Kaha nga mukemuo, halumo tua kala na ngolo ya ku tepulula lamba yetu.

Mu njila ika vantu va kala na mulonga ku tuala ha lamba ye kuiza omo lia viuma vi na hatako?

• Ku Yandesa.

  Civunga ca Tala via Cihindu mu Mavu Ose ca muesa ngecize, ha kati ka vantu 4 umo lika va mu yandesaho laza ku vunike, kaha ha kati ka vampuevo 3 umo lika va mu yandesaho laza na ku limona neni ku muvila ku ndzili ha tsimbu imolika.

• Vusiua.

  Mu 2018 Civunga ca Tala via Cihindu mu Mavu Ose ca muesele ngecize “mu 2016 mu mavu ose, kua solokele vimponde via ku pua kampe 477.000, kaha via kokele kutsa ca vantu”. Cikuavo naua, mu muaka uaco kua katukile liuayanga lia kokele kutsa ca vantu kampe 180.000.

• Vitanga via Cihindu.

  Umo mukanda ua sonekele Fran Smith nguauo: “Makulukazi a vantu lelo lino ve ku sipa, kaha makania eku koka kutsa ca vantu vavengi. Ca ku muenako, eku ku koka vuvezi vua mbunge, kalepa, cihuihui na vibandu ku masapala kaha na câncer.”

• Kahangu.

  Umo mukua ku tala via cihindu ca mu vuongo Jay Watts ngueni: “Vuhutu, ku hona ku lilogesa, kahangu ku miyati, ku hona ku haka vantu seho, ku kakateya vantu ku nunguluka, visemua, na ku semukila ku visemua via lihaka cikuma seho, ce ku koka mavezi a mu vuongo.”

  TANTEKEYENU VIA VINGI

  Talenu video Omo lia Vika Njambi ua Tangele Mavu? ili mu jw.org.

Vantu vakevo ve ku koka cingi ca lamba lelo lino.

Vutuhu vanguvulu ve ku likuisa nguavo ve ku pangela vantu, vunoni ve ku va zangamena na ku kaluuisa miono yavo.

“Muntu umo a li na mpoko kuli mukuavo mu ku lipihisa ivene.”​—EKELESIASTE 8:9.

Lamba i hasa ku tepuluka.

Vitume via mu Mbimbiliya vie ku kuasa vantu ku kala na cihindu ca cili kaha na ku yoya mu ciyulo na vakuavo.

“Mutima ua kulu ukeuo muono ua ntsitu; Vunoni ku-liveya cikeco ku-pola ca vitsiha.”​—VISIMO 14:30.

“Nianga yose, na vutenu, na matoto, na muyoyo, na visaki, vi fume ha kati kenu, na indzi yose.”​—EFESO 4:31.