KULI VAKUENDZE NA VAHUMBE
9: Citantekeyeso
VI CA LOMBOLOKA
Ku litantekeya ca ka lengelele lika ha ku tantekeya lizina lienu na cifua ci mue ku solokelamo. Vunoni ca ambatesela kumo na viuma vi mua haka seho, viuma vi mua tsiliela kaha vifua na vuzeye vuenu. Citantekeyeso cenu ca pua vuntu vuenu vuose mu kati na ha mbandza.
SEHO YA KALAHO
Ku tantekeya yenu veya mpundu ca kala na seho, muomu ka mu ka likela ku linga vi mua tsiliela omo lia ntsindiye ya vakuenu.
“Vantu vavengi va pua ngue tumponia va kala mu vivenda via vizalo. Vuzalo vue ku kala ha mivila yavo kati vakevo ve ku vu hangula. Vantu vakevo ve ku va zika ntsimbu yose.”—Adrian.
“Nja lilongesa ku hakuila vusunga ambe ha vintsimbu via vikalu. Kaha nja tantekeya veya mpundu va pua vavusamba vange va cili kaha na kakesi kange nga njili ha kati kavo.”—Courtney.
CITUME CA MU MBIMBILIYA: “Kati mu lifuise na viuma via ntsimbu ino vunoni lialuluisienu na mitima ya iha”—Loma 12:2.
VI MU HASA KU LINGA
Ku tantekeya vifua vienu via cili, vuzeye vuenu na viuma vi mua tsiliela, ci ka mi kuasa ku tantekeya yenu veya mpundu mu ntsimbu ino, na muntu mu mu tonda ku ka pua ku lutue. Ku tantekeya vikumbululo via vihula vi na hatako, ci hasa ku mi kuasa ku litantekeya enu vavene.
Vifua via cili: Viuma vika via cili vi nje ku linga? Vutongue na vuhasi vuka nja kala navuo? Ca ka muenako, vuno nje ku hasa ku niunga cifua ci nje ku livuilamo ni? Vuno nja pua nji mukua ku fuitangana ni? Vuno nja kala na vukatuisi vua ku kuasa vakuetu ni? Nje ku puisamo vi nja likuminia ni?
LIHUNGU: Vuno mu na kala na citanga ca ku nongonona vifua vienu via cili ni? Nga mukemuo, hulenu visemi venu ni umo kavusamba kenu i mu kulahela va mi leke vifua vika via cili vi ve ku mona kuli enu kaha omo lia vika.
CITUME CA MU MBIMBILIYA: “Vunoni muntu uose a hilule vilinga vieni, kaha a ka lipambe nevi via ivene, kati nevi via mukuavo.”—Ngalata 6:4.
Vuzeye: Ha vifua vika nja pande ku pangela? Ha vintsimbu vika ce ku nji kaluuila ku vula vieseko? Ha viuma vika naua nja tondeka ku lipokuesa?
CITUME CA MU MBIMBILIYA: “Nga tu handeka, nguetu ka tuesi na vupi, tu ku lionga etu vavene.”—1 Yoano 1:8.
Vi nja tsiliela: Kuli yange, vika via pua cili na via vipi? Omo lia vika nje ku singaniekela ngoco? Omo lia vika nja tsiliela muli Njambi? Vusunga vuka nja kala navuo ngecize Njambi kua kala? Viuma vika nja tsiliela ngecize via pua via vuhenge kaha omo lia vika? Viuma vika nja tsiliela ngecize vi ka soloka ku lutue?
CITUME CA MU MBIMBILIYA: “Liano li ka ku vingila; mana a ka ku niunga.”—Visimo 2:11.
Halumo mu Hasa ku Lema Naua Evi
VIKUMBULULO 10 KU VIHULA VI VE KU LINGA VAKUENDZE NA VAHUMBE
Yange Iya?
Ku tantekeya seho i ua kala nayo, vifua viove via cili, ha lengela ngolo yove, na vizango viove vi ka ku kuasa ku hangula viuma na mana nga uli na ku lua na ntsindiye ya vakuenu.
