3. Omo Lia Vika Vantu va Cili ve ku Yanda?
Tantekeyenu nga Mukemuo ni Kuahi
Ca pua vuhenge ku mona vantu va cili navo va li na ku yanda. Ngeci vamo ve ku handeka nguavo ka ci tondeka ku pua muntu ua cili muomu hanga vene u ka mona lamba.
Nga mu Hilulaho Vuino
Vamo va tsiliela nguavo muono ua pua lika ku semuka na kutsa. Ve ku handeka nguavo nga muntu ua lingile via cili a tsa, kaha a ka semukila naua mu cifua ni mu muono ua cili, vunoni vaze va lingile via ku vihia va ka semukila mu lamba. Kaha kuliya na vilongesa viaco, ambe nga muntu ua cili vunoni ku laza ua lingile via ku vihia, kasi a ka mona lamba. Vutuhu ngoco . . .
-
Seho ika i ka kala ha lamba yaco nga muntu mua ka semuka ka ka vuluka muono ueni ua laza?
-
Nga tue ku yanda omo lia vupi vu tua lingile laza, omo lia vika tue ku lihakela kapandi ka ku niunga cihindu cetu naku liniunga ku mponde?
TANTEKEYENU VIA VINGI
Talenu video Omo lia Vika Njambi Necelela Tuyando? ili mu jw.org.
Vi ya Handeka Mbimbiliya
Lamba ka ya puile kasitiku ke ku tu hana Njambi.
Vunoni cingi ca vimponde vie ku tu solokela ngoco, halumo omo lia ku kala ha cihela ntsimbu ya ku pihia.
“Nja hilukile, na ku mona muintsi lia litangua, ngecize ku-hiana ku tunta ka ca pandamene vakua mikono, cipue ndzita kuli vakua ngolo, cipue mbolo kuli vakua mangana, cipue vupite kuli vakua mana, cipue kavumbi kuli vakua vuino; vunoni ntsimbu na [luvinda vie ku] solokela vose.”—EKELESIASTE 9:11.
Imo lamba ye kuiza muomu ka tua tantulukile.
Vintsimbu via vingi vantu ve ku pangesa lizi “vupi” mu ku tumbula viuma via ku pihia vie ku linga muntu. Vunoni Mbimbiliya ye ku pangesa lizi liaco mu ku tumbula vupi vu va suana vantu vose, cipue vaze va cili ni va vapi.
“Va nji sulumuine mu vipi; Na mu vupi nana ua nji imitile.”—VISAMO 51:5.
Vupi vu tua suana vue ku kokela vantu luvinda.
Kaha ka vua pihisile lika vusamba vuetu na Sakatanga uetu, vunoni ku tu lingisa naua tu hone ku litombola na viuma vikuavo via tangele Njambi. Omo liaco, vantu vose ve ku hita mu lamba.
“Nji na uanamo lizi eli lia lisiko, ngecize omo ange nji na zange ku linga via cili, ambe, oho vene vupi vuovu.”—LOMA 7:21.
“Muomo tu tantekeya ngecize viose via ku tanga vi li na ku vindzuoka na ku yanda hamo netu na vuno.”—LOMA 8:22.
