KULI VAZE VA LIAMBATA
3: Kasingimiko
VI CA LOMBOLOKA
Va yala na mpuevo va haka seho ku kasingimiko, ve ku tualelelaho ku lisingimika ambe nga ka vesi na ku litavasiana. Limo livulu ngualio, “Vakua kasingimiko ka ve ku kakatela nkala muntu ku vutumbe vueni. Vunoni ve ku tualelelaho ku simutuila umo na mukuavo ku tuala ha cisoti ci na soloka. Ve ku lihalakana umo na mukuavo na kasingimiko kaha muntu ku muntu ue ku tava ku alulula vimo linga a litombole na mukuavo.”—Ten Lessons to Transform Your Marriage.
CITUME CA MU MBIMBILIYA: “Cilemo . . . ka ce ku lilengeyela viuma via civene.”—1 Kolintu. 13:4, 5.
“Ku singimika mpueyange, ce ku muesa ngecize nja mu haka seho kaha ka nji tondo ku linga na vimo viahi vi mu yandesa ni vi vihisa vulo vuetu.”—Micah.
SEHO YA KALAHO
Ca ku hona kasingimiko mu vulo, va yala na mpuevo va hasa ku pua na ku lipaya, ku litomba na ku tuva-tuva ha visevuka via umo na mukuavo. Kaha vakua ku tondesesa nguavo, evi viuma vi tu na tandanga vikevio vie ku tsihisa malo a vantu vavengi.
“Ku sahula mukua ndzivo yove, ku mu tomba ni ku mu zola, ce ku mu vuisa ku mutima ku vavala, ku mu lingisa a hone ku mi kulahela kaha ci hasa vene ku mu lingisa na ku tsiha vulo.”—Brian.
VI MU HASA KU LINGA
LIESEKENU ENU VAVENE
Singaniekenu ha cifua ci mu na simutuilamo na mukua ndzivo yenu mu simano ya mutuntu. Kaha mu nima yaco, lihulenu nguenu:
-
‘Lungahi nji na paya mukua ndzivo yange kaha lungahi nji na mu sangala?’
-
‘Mu vinjila vika mpundu nji na muesa kasingimiko kuli mukua ndzivo yange?’
SIMUTUILENU NA MUKUA NDZIVO YENU
-
Vilinga na handekesi ika ya muesa ngecize mua singimika mukua ndzivo yenu?
-
Vilinga na handekesi ika vie ku solola ngecize ka mua singimikile mukua ndzivo yenu?
MAHUNGU
-
Sonekenu vinjila vitatu, vi mu tonda linga mukua ndzivo yenu a mi muese kasingimiko. Lekenu mukua ndzivo yenu neni a lingemo. Kaha muntu ku muntu, a hane lipapelo lieni kuli mukuavo linga a pangele ha vifua viana tumbula mukuavo via ku mu mueselamo kasingimiko.
-
Sonekenu mukana ua vifua via cili vi mue ku komoka kuli mukua ndzivo yenu. Mu nima yaco, mu lekenu seho i mua haka ku vifua viaco.
“Ku singimika yaliange, ca lomboloka ku muesa mu vilinga viange ngecize nja mu haka seho kaha nja tonda a yoye mu ndzolela. Ka tondekele ku linga via kama. Vintsimbu vimo, tuvilinga tua tundende tuketuo tue ku muesa kasingimiko ka vusunga.”—Megan.
Vunoni ku ntsongo ya viose, ca seho mukua ndzivo yenu ikeye na pande ku livua ngecize mua mu singimika kati yenu mu mu lekavio.
CITUME CA MU MBIMBILIYA: “Zalenu ngue vaze va a na hangula Njambi, vakua ku lela na ava va va lema, mutima ua cikeketima, ngozi, ku likehesa, ku konkama, lukakatela.”—Kolose 3:12.
