KULI VAKUENDZE NA VAHUMBE
11: Ku Pua Mukua ku Fuitangana
VI CA LOMBOLOKA
Mukua ku fuitangana ka puile cilenda. Vunoni ua lema ku panga linga a lisuke kaha na ku kuasa vakuavo. Kaha ue tualelelaho ku panga ambe nga vipanga viaco ve ku vi sembulula.
SEHO YA KALAHO
Tua kala na via vingi via ku linga mu muono. Kaha cingi ca vantu ka va lemene ku panga mua kama. Vunoni vusunga ni ovu, ku pua mukua ku fuitangana ca pua ca seho ya kama.—Ekelesiaste 3:13.
“Nja nongonona ngecize ku pua mukua ku fuitangana, ce ku vuisa ndzolela kaha na ku livua ngecize tua kala na seho. Kaha ku singanieka mu cifua eci, ca nji kuasele ku lema ku panga. Mua vusunga, ku pua mukua ku fuitangana ci ka mi kuasa ku kala na lizina lia cili.”—Reyon.
CITUME CA MU MBIMBILIYA: “Mu vipanga viose mua kala nganio.”—Visimo 14:23.
VI MUA HASA KU LINGA
Linga mu pue na ku mona vipanga mu njila ya cili, vimamuna vi na hatako vi hasa ku mi kuasa.
Lilongesenu ku linga vuino viuma na ku vi lema. Viose-ovio vi mu hasa ku linga ngeci mua vipanga via ha ndzivo ni via ku sikola, lihakelenu kapandi ka ku vi linga vuino. Nga mu lihakela kapandi ka ku vueza ku vutongue vuenu ku vipanga, mu ka vi lema mua kama.
CITUME CA MU MBIMBILIYA: “Ua mono yala ua ku takama ku vipanga vieni? A ka mana ku meso a vamiangana; kali ka mana ku meso a vamala va ngoco.”—Visimo 22:29.
Singaniekenu vati vipanga vienu vie ku kuasa vakuenu. Ntsimbu yose i mu pua na ku linga vuino vipanga vienu, mu ka hasa ku kuasa vakuenu. Ku linga vuino vipanga vienu via ha ndzivo ci ka leluisa vipanga via vakuenu mu vusoko.
CITUME CA MU MBIMBILIYA: “Ku-hana ca hiana ku-tambula mu ku vezika.”—Vilinga 20:35.
Pangenu ku tuvakana na muze mu va na mi pingi. Mu cihela ca ku linga lika vize vi va na mi tumu, vuezenuko ku hiana na muze mu va na mi pingi. Kaha mu ka linga viuma na ndzolela muomu ku cizango cenu kati omo lia ntsindiye.—Mateo 5:41.
CITUME CA MU MBIMBILIYA: “Linga ngozi yove kati i pue ngue ku kapandi kove vunoni ya ku cizango.”—Filemone 14.
Lingenu viuma mu ku puisamo. Vantu va lema ku panga ka va puile vilenda, vunoni naua ka va puile vakua ku-tsa ha vipanga. Ve ku seteka ku linga viuma mu ku puisamo, kaha eci ce ku va kuasa ku uana ntsimbu ya ku panga na ku uana ntsimbu ya ku huima mua cili.
CITUME CA MU MBIMBILIYA: “Livoko limo lia ku sula hamo na ciyulo, lia hiana mavoko avali a ku sula hamo na ku-fuitangana na ku tonda luhundzi.”—Ekelesiaste 4:6.
