Ku simutuila ca vusunga, ca pua visemi na vana ku lileka mpundu cifua ci ve ku livuilamo na visinganieka viavo.

Ku simutuila na tunkavala ca pua ca cikalu. Ca ku muenako, omo vana venu va puile va vandende va kele na ku mi leka viose, vunoni mu va na hete ha vunkavala va na likela ku mi leka visinganieka viavo na cifua ci ve ku livuilamo. Eci ci na pu ngue enu mu nemana ku sinia limo lia ndonga, muana co ali ku sinia likuavo. Vunoni nga mu na putuka ku mona viuma via cifua eci, kaha tantekeyenu ngecize ku pua na ku simutuila na vana venu ci tondeka honi mua kama!

Puenu na ku simutuila ha ntsimbu i va tonda vakevo. Puenu na ku lingamo ambe nga va tonda ku simutuila vutsiki.

“Vintsimbu vimo, mu hasa ku ivua cizango ca ku i hula muana nguenu, ‘Ino ikeyo ntsimbu i u tonda tu simutuile, kati tu na kala hamo litangua liose ni?’ Vunoni ka tua pandele ku tema, muomu yetu tue ku tonda ku simutuila navo. Kaha ku simutuila na vana cikeco cuma ca lavelela cisemi uose.”—Lisa.

“Vutuhu nja lema ku kosa, vunoni nja nongonona ngecize vutsiki ikeyo ye ku pua ntsimbu ya cili ya ku simutuila na vana vange.”—Herbert.

CITUME CA MU MBIMBILIYA: “Na umo uahi a lengeye ceni ivene vunoni ku-vezika ca mukuavo.”—1 Kolintu 10:24.

Kati mu pue na ku tanguka ngoco. Umo cisemi ua yala ngueni: “Vintsimbu vimo, nje ku singanieka viuma vieka nga vana vali na ku simutuila nange, kaha navo ve ku nongonona ngecize ka njesi na ku va tuala mana.”

Nga nenu cikeco citanga ci mue ku pinda naco kaha puenu na ku zima TV ni nkala likina li mue ku pangesa. Eci cika mi kuasa ku tuala mana ku viuma vi ve ku handeka vana venu na ku va muesa ngecize viuma vi ve ku handeka via pua via seho kuli yenu ambe nga vi soloka ngue ka viesi na seho.

“Tua pande ku leka vana vetu nguetu, visinganieka viavo via pua via seho kuli yetu, muomu nga va livua ngecize ka tua vi hakele seho kaha va pua na ku vi holoka ni ku tondela vukuasi kueka.”—Maranda.

“Ka mua pandele ku hianesamo ku niengua, nga viuma vi va mi leka vana kati via cili.”—Anthony.

CITUME CA MU MBIMBILIYA: “Ngoco vene zangamenu vati mue ku ivua.”—Luka 8:18.

Puenu na ku simutuila ha vintsimbu vi mue ku linga vimo na vana. Vintsimbu vimo, vana ve ku livua ku zituka nga kavesi na ku litala citona meso na cisemi.

“Tue ku simutuila na vana vetu nga tuli mu likalu. Kaha tue ku simutuila vuino muomu ka tuesi na ku litala citona meso.”—Nicole.

Kaha ntsimbu ya ku-lia, ya pua ntsimbu ya cili mu ku simutuila na vana.

“Ha ntsimbu yaco eyi, nkala muntu ha kati ketu ue ku handeka viuma via ku vihia ni via cili cikuma vi na mu solokela litangua liaco. Ku linga evi, ce ku tu kuasa ku likuata kumo kaha ce ku tu hana vusunga ngecize ka tuesi na ku pinda na visoti lika lietu.”—Robin.

CITUME CA MU MBIMBILIYA: “Vantu vose va zangule mu ku ivua, [kaha] va livandeke mu ku handeka.”—Tiango 1:19.