KU VISEMI
6: Ku Sungamesa
VI CA LOMBOLOKA
Lizi ku sungamesa, li hasa ku lomboloka ku tuamenena ni ku longesa. Vintsimbu vimo, ca ambatesela na ku sungamesa vilinga via kanike. Vunoni vintsimbu vimo, ca pua mpundu ku longesa kanike vati ve ku yoya na ku linga vihangula via cili.
SEHO YA KALAHO
Mu miaka ino, visemi vavengi va likela ku sungamesa vana vavo. Omo lia vika? Nguavo halumo ci hasa ku mu lingisa a livue vungoco. Vunoni visemi va mana ve ku tumbikila vana vavo amo masiko, na ku va longesa ku a ononoka.
“Vanike va tondeka ku va hakela vinginga linga va hase ku kola vuino. Ca ku hona ku va sungamesa, vanike ve ku pua ngue vuato ka vuesi na cikasi (cilapo) kaha mu nima ya ntsimbu ue ku hungumukila mu njila yeka, halumo vene na ku vombela.”—Pamela.
VI MU HASA KU LINGA
Puisenumo mezi enu. Nga muana kesi na ku ononoka masiko enu, lingenu cose linga a mone vitanga vie kuizamo. Ku sinia likuavo co, nga na lingi via cili puenu na ku mu sangala mpundu.
“Nje ku sangala vana vange ku-sua kumo, omo lia ku ononoka cavo. Muomu tu li mu mavu mua lana vakua lisino, kaha ku va sangala ce ku va lingisa ku tava ku va sungamesa.”—Christine.
CITUME CA MU MBIMBILIYA: “Viose vize vie ku kuna muntu, vikevio via li ka tia naua.”—Ngalata 6:7.
Puenu va ku votsika. Nga mu tonda ku sungamesa muana, puenu na ku singanieka ha citso ceni, vuhasi vueni kaha na vukama vua cisevuka ca na lingi. Ku sungamesa ce ku pua ca casi ku ci tava kuli kanike, nga ci na likuata mpundu na cisevuka ca na lingi. Ca ku muenako, nga muana ka pangesele vuino telefone mu hasa ku mu vindika ku i pangesa mu imo ntsimbu. Cikuavo naua, kati mu pue na ku himpula vimpande via vindende ku pua via kama.
“Nje ku seteka ku lihakela kapandi ka ku nongonona nga muanange na muesa mpundu lisino ku cizango ni na sevuka lika. Ku sevuka ku sevuka, lisino lisino. Ku sevuka ca tondeka lika ku ci tumbula, vunoni lisino noho kuli tukula mpundu.”—Wendell.
CITUME CA MU MBIMBILIYA: “Enu vaise, kati mu sangumune vana venu, ku tina va uila mu vusiua.”—Kolose 3:21. NWT.
Muesenu cilemo. Nga vana na nongonona ngecize visemi vavo va va lema, ce ku va puila ca casi ku tava ku sungamesa cavo.
“Mua kele na ku sevuka munetu ua yala, tua kele na ku mu vuluisa via vihangula via cili via lingile ku nima kaha na ndzolela i tua vuile omo liaco. Kaha tua mu lekele nguetu, cisevuka ka ci hasa ku vihisa lutsimo lueni lua cili, ca kama lika nga a pangelaho. Kaha netu tua litavelele ku mu kuasa ku lingamo.”—Daniel.
CITUME CA MU MBIMBILIYA: “Cilemo ci li na lukakatela, ci li na ngozi.”—1 Kolintu 13:4.
