KULI VAZE VA LIAMBATA
4: Ku Ecela
VI CA LOMBOLOKA
Ku ecela ca pua ku tavesa civulumuna ci hite na ku hona ku tulika nkulundundu. Ka ca lombolokele ku popolola cisevuka ni ku livuisa ngue ka ca keleko, houe.
CITUME CA MU MBIMBILIYA: “Liyandelienu umo na mukuavo, kaha liecelienu ha kati kenu ku milonga, nga umosi a li nevi via liniengele mukuavo.”—Kolose 3:13.
“Nga mua lema muntu, ka mu ka tala ku visevuka vieni via ku nima, vunoni mu ka tuala mana ku kapandi ka ali na ku lihakela mu ntsimbu eyi mu ku pua muntu ua cili.”—Aaron.
SEHO YA KALAHO
Nga mu tulika nkulundundu, mu hasa ku likokela visoti via mu visinganieka na ku muvila kaha evi vi hasa naua ku tsiha vulo.
“Tangua limo yaliange ua lingile vimo kaha ua nji pinga ku ecela. Vunoni ca nji kaluuilile ku mu ecela, mu nima ya ntsimbu nja hasele ku mu ecela, vunoni nje ku liveya omo lia ku hona ku mu ecela vuasi-vuasi. Muomu ca kokela visoti mu vulo vuetu.”—Julia.
VI MU HASA KU LINGA
LIESEKENU ENU VAVENE
Tangua lia ka mi vulumuina mukua ndzivo yenu, cipue mu vilinga ni mu mezi, ka lihulenu nguenu:
-
‘Vuno nje ku niengua vuasi ni?’
-
‘Vuno via na lingi mukuetu via kama vene kaha vitondeka mpundu a nji pinge ku ecela ni citava vi hite?’
SIMUTUILENU NA MUKUA NDZIVO YENU
-
Nga mu na livulumuina, ntsimbu ingahi ye ku hitamo linga mu liecele?
-
Viuma vika tu hasa ku linga tu pue na ku likonekela vuasi?
MAHUNGU
-
Nga mukua ndzivo yenu na mi vulumuina kati mu singanieke nguenu na lingimo ku cizango.
-
Nga mukua ndzivo yenu na mu vulumuina setekenu ku mu ivuisisa, oku mu vuluka ngecize “etu vose tue ku suntsuka na viuma via vingi.”—Tiango 3:2.
“Ce ku pua ca casi ku ecela nga tu vose tu na sevuka, vunoni ce ku pua ca cikalu nga umo lika ikeye na limbenje. Ku tava ku ecela vakuetu ce ku tondeka ku likehesa ca vusunga.”—Kimberly.
CITUME CA MU MBIMBILIYA: “Liyule vuasi na mukua nkole yove.”—Mateo 5:25.
Ku kala na nkulundundu ci hasa ku mi kokela visoti via cihindu na via mu visinganieka kaha na ku tsiha vene vulo vuenu
