya puile njila ya cili ya ku longeselamo vana. Muomu vana ve ku temunuina viose vi tue ku handeka na ku linga. Ngeci mukemuo, nga tu va longesa vimo kaha tu linga vieka, va ka tu sungamesa.”—David.
CITUME CA MU MBIMBILIYA: “Ove, u li na ku ambulula, nguove kati mu punde, “nkuma ove u li na ku punda, ni?”—Loma 2:21. NWT.
SEHO YA KALAHO
Visemi va kala na ndzili ya kama ku vana vavo, ku tuvakana vavusamba vavo ni muntu uose-ouo. Ngeci mukemuo, enu visemi lungano luenu lua cili lukeluo lu hasa ku kuasa mua kama vana venu. Mua vusunga, ca pua ca seho ya kama ku pangesa vi mue ku longesa.
“Citava tu handekele vana vintsimbu via ku pua vingahi, kasi va soloka ngue ku vesi na ku tu halakana. Vunoni nga mu likela ku pangesa vi mue lilongesa, va ka mi vuluisavio. Vakevo ve ku mona viose vi tue ku linga, ambe nga va soloka ngue ka vesi na ku tu tuala mana.”—Nicole.
CITUME CA MU MBIMBILIYA: “Mangana a fuma muilu . . . ka esi na zimpata, ka esi na civembulu.”—Tiango 3:17.
VI MU HASA KU LINGA
Hilulenu ha vitume vie ku tuamenena muono uenu. Viprograma na vifilme vika mua lema ku tala? Vati mue ku yoya na vakua ndzivo yenu hamo lika na vana venu? Vavusamba va cifua cika mua kala navo? Vuno mua haka seho ku vakuenu ni? Ku tsiha mpanga, vuno nji tonda vana vange va ka pue ngeci muange ni?
“Nange na yaliange, ka tue ku sindiya vana vetu va kave vitume vize ka tue ku kava yetu.”—Christine.
Pingenu ku ecela nga mu na sevuka. Vana venu va tantekeya ngecize ka mua tantulukile. Ngeci mukemuo, mu ka pua lungano lua cili lua ku likehesa na mukua vusunga, nga mu pua na ku lomba ku ecela mu vusoko.
“Vana vetu, va tondeka ku tu ivua tu litavela visevuka vietu kaha na ku pinga ku ecela. Ku lingamo, ci ka va kuasa ku litavela visevuka viavo.”—Robin.
“Etu visemi tua kala na ndzili ya kama ku vana vetu, ku hiana muntu uose-ouo. Muomu ntsimbu yose, ve ku mona vi tue ku linga. Ngeci mukemuo, cifua ci tue ku yoyelamo ca pua ngue ku sokolola limo livulu kaha vilinga vietu vi ka pua vilongesa kuli vakevo.”—Wendell.
